Nte oyomde okụbọde

Mek usem

Be ka udiana n̄kpọ

Be ka se isịnede

Mme Ntiense Jehovah

Efịk

Ndi Mme Ntiense Jehovah Ẹnịm Ibet Ẹban̄a Erenowo ye N̄wan Ndisiwọrọ An̄wa?

Ndi Mme Ntiense Jehovah Ẹnịm Ibet Ẹban̄a Erenowo ye N̄wan Ndisiwọrọ An̄wa?

Mme Ntiense Jehovah ẹnịm ke mme item ye mme ewụhọ oro ẹdude ke Bible ẹkeme ndin̄wam nnyịn inam mme n̄kpọ oro ẹdidade ufọn isọk nnyịn inyụn̄ inem Abasi esịt. (Isaiah 48:17, 18) Idịghe nnyịn ikewet mme item ye mme ewụhọ emi, edi imesida mmọ idu uwem. Yak ise nte ndusụk mmọ ẹnyenede n̄kpọ ndinam ye uwọrọ an̄wa. *

  • Abasi oyom ndọ ebịghi ke nsinsi. (Matthew 19:6) Mme Ntiense Jehovah ẹdiọn̄ọ ke erenowo ye n̄wan emi ẹsisan̄ade ntre ẹwọrọ an̄wa ẹyom ndinam ndọ nte ini akade, ntre mmọ isidaha utọ ini emi inam mbụbru.

  • Mbon oro ẹkponde ẹkem ndinam ndọ ẹkpesitọn̄ọ uyomima. Utọ mbon emi ‘ebe ini nsehe uyen,’ oro edi, ini emi udọn̄ idan̄ enen̄erede ọsọn̄ ubọk.1 Corinth 7:36.

  • Ana erenowo ye n̄wan oro ẹsiwakde ndisan̄a ntre n̄wọrọ an̄wa ẹkeme ndidọ ndọ. Abasi inyịmeke kpukpru mbon oro ẹsion̄ode ndọ mmọ ye ukara ẹfiak ẹdọ ndọ, sia ibet Abasi ọdọhọ ke n̄kukụre n̄kpọ oro ekemede ndinam owo osio ndọ m̀mê ọwọrọ ndọ edi edieke ebe m̀mê n̄wan esie esịnde efịbe.Matthew 19:9.

  • Ẹdọhọ mme Christian oro ẹyomde ndidọ ndọ ẹte ẹdọ owo Abasi ikpọn̄. (1 Corinth 7:39) Mme Ntiense Jehovah ẹda nte ke ewụhọ emi iban̄ake owo emi amade se nnyịn ikpepde, edi aban̄a owo emi enịmde, etienede anam se ikpepde onyụn̄ anade baptism nte Ntiense Jehovah. (2 Corinth 6:14) Toto ke eset, Abasi ọkọdọhọ nditọ esie ẹsidọ mbon oro ẹtienede ẹkpono imọ. (Genesis 24:3; Malachi 2:11) Mme anam-ndụn̄ọde mfịn ẹkụt nte ke item emi ọfọn etieti. *

  • Ana nditọ ẹkop uyo mme ete ye eka mmọ. (Mme N̄ke 1:8; Colossae 3:20) Nditọ emi ẹsụk ẹdụn̄de ye mme ete ye eka mmọ ke ufọk ẹdiọn̄ọ ke se ẹtịn̄de emi esịne ndikop se ete ye eka mmọ ẹtịn̄de ẹban̄a uwọrọ an̄wa. Ana ẹdiọn̄ọ isua emana emi ẹnyịmede eyen mmọ ọtọn̄ọ uyomima, se enye akpanamde ye se enye mîkpanamke ke utọ ini emi.

  • Mme Ntiense Jehovah ẹsida Bible ẹbiere m̀mê akpana iwọrọ an̄wa, ẹnyụn̄ ẹbiere utọ owo emi mmọ ẹkpedade ẹwọrọ an̄wa. Mmọ ẹsinam emi sia Bible ọdọhọ ete: “Owo kiet kiet oyobiom mbiomo idemesie.” (Galatia 6:5) Edi ke n̄kpọ aban̄ade uwọrọ an̄wa emi, ediwak owo ẹsima ndibịne Mme Ntiense emi ẹbịghide ke esop ẹnyụn̄ ẹmade mmọ ẹkebụp se ẹkpenamde.Mme N̄ke 1:5.

  • Ediwak n̄kpọ emi mme owo ẹsinamde ke ini uyomima edi akwa idiọkn̄kpọ. Ke uwụtn̄kpọ, Bible ọdọhọ nnyịn ikûnam use. Ndien use emi esịne n̄ko oburobụt edinam eken emi mbon oro mîdọhọ ndọ ẹsinamde, utọ nte ndifiọn̄ọ owo ndidọ idan̄, ndinam idan̄ inua m̀mê ndinam ke etịtifuọ. (1 Corinth 6:9-11) Idem mme edinam oro ẹsidemerede owo udọn̄ idan̄, emi ẹkemede ndinam ọdọn̄ owo ndinam ata idan̄ edi “mbubiam ido” emi onyụn̄ etekde Abasi esịt. (Galatia 5:19-21) Bible akpan n̄ko “mbubiam ikọ” emi aban̄ade oburobụt ido.Colossae 3:8.

  • Esịt esibian̄a owo etieti. (Jeremiah 17:9) Esịt ekeme ndinam owo anam n̄kpọ emi enye ọfiọkde ke ọdiọk. Erenowo ye n̄wan emi ẹyomde ndidọ ndọ ẹyetre ndidu ikpọn̄ ke itie ye ini emi ẹkemede ndinam mmọ ẹdue Jehovah. Emi idiyakke esịt abian̄a mmọ. Mmọ ẹkeme ndinyụn̄ mbiere ndidu ke ebiet emi mbon en̄wen ẹdude mîdighe ẹnam ọdiọn̄ọ-idem-owo asan̄a ye mmọ. (Mme N̄ke 28:26) Mme Christian oro mîdọhọ ndọ edi oro ẹsụk ẹyomde n̄wan m̀mê ebe ẹdiọn̄ọ ke ifọnke ndika Intanet n̄koyom owo, sia emi ekeme ndinam mmọ ẹtọn̄ọ ufan ye owo emi mmọ mînen̄ekede idiọn̄ọ.Psalm 26:4.

^ ikp. 2 Idịghe kpukpru itie ke erenowo ye n̄wan ẹsiwọrọ an̄wa ntre mbemiso ẹnamde ndọ. Bible idọhọke ke ana ẹwọrọ an̄wa, inyụn̄ idọhọke ke owo mîwọrọke an̄wa ke owo oro ididọhọ ndọ.

^ ikp. 6 Ke uwụtn̄kpọ, se ẹkewetde ke n̄wed oro Marriage & Family Review ọdọhọ ke “ndun̄ọde ita oro ẹkenamde owụt ke mme akpan n̄kpọ oro ẹkemede ndinam ndọ ebịghi (isua 25 esịm 50 mme akande oro) edi ebe ye n̄wan ndidiana kiet n̄kpono Abasi, mma Abasi, nnyụn̄ nnam n̄kpọ esie.”—Volume 38, issue 1, page 88 (2005).

Kpep N̄kpọ En̄wen

Ndi Mmeben̄e Idem Nditọn̄ọ Uyomima?

Se mbụme inan̄ emi ẹkemede ndin̄wam fi ebiere m̀mê emeben̄e idem nditọn̄ọ uyomima.