Nte oyomde okụbọde

Mek usem

Be ka udiana n̄kpọ

Be ka se isịnede

Mme Ntiense Jehovah

Efịk

JANUARY 14, 2013
FRANCE

Irénise Moulonguet Ọsọn̄ Akan ke France

Irénise Moulonguet Ọsọn̄ Akan ke France

Ẹdọhọ ke Irénise Moulonguet, emi ekedide isua 112 ke November 2012, ọsọn̄ akan ke France. Ẹdiọn̄ọ enye nte kiet ke otu Mme Ntiense Jehovah.

Idahaemi ke ẹdidiọn̄ọ ke idịghe Maria Richard, kpa owo en̄wen emi okodude uwem ebe isua 100, ọkọsọn̄ akan ke France. Irénise ọkọsọn̄ọ enye ke usen 22. Maria Richard emi akakpade ke October 2012 ke ekperede ndisịm isua 112 ekedi kiet ke otu Mme Ntiense Jehovah n̄ko.

Uwem ikesimemke ye Irénise. Ke ini enye ekedide isua iba kpọt, enye ama ọbọhọ n̄kpa ke ini Obot Pelée, emi okodude ekpere obio emana esie Matinique, okobomode. Ke ini Irénise ekedide isua 15 enye ama ọwọrọ aka French Guiana, man akanam utom do onyụn̄ an̄wam mbonubon esie. Ke ediwak isua ẹma ẹkebe, enye ama afiak ọnyọn̄ Martinique, ọdọ ndọ onyụn̄ ọtọn̄ọ ndinyene nditọ. Edi André ebe esie ama akpa ke ini okosụk edide akparawa owo, akpa ọkpọn̄ nditọ iban ita ọnọ enye ndise mban̄a.

Irénise ama anam utom ke in̄wan̄ mboro man ekeme ndise mban̄a idemesie ye nditọ esie. Ete kiet emi ekesinamde utom ye enye emi odude ke iduọk isua 80 idahaemi ke eteti nte enye ekesisịnde idem anam utom. Enye ọdọhọ ete: “Enye ekesida usen kiet kpọt etịm se iwakde ibe itu mboro 175 oro ẹdidade ẹka obio en̄wen!”

Okposụkedi emi n̄kpọ ekesisọn̄de ndusụk ini, Irénise esinyene in̄wan̄-in̄wan̄ edu kpukpru ini. Enye enyene nditọ, nditọ nditọ, ye nditọ nditọ nditọ 75 ndien kiet otu oro ama etịn̄ ke enye “esinam idọkọ, enyene ifiọk, onyụn̄ esibụk inem inem mbụk.” Ediwak n̄kani owo ẹsitie ntre.

Okposụkedi emi nsenubon owo esitienede etịp esịn ke ndinam owo odu uwem ebịghi, owo ndinyene idotenyịn ke n̄kpọ ọyọfọn ye nte enye odude uwem esitiene an̄wam n̄ko. Ke ini ẹbụpde mbon oro ẹdude uwem ẹbe isua 100 se inamde mmọ ẹdu uwem ẹbịghi, ediwak mmọ ẹsidọhọ ke mmimọ idụhe uwem ntịme ntịme, idia udia nsịt nsịt, inyụn̄ ika iso ikop idem inem. Ndun̄ọde kiet ọdọhọ ete: “Mmọ ẹsikop odudu ẹnyụn̄ ẹsọn̄ idem.”

Ediwak owo ẹnịm ke mbon oro ẹdude uwem ẹbịghi isisoboke nsọn̄ọn̄kpọ. Edi idịghe ntre. Ndun̄ọde kiet oro ẹkedade anyan ini ẹnam ke France owut ke ediwak mbon oro ẹdude uwem ẹbe isua 100 idahaemi, “edi emi idem osụk ọsọn̄de ẹma ẹsobo nsọn̄ọn̄kpọ ediwak ini ẹnyụn̄ ẹkan.”

Ntre ke edi ye Irénise, emi okosobode mme mfịna. Eyeyen esie kiet esiwak nditịn̄ ke imama in̄wan̄-in̄wan̄ edu esie. Enye ọdọhọ ete: “Okposukedi emi enye mîkemeke aba ndiwọrọ nsan̄a nte enye ekesinamde, akanam enye isemeke.”

Irénise ekesika ufọkabasi Roman Catholic ke ntọn̄ọ, ama onyụn̄ enyene ediwak mbụme ndibụp mban̄a Abasi ye se isinamde owo okûdu uwem ebịghi. Enye ama enyene kpukpru ibọrọ emi ke ini enye ekekpepde Bible ye Mme Ntiense Jehovah. Ke ini enye ekedide isua 74, enye ama ayak uwem esie ọnọ Jehovah Abasi. Ke ini ẹbụpde enye se in̄wamde enye aka iso ọyọ usọn̄ ye unana nsọn̄idem, enye esidọhọ: “Jehovah edi odudu mi. Enye edi ‘ọkpọsọn̄ ubọk’ mi. Ntak edi oro ‘mfiakde ndi obufa ke usen ke usen’!”—Deuteronomy 3:24; 2 Corinth 4:16.