Dzo kpo yi emenuwo dzi

Dzo kpo yi emenu bubu dzi

Yehowa Ɖasefowo

Eʋegbe

Nu Ka Tae Mielɔ̃na Wodoa Ʋu Na Mi O?

Nu Ka Tae Mielɔ̃na Wodoa Ʋu Na Mi O?

Susu masɔmasɔ siwo le amewo si

Nyakpakpa: Yehowa Ðasefowo menoa atike o eye womedea kɔdzi hã o.

Nyateƒea: Míedia dɔdamɔnu nyuitɔ kekeake na míawo ŋutɔwo kple míaƒe ƒometɔwo. Ne míaƒe lãme gblẽ la, míeyia ɖɔkta siwo bi ɖe atikewɔwɔ kple dɔwɔwɔ na ame ʋumazamazãe me la gbɔ. Míekpɔa ŋudzedze ɖe ale si wowɔ ŋgɔyiyi le atikewɔnyawo mee ŋu. Le nyateƒe me la, dɔwɔwɔ na amewo ʋumazamazãe ƒe mɔnu si woto vɛ la le vi ɖem na ame geɖewo le nuto ɖe sia ɖe me. Le dukɔ geɖewo me la, dɔnɔ ate ŋu atiae be yeaƒo asa na afɔku siwo le ʋudodo na ame me, abe ʋumedɔlékuiwo, dɔlélenutsiŋutete ƒe dɔmawɔmawɔ nyuie kple ɖɔktawo ƒe vodadawo ene me.

Nyakpakpa: Yehowa Ðasefowo xɔe se be xɔse ate ŋu ada gbe le dɔnɔ ŋu.

Nyateƒea: Míexɔ xɔsegbedada dzi se o.

Nyakpakpa: Ebia ga geɖe be woawɔ atike na ame ʋumazamazãe.

Nyateƒea: Atikewɔwɔ na ame ʋumazamazãe megblẽa ga o. *

Nyakpakpa: Ðasefo geɖewo, tsitsiawo kple ɖeviwo siaa, kuna ƒe sia ƒe le esi wogbe be woagado ʋu na yewo o ta.

Nyateƒea: Kpeɖodzi mele nya sia ŋu o. Zi geɖe la, amekolawo wɔa dɔ sesẽwo abe ame ƒe dzi koko, ƒunukpeƒekoko kple ame bubu ƒe ŋutinuwo dede na ame bubu ene ʋumazamazãe. * Zi geɖe la dɔnɔwo, siwo dome ɖeviwo hã le, siwo womedo ʋu na o la hayana ko abe ame siwo wodo ʋu na ene alo hayana nyuie wu wo gɔ̃ hã. * Aleke kee nyaa ɖale o, ame aɖeke mate ŋu agblɔ kple kakaɖedzi be dɔnɔ si melɔ̃ wodo ʋu nɛ o la aku alo atsi agbe ne elɔ̃ wodo ʋu nɛ o.

Nu ka tae Yehowa Ðasefowo melɔ̃na wodoa ʋu na wo o?

Míaƒe subɔsubɔdzixɔsewoe bia esia tso mía si ke menye esi mímedi be woawɔ atike na mí o tae o. Nubabla Xoxoa kple Nubabla Yeyea siaa de se eme kɔ ƒãa be míatsri ʋu. (1 Mose 9:⁠4; 3 Mose 17:10; 5 Mose 12:23; Dɔwɔwɔwo 15:28, 29) Tsɔ kpe ɖe eŋu la, Mawu bua ʋu be etsi tre ɖi na agbe. (3 Mose 17:14) Eya ta míedoa ʋu o be míatsɔ aɖee afia be míeɖoa to Mawu ahade bubu eya ame si nye Agbenala la ŋu.

Wotrɔ susu

Woate ŋu awɔ dɔ sesẽwo na dɔnɔwo ʋumazamazãe

Ɣeaɖeɣi va yi la, atikewɔlawo bua dɔdamɔnu siwo me womedoa ʋu na ame le o, siwo wogayɔna be atikewɔwɔ ʋumazamazãe be enye dɔdamɔnu si gbɔ eme, eye wobunɛ kura gɔ̃ hã be enye ameɖokuiwuwu, gake le ƒe ʋɛ siwo va yi me la, womegabunɛ nenema o. Le kpɔɖeŋu me, le ƒe 2004 me la, nyati aɖe si wota ɖe magazine aɖe si ƒo nu tso atikeŋutinunya gblɔ be, dɔdamɔnu siwo woto vɛ be woatsɔ ada dɔ na dɔnɔ siwo nye Yehowa Ðasefowo la ava nye dɔdamɔnu siwo ŋu dɔ woawɔ na ame sia ame le ƒe siwo gbɔna me. * Nyati aɖe si dze le magazine aɖe (Heart, Lung and Circulation) me le ƒe 2010 me la gblɔ be “menye Yehowa Ðasefowo koe wòle be woazã dɔdamɔnu si nye ‘dɔwɔwɔ na ame ʋumazamazãe’ na o, ke boŋ ele be wòanye dɔdamɔnu vevitɔ si wòle be woazã le amekoko ɖe sia ɖe me.”

Fifia la, ɖɔkta akpe geɖewo le dɔdamɔnu siwo nana be ʋu meɖuɖuna le ame ŋu fũu o la ŋu dɔ wɔm tsɔ le dɔ sesẽwo wɔm na dɔnɔwo ʋumazamazãe le xexea me godoo. Wole dɔdamɔnu sia si me wozãa atikewo ɖe ʋu teƒe le la ŋu dɔ wɔm le dukɔ madeŋgɔwo hã me, eye dɔnɔ geɖe siwo menye Yehowa Ðasefowo o hã biana be woazã dɔdamɔnu sia na yewo.

^ mm. 8 Kpɔ Transfusion and Apheresis Science, Volume 33, No. 3, p. 349.

^ mm. 10 Kpɔ The Journal of Thoracic and Cardiovascular Surgery, Volume 134, No. 2, pp. 287-288; Texas Heart Institute Journal, Volume 38, No. 5, p. 563; Basics of Blood Management, p. 2; and Continuing Education in Anaesthesia, Critical Care & Pain, Volume 4, No. 2, p. 39.

^ mm. 10 Kpɔ The Journal of Thoracic and Cardiovascular Surgery, Volume 89, No. 6, p. 918; kple Heart, Lung and Circulation, Volume 19, p. 658.

^ mm. 14 Continuing Education in Anaesthesia, Critical Care & Pain, Volume 4, No. 2, page 39.