Dzo kpo yi emenuwo dzi

Dzo kpo yi emenu bubu dzi

Yehowa Ɖasefowo

Eʋegbe

Yehowa Ðasefo Nenie Le Xexea Me Godoo?

Yehowa Ðasefo Nenie Le Xexea Me Godoo?

Ƒe 2015 Subɔsubɔƒea * Ƒe Akɔntabubu

Yehowa Ðasefo siwo le xexea me godoo

8,220,105

Hamewo

118,016

Anyigba siwo dzi Yehowa Ðasefowo ɖea gbeƒã le

240

Aleke miebua miaƒe hameviwo ƒe xexlẽme?

Ame siwo gblɔa Mawu Fiaɖuƒe ŋuti nya nyuia ɣleti sia ɣleti koe míebua Yehowa Ðasefowoe. (Mateo 24:14) Esia lɔ ame siwo xɔ nyɔnyrɔ zu Ðasefowo kple ame siwo le gbeƒãɖeɖedɔa wɔm togbɔ be womekpɔ xɔ nyɔnyrɔ haɖe o hã ɖe eme.

Ðe wòle be ame nadzɔ home aɖe hafi woaxɔe ɖe haa mea?

Ao. Míenɔa te ɖe ga si ame aɖe dzɔ dzi bunɛ Ðasefo, dea dɔ aɖe asi nɛ alo naa mɔnukpɔkpɔ aɖee le míaƒe habɔbɔa me o. (Dɔwɔwɔwo 8:18-20) Enye nyateƒe hã be le ga siwo wodzɔna ƒe akpa gãtɔ gome la, ame aɖeke menyaa ame siwo tututu dzɔ wo o. Ðasefo ɖe sia ɖe zãa eƒe ɣeyiɣi, ŋusẽ kple nunɔamesiwo tsɔ doa alɔ míaƒe xexea me katã ƒe dɔa le eya ŋutɔ ƒe didi kple nɔnɔmewo nu.2 Korintotɔwo 9:7.

Aleke miewɔna nyaa ame siwo ɖea gbeƒã edziedzi ƒe xexlẽme?

Ɣleti sia ɣleti la, Ðasefowo naa akɔnta tso gbeƒãɖeɖedɔ si wowɔ la ŋuti na woƒe hame siwo me wole. Ame sia ame ŋutɔe lɔ̃na faa naa akɔnta sia.

Woƒoa akɔntabubu siawo katã nu ƒu ɖona ɖe alɔdzedɔwɔƒe si le woƒe dukɔa me. Alɔdzedɔwɔƒe ɖe sia ɖe ɖoa woƒe dukɔa ƒe akɔntabubua ɖe míaƒe Dɔwɔƒegã.

Le subɔsubɔƒe ɖe sia ɖe ƒe nuwuwu la, * wodea dzesi Ðasefowo ƒe agbɔsɔsɔ gbogbotɔ siwo kpɔ gome le dɔa me le dukɔa me le ƒe ma me. Wotsɔa dukɔ vovovo siawo katã tɔ ƒoa ƒu tsɔ bua Ðasefo siwo le xexea me godoo la ƒe xexlẽme. Woŋlɔa dukɔ ɖe sia ɖe ƒe akɔntabubuwo hekpe ɖe nuteƒekpɔkpɔ siwo su wo si le gbeƒãɖeɖedɔa me ŋuti nyatakakawo ɖe Yehowa Ðasefowo Ƒe Ƒegbalẽ me. Nyatakaka siawo dea dzi ƒo na mí abe ale si ko nyatakaka mawo tɔgbi de dzi ƒo na Kristotɔ gbãtɔwo ene.Dɔwɔwɔwo 2:41; 4:4; 15:3.

Ðe miexlẽa ame siwo dea ha kple miaƒe habɔbɔa evɔ womeɖea gbeƒã o la hã?

Togbɔ be míexlẽa ame siawo de Yehowa Ðasefowo me o hã la, míexɔa wo atuu. Wo dometɔ akpa gãtɔ dea Kristo ƒe ku ƒe Ŋkuɖodzi si míewɔna ƒe sia ƒe la, míeɖea Ðasefowo ƒe xexlẽme le wɔna sia teƒe valawo ƒe xexlẽme me eye míenyaa ame agbɔsɔsɔme si menye Ðasefowo o siwo de ha kpli mí la ƒe xexlẽme va se ɖe afi aɖe ya teti. Le ƒe 2015 me la, ame siwo de Ŋkuɖodzia ƒe xexlẽmee nye 19,862,783.

Míaƒe Biblia-sɔsrɔ̃ ƒe ɖoɖoa ɖea vi na ame geɖe siwo medea míaƒe kpekpeawo o. Le ƒe 2015 me la, míewɔ Biblia-nusɔsrɔ̃ 9,708,968 ɣleti sia ɣleti, eye le wo dometɔ aɖewo gome la, ame gbogbo aɖewoe míesrɔ̃a nu kple zi ɖeka.

Nu ka tae dziɖuɖu ƒe akɔntabubuwo ɖenɛ fiana be Yehowa Ðasefowo sɔ gbɔ wu ale si miebui?

Dziɖuɖudɔwɔƒe siwo kpɔa amexexlẽnyawo gbɔ biaa gbe amewo, eye wonɔa te ɖe subɔsubɔha siwo me ameawo be yewole dzi bua woƒe akɔntawo. Le kpɔɖeŋu me, le Amerika la, Amexexlẽdɔwɔƒea gblɔ be, yewoƒe “gbebiamewo ƒe taɖodzinue nye be yewoanya ne ame siwo wobia gbee bua wo ɖokuiwo be yewole subɔsubɔha aɖe me,” eye wògblɔ ƒo eta be, “yewoƒe akɔntabubuwo nɔa te ɖe amewo ŋutɔ ƒe nyagbɔgblɔ dzi, ke menye ɖe kpeɖodzi aɖeke dzi o.” Gake míawo ya ame siwo ɖea gbeƒã na ame bubuwo eye wonaa gbeƒãɖeɖedɔa ŋuti kɔnta ko míebuna be wonye Yehowa Ðasefowo, ke menye ame siwo ŋutɔ gblɔna be yewonye Ðasefowo la ko o.

^ mm. 2 Subɔsubɔƒea dzea egɔme tso September 1 va se ɖe ƒe si kplɔe ɖo ƒe August 31. Le kpɔɖeŋu me, ƒe 2015 ƒe subɔsubɔƒea dze egɔme tso September 1, 2014 va se ɖe August 31, 2015.

^ mm. 16 Subɔsubɔƒea dzea egɔme tso September 1 va se ɖe ƒe si kplɔe ɖo ƒe August 31. Le kpɔɖeŋu me, ƒe 2015 ƒe subɔsubɔƒea dze egɔme tso September 1, 2014 va se ɖe August 31, 2015..