Dzo kpo yi emenuwo dzi

Nu Kae Nye Biblia-nusɔsrɔ̃?

Nu Kae Nye Biblia-nusɔsrɔ̃?

Yehowa Ðasefowo wɔa Biblia-nusɔsrɔ̃ kple amewo. Nyabiase gbogbo siwo ŋu woɖona na amewo ne wole Biblia srɔ̃m kpli wo la dometɔ aɖewoe nye:

  • Ame kae nye Mawu?

  • Ðe Mawu tsɔa ɖe le eme nam vavãa?

  • Nu kae mawɔ be nye srɔ̃ɖeɖe nanyo ɖe edzi?

  • Aleke mawɔ akpɔ dzidzɔ le agbe me?

Àkpɔ nya siwo amewo lɔ̃a biabia ku ɖe míaƒe Biblia-nusɔsrɔ̃ ƒe ɖoɖoa ŋu la ƒe ŋuɖoɖowo le ete.

Aleke Míewɔa Biblia-nusɔsrɔ̃ae? Míedzroa nyatiwo abe “Mawu” alo “srɔ̃ɖeɖe” ene me, eye míedzroa mawunyakpukpui vovovo siwo ku ɖe nyatiwo mawo ŋu la me. Ne míetsɔ mawunyakpukpui siawo sɔ kple wo nɔewo la, míedea dzesi nu si Biblia ƒe akpa vovovowo gblɔ tso tanyaa ŋu, eye to mɔ sia dzi la míenana Biblia ŋutɔ ɖea eɖokui gɔme.

Agbalẽ si míezãna tsɔ srɔ̃a Biblia lae nye Nuka Tututue Nye Biblia ƒe Nufiafia? Nyati siwo me agbalẽ sia ɖe wo me kɔ nyuie la dometɔ aɖewoe nye nu si tututu Biblia gblɔ tso Mawu, Yesu kple míaƒe etsɔme ŋu.

Ho nenie woxɔna ɖe Biblia-nusɔsrɔ̃ ta? Womexɔa ga ɖe nusɔsrɔ̃ kple nusrɔ̃gbalẽa ta o.

Ɣeyiɣi didi kae nusɔsrɔ̃ ɖeka xɔna? Ame geɖewo ɖoa gaƒoƒo abe ɖeka ene ɖi míetsɔ srɔ̃a Biblia kpli wo kwasiɖa sia kwasiɖa. Gake míetea ŋu trɔa asi le ɣeyiɣi ƒe didimea ŋu faa. Míate ŋu ava le ɣeyiɣi si nèdi la dzi.

Ðoɖo ka dzie míazɔ ɖo ne mebia be miava srɔ̃ Biblia kplim? Ne èbia be woava srɔ̃ Biblia kpli ye la, Yehowa Ðasefo aɖe ava gbɔwò le afi si sɔ na wò kple ɣeyiɣi si sɔ na wò la me. Ðasefoa atsɔ miniti ʋɛ aɖewo afia ale si míesrɔ̃a Biblia kple amewoe la wò. Ne edzɔ dzi na wò la, ke àte ŋu ayi nusɔsrɔ̃a dzi.

Ne melɔ̃ be woanɔ Biblia srɔ̃m kplim la, ɖe esia abia be mava zu Yehowa Ðasefoa? Ao. Edoa dzidzɔ na Yehowa Ðasefowo be yewoafia Biblia amewo, gake míezinɛ ɖe ame aɖeke dzi gbeɖe be wòaɖo míaƒe haa me o. Ke boŋ míegblɔa Biblia me nyawo na amewo ameŋububutɔe, eye míenyae be gome le ame sia ame si be wòanɔ subɔsubɔha si eya ŋutɔ lɔ̃ la me.1 Petro 3:15.