Lɔlɔ̃nu faa nudzɔdzɔ si Yehowa Ðasefowo nana koŋue míetsɔ kpɔa míaƒe gbeƒãɖeɖedɔa dzi. Womedzɔa ga le amewo si le míaƒe kpekpewo me o, eye womebiana tso hameviwo si be woana nu ewolia o. (Mateo 10:7, 8) Ke boŋ wodaa nudzɔɖakawo ɖe míaƒe kpekpewɔƒewo, ale be ame sia ame si lɔ̃ faa be yeadzɔ nu la nate ŋu adzɔe. Womeyɔa nudzɔlawo ƒe ŋkɔwo o.

Susu si tae nudzɔdzɔawo tea ŋu dea míaƒe gazazãwo nu la dometɔ ɖekae nye be míexea fe na hakplɔla aɖeke o. Tsɔ kpe ɖe eŋu la, womexea fe na Ðasefowo ɖe gbeƒãɖeɖe tso aƒe me yi aƒe me ta o, eye míaƒe tadeaguƒewo hã le kpokploe.

Míezãa nudzɔdzɔ siwo woɖona ɖe Yehowa Ðasefowo ƒe alɔdzedɔwɔƒewo tsɔ doa alɔ ame siwo dzi dzɔdzɔmefɔkuwo dzɔ ɖo, míaƒe dutanyanyuigblɔlawo kple dzikpɔla mɔzɔlawo, tsɔ tua míaƒe tadeaguƒeawo le dukɔ siwo me nuwo mede amewo dzi le o me, tsɔ taa Biblia kple Kristotɔwo ƒe agbalẽwo, eye nudzɔdzɔ mawo kee míetsɔ ɖoa agbalẽwo ɖe dukɔ vovovowo me.

Ame sia ame ŋutɔe tsoa nya me ne adzɔ nu atsɔ akpe asi ɖe woƒe hamea ŋu loo alo xexea me katã ƒe dɔa ƒe gazazãwo ŋu alo atsɔ kpe asi ɖe evea siaa ŋu. Hame ɖe sia ɖe ɖea gbeƒãa gakɔnta na hameviwo edziedzi.