Dzo kpo yi emenuwo dzi

Poliswo Nɔ Joseph Ŋu

Poliswo Nɔ Joseph Ŋu

Ne Yehowa Ðasefoe nènye la, ɖe wòva susu me na wò kpɔ be poliswo nakɔ wò ɖe woƒe ʋu me nànɔ gbeƒã ɖem tso aƒe me yi aƒe mea? Nu siae dzɔ ɖe Joseph dzi le Micronesia le ƒe 2017 me. Eya kple Ðasefo etɔ̃ bubuwo nɔ gbeƒãɖeɖedɔ tɔxɛ aɖe wɔm le ƒukpo tsoabo aɖewo dzi.

Le ŋdɔ ga 12 me lɔƒo la, Ðasefo eneawo va ɖo ƒukpo sue aɖe si me nɔlawo ƒe xexlẽme anɔ abe 600 ene la dzi. Esi Ðasefoawo va ɖo la, dudzikpɔlaa do wòezɔ na wo le ƒua ta. Joseph gblɔ nu si dzɔ emegbe la ale: “Dudzikpɔlaa gblɔ be yeate ŋu ana polisʋu aɖe nakɔ mí ayi aƒeawo katã me. Esia wɔ nuku na mí ŋutɔ, gake míeɖe eme nɛ bubutɔe be nenɔ anyi ko. Ðeko míedi be míayi ameawo gbɔ tso aƒe me yi aƒe me abe ale si ko míewɔnɛ ɣesiaɣi ene.”

Eya ta gbeƒãɖelawo to afɔ be yewoayi ameawo gbɔ heɖoe kplikpaa be yewoaƒo nu na ame geɖe ale si nu yewoate ŋui. Ðasefoawo gblɔ be: “Ameawo xɔ mí nyuie eye wotsɔ ɖe le míaƒe gbedeasia me ŋutɔ. Esia wɔe be míenɔ aƒeawo me wòdidi wu ale si míekpɔ mɔe.”

Emegbe le ŋkekea me la, polisʋu aɖe va to Joseph ŋu zi eve, eye esi wògava yina zi etɔ̃lia la, etɔ ɖe eŋu. Polis siwo nɔ ʋua me la bia Joseph nenye be yewoate ŋu akui ayi aƒe siwo me mekpɔ de haɖe o la me. Joseph gblɔ nu si va dzɔ la ale: “Meɖo eŋu be ao. Gake fifia ya la, wogbe gbidii hegblɔ be, ‘Ɣeyiɣi kpui aɖe koe susɔ na wò, eya ta míaku wò ayi aƒe siwo susɔ la me.’ Nyemete ŋu gagbe ake o, elabena aƒe geɖe susɔ siwo me nyemekpɔ yi haɖe o. Ne míele aƒe aɖe gbɔ ɖom la, polis-awo yɔa aƒea me tɔwo ƒe ƒomeŋkɔ nam eye wogblɔ be ne meƒo ʋɔa eye womedo o la, yewoaku kpẽ na wo ale be woado.

“Le woƒe kpekpeɖeŋu sia ta la, míete ŋu de aƒeawo katã me gbe ma gbe. Míema agbalẽ gbogbo aɖewo eye míewɔ ɖoɖo be míagatrɔ ayi ame siwo tsɔ ɖe le gbedeasia me la gbɔ.”

Polis-awo gblɔ na Joseph be ‘edzɔ dzi na yewo ŋutɔ be yewo hã yewote ŋu kaka nya nyuia.’ Le ɣeɖoto esime Ðasefoawo nɔ dzodzom la, polis-awo nɔ alɔgbɔnu kom na wo esime wolé míaƒe Biblia-srɔ̃gbalẽawo ɖe asi henɔ asi ʋuʋum tsɔ nɔ hedenyuie dom na wo.