Yehowa Ðasefo siwo le Bulgaria le dɔ dzi vevie le nyateƒe si ku ɖe Mawu kple eƒe Nya, Biblia ŋu fiam amewo. Eye tso ƒe 2000 me kea, Ðasefo gbogbo aɖewo ʋu tso dukɔ bubuwo me yi vae le asi kpem ɖe gbeƒãɖeɖedɔa ŋu le afi ma. Kuxi kawoe ame ate ŋu ado goe ne etiae be yeaʋu ayi duta avae ɖe gbeƒã? Viɖe kawoe doa go tsoa eme? Se nya siwo ame aɖewo siwo ʋu yi Bulgaria gblɔ ɖa.

 Darren si tso England gblɔ be: “Enye míaƒe didi be míavae subɔ le duta afi si hiahiã geɖe le. Esi meɖe Dawn la, míeʋu yi London be míavae kpe asi ɖe Russiagbe dolawo ƒe ƒuƒoƒo aɖe ŋu. Míewɔa ɖoɖo enuenu be míaʋu ayi duta avae ɖe gbeƒã, gake le susu aɖewo ta, ɖoɖoawo medzea edzi o. Esia na míena ta kloe elabe míesusui be maganya wɔ o, gake mía xɔlɔ̃ aɖe kpe ɖe mía ŋu míekpɔe be ale si míaƒe nɔnɔmeawo le fifia, anya wɔ be míavae subɔ le duta.” Darren kple Dawn te dukɔ siwo me gbeƒãɖela geɖe wu hiã lea didi ale be woaʋu ayi. Le ƒe 2011 mea, woʋu yi Bulgaria.

 Dzidzɔ si ame siwo ʋu yi xexea ƒe akpa bubuwo le subɔsubɔdɔa ta kpɔna la ʋã ame siwo meɖoe nenema tsã o la be woawo hã woaɖo taɖodzinu ma. Giada kple Luca nye atsu kple asi siwo le Italy. Giada gblɔ be: “Medo go Ðasefo dovevienu aɖewo siwo ʋu yi Anyiehe Amerika kple Afrika eye wotsɔ dzidzɔ le gbeƒãɖeɖedɔa wɔm. Woƒe nuteƒekpɔkpɔwo kple dzidzɔ si gbegbe kpɔm wolea wɔ dɔ ɖe dzinye ŋutɔ. Esia kpe ɖe ŋunye megbugbɔ ŋku lé ɖe taɖodzinu siwo le asinye le Yehowa subɔsubɔ me la ŋu.”

 Tomasz kple Veronika ʋu tso Czech Republic yi Bulgaria le ƒe 2015 me kple wo vi eve siwo ŋkɔe nye Klara kple Mathias. Nu kae ʋã wo woʋu yi Bulgaria? Tomasz ɖe eme be: “Míebu ame siwo ʋu yi duta, siwo dome míaƒe ƒometɔ aɖewo hã le la ƒe kpɔɖeŋuwo ŋu. Esi míede ŋugble le dzidzɔ si kpɔm wole ŋua, esia wɔ dɔ ɖe mía dzi eye míeɖoa dze tso eŋu ɖekae le míaƒe ƒomea me.” Ƒome kpɔ dzidzɔ sia le gbeƒã ɖem fifia le Bulgaria ƒe dugã si nye Montana me.

 Linda nye Ðasefo bubu si ʋu yi Bulgaria. Egblɔ be: “Ƒe aɖewo va yia, mezɔ mɔ yi Ecuador, eye mekpɔ Ðasefo aɖewo siwo ʋu va afi ma le gbeƒãɖeɖedɔa ta. Esia na mebu eŋu be ɖewohĩ gbe ɖeka, nye hã mate ŋu avae subɔ le afi si hiahiã geɖe wu le.” Petteri kple Nadja siwo nye atsu kple asi si tso Finland hã de ŋugble le ame siwo vae subɔ le duta ƒe kpɔɖeŋuwo ŋu. Wogblɔ be: “Nɔvi siwo vae subɔ le afi si hiahiã geɖe le eye nuteƒekpɔkpɔ geɖe su wo si la le míaƒe hamea me. Woƒoa nu tso dzidzɔ si wokpɔ esime woƒo wo ɖokui ɖe subɔsubɔdɔ sia wɔwɔ me la ŋu ɣesiaɣi. Wogblɔ be ɣeyiɣi mawoe nye ɣeyiɣi siwo yewokpɔ dzidzɔ wu le yewoƒe agbe me.”

 Ðoɖo nyui wɔwɔ le vevie ne ame aɖe di be yeavae subɔ le duta. (Luka 14:28-30) Nɔvinyɔnu Nele si tso Belgium gblɔ be: “Esi meva nɔ eŋu bum vevie be mavae subɔ le dutaa, ɣemaɣie medo gbe ɖa hedze nuxexlẽ tso eŋu le míaƒe agbalẽwo me. Mede ŋugble le nu siwo mexlẽ la ŋu eye mekpɔe ɖa be dzadzraɖo kawoe mate ŋu awɔ hã.”

 Kristian kple Irmina siwo tso Poland la le Bulgaria ƒe asieke kple edzivɔ. Wokpɔe be eɖe vi na yewo ŋutɔ esi yewonɔ Bulgariagbe dolawo ƒe ƒuƒoƒo aɖe me le yewo de Poland hafi ʋu va Bulgaria. Nɔvi siwo le ƒuƒoƒoa mea de dzi ƒo na wo eye wokpe ɖe wo ŋu wosrɔ̃ Bulgariagbea. Kristian kple Irmina gblɔ be: “Míeva kpɔe be ne ame aɖe tsɔ eɖokui na Yehowa Mawu hewɔ dɔ nɛ la, ekpɔa amea ƒe nuhiahiãwo gbɔ nɛ. Esia wɔ nuku ŋutɔ. Ne èlɔ̃ faa gblɔ na Yehowa be, ‘Nyee nye esi! Dɔm!’ la, Yehowa akpe ɖe ŋuwò nàwɔ nu siwo mèsusui gɔ̃ hã be yeate ŋu awɔ hafi o.”—Yesaya 6:8.

 Reto kple Cornelia nye atsu kple asi aɖe siwo tso Switzerland. Be woate ŋu awɔ ɖoɖo nyuie eye woate ŋu adzra ga ɖo be woate ŋu aʋu yi dutaa, wotiae be yewoanɔ agbe tsɛ. Wogblɔ be: “Ƒe ɖeka do ŋgɔ hafi míaʋu ayi Bulgaria, míeyi afi ma kwasiɖa ɖeka gbã, ale be míanya ale si nuwo le le dukɔa me. Esi míeyi la, míekpɔ atsu kple asi dovevienu aɖe siwo nye dutanyanyuigblɔlawo eye woɖo aɖaŋu nyui aɖewo na mí.” Reto kple Cornelia wɔ ɖe aɖaŋuɖoɖo mawo dzi eye wole subɔsubɔm le Bulgaria fifia ƒe 20 kple edzivɔe nye esia.

 Ele be ame siwo ʋu yi dukɔ bubuwo me la natrɔ ɖe nɔnɔmeawo ŋu le afi ma. Eye ɣeaɖewoɣia, esia menɔa bɔbɔe o. (Dɔwɔwɔwo 16:9, 10; 1 Korintotɔwo 9:19-23) Kuxi gã aɖe si wodoa goe ye nye gbe yeye sɔsrɔ̃. Luca si ŋu míeƒo nu tsoe va yi la gblɔ be: “Edzɔa dzi na mí ne míeɖo nya ŋu tso dzi me le kpekpeawo me. Gake ɣeyiɣi aɖee nye esia, esesẽna na nye kple srɔ̃nye be míadzra ɖo ɖe nyaŋuɖoɖo kpuitɔ kekeake gɔ̃ hã ŋu le Bulgariagbe me. Ðeko wòle abe ɖeviwoe míeganye ene. Ðevi siwo le míaƒe hamea me ƒe nyaŋuɖoɖo gɔ̃ hã nyo sãsãsã wu mía tɔ.”

 Ravil si tso Germany gblɔ be: “Gbe yeye sɔsrɔ̃ tea ɖeɖi ame ŋu ŋutɔ. Gake enuenua, megblɔna na ɖokuinye be, ‘Mègatsi dzi fũu akpa o, vivivia, àva nyae. Ne èda vo gɔ̃ hã, mègatsɔe vevie o.’ Mebua kuxi siwo medoa goe la hã be wonye nye Yehowa subɔsubɔ ƒe akpa aɖe.”

 Linda si ŋu míeƒo nu tsoe va yia gblɔ be: “Nyemetea ŋu srɔ̃a gbe yeye o. Bulgariagbe sɔsrɔ̃ menɔ bɔbɔe nam kura o, ewɔna nam zi geɖe be madzudzɔ esɔsrɔ̃. Ne èle amewo dome evɔ màte ŋu ado woƒe gbe alo ase nya siwo gblɔm wole gɔme oa, ɖeko nàtsi akogo. Gake be nye kple Yehowa dome nayi edzi anɔ kplikplikplia, mesrɔ̃a nu le Swedengbe me. Vivivi esi nɔviawo kpe ɖe ŋunyea, fifia metea ŋu doa Bulgariagbea.”

 Kuxi bubue nye be aƒe dzroa ame siwo ʋu yi duta la vevie. Elabe ame siawo gblẽ wo xɔlɔ̃wo kple ƒometɔwo ɖe wo de. Nɔvinyɔnu Eva kple srɔ̃a Yannis ʋu yi Bulgaria. Nɔvinyɔnua gblɔ be: “Le gɔmedzedzea mea, mese le ɖokuinye me be metsi akogo. Be mate ŋu anɔ te ɖe seselelãme ma nua, míeyɔa mía xɔlɔ̃ kple ƒometɔ siwo gbɔ míedzo le la edziedzi ɖoa dze, eye míedze xɔlɔ̃ yeyewo le Bulgaria hã.”

 Kuxi bubu hã gali. Robert kple Liana siwo ʋu tso Switzerland gblɔ be: “Bulgariagbea dodo, tɔtrɔ ɖe woƒe dekɔnuwo kple ale si yame fãna míamíamía ŋu la menɔ bɔbɔe na mí o.” Gake esi atsu kple asi sia metsɔ susu ɖo kuxi siawo ŋu o taa, woyi edzi tsɔ dzidzɔ le subɔsubɔm le Bulgaria ƒe 14 sɔŋ nye esia.

 Lilly kafu subɔsubɔ le afi si hiahiã geɖe le la ŋutɔ. Egblɔ be: “Subɔsubɔ le duta kpe ɖe ŋunye megava nya Yehowa nyuie ɖe edzi, si ɖewohĩ manɔ alea ne ɖe nyemeva afi sia o. Esi mezãa ɣeyiɣi geɖe le gbeƒãɖeɖedɔa me taa, ekpe ɖe ŋunye mete ɖe Yehowa ŋu wu. Esia na mele dzidzɔ kpɔm eye nye dzi dze eme ŋutɔ.” Srɔ̃a Ravil hã lɔ̃ ɖe nya sia dzi. Egblɔ be: “Esiae nye tiatia nyuitɔ kekeake si míewɔ le agbe me. Ena míeva nya mía nɔvi dovevienu siwo tso dukɔ vovovowo me, siwo si Biblia me nyateƒea fiafia amewo ƒe nuteƒekpɔkpɔ geɖe le. Mesrɔ̃ nu geɖe tso wo gbɔ.”

 Ale si nɔvi siawo lɔ̃ faa tsɔ wo ɖokuiwo na le subɔsubɔdɔ sia me la wɔe be wote ŋu le gbeƒã ɖem “Fiaɖuƒe ŋuti nya nyui sia le anyigba blibo la katã dzi.” (Mateo 24:14) Esi wolɔ̃ faa ʋu vae subɔ le Bulgaria la, wokpɔ ale si Yehowa na woƒe dzimedidiwo va eme, eye woƒe ɖoɖowo dze edzi.—Psalmo 20:1-4.