Dzo kpo yi emenuwo dzi

Dzo kpo yi emenu bubu dzi

Yehowa Ɖasefowo

Eʋegbe

Wowɔ Dɔ Kple Yehowa Ðasefowo Le Warwick

Wowɔ Dɔ Kple Yehowa Ðasefowo Le Warwick

Ale si Yehowa Ðasefowo tsɔ wo ɖokuiwo na faa le asi kpem ɖe xɔtudɔ si le edzi yim le Warwick ŋu la wɔ nuku na ame geɖe. Dɔwɔƒe aɖe si de dziƒoxɔliamɔ̃awo ƒe amegã gblɔ na dɔwɔlawo dometɔ ɖeka be: “Dɔ siwo gbegbe wɔm mia tɔwo lea wɔ nu ku ŋutɔ. Egbea ame geɖe melɔ̃na be yewoawɔ dɔ eye womaxe fe aɖeke na yewo o.”

Esi aƒetɔ sia kple ame bubuwo se be ame siwo va le dɔ wɔm le Yehowa Ðasefowo ƒe xexea me katã ƒe dɔwɔƒe gã si tum wole le Warwick, New York, dometɔ akpa gãtɔ nye lɔlɔ̃nu faa dɔwɔlawo la, wobu be Ðasefo siwo le nutoa me koe ava nɔ dɔ wɔm le kwasiɖanuwuwuwo. Ewɔ nuku na wo esi wokpɔ ame siwo tso dukɔa ƒe akpa vovovowo, eye woɖe asi le woƒe dɔwɔɖuiwo ŋu va le asi kpem ɖe dɔa ŋu hena ɣleti alo ƒe geɖe.

Kaka ƒe 2015 nawu enu la, Ðasefo lɔlɔ̃nu faa dɔwɔla siwo ade 23,000 sɔŋ ye wɔ dɔ kple United States Betel ƒomea me tɔ aɖewo le Warwick xɔtuƒea. Tsɔ kpe ɖe eŋu la, wohaya xɔtudɔwɔla siwo ade 750, siwo menye Yehowa Ðasefowo o, wowɔ dɔ le afi ma be dɔa nate ŋu awu enu ɖe game dzi. Nu siwo teƒe xɔtudɔwɔla siawo kpɔ esi wowɔ dɔ ɖekae kple Yehowa Ðasefowo la wɔ dɔ ɖe wo dometɔ geɖe dzi ŋutɔ.

Wowɔa Dɔ Le Ŋutifafa Me

Dɔwɔƒe aɖe si wɔa fesrewo kple xɔ ŋu dɔ bubuwo dzikpɔla gblɔ be: “Nɔnɔme nyui siwo Ðasefoawo ɖe fia la wɔ nuku na míaƒe dɔwɔvi siwo katã wɔ dɔ kpli wo. Ema koŋ tae mía dometɔ geɖe míedi be míayi edzi awɔ dɔ le afi sia.”

Dɔwɔƒe bubu aɖe hã ƒe dɔwɔlawo va kpe asi ɖe xɔdɔmewo tutu ŋu. Esi dɔwɔƒe ma ƒe dɔwo wu enu la, dɔwɔlaawo dometɔ etɔ̃ ɖoe be yewoayi edzi awɔ dɔ le Warwick. Eya ta woɖe asi le dɔ ŋu le dɔwɔƒe ma heva dze dɔwɔwɔ na dɔwɔƒe bubu si gakpɔtɔ le dɔ wɔm le afi ma.

Kristotɔwo ƒe nɔnɔme nyui siwo Ðasefoawo ɖe fia kpɔ ŋusẽ nyui ɖe dɔwɔlawo dometɔ aɖewo dzi. Ŋutsu aɖe wɔ dɔ na dɔwɔƒe si ɖo gɔmeɖoanyi na xɔawo. Esi wòwɔ dɔ le Warwick ɣleti aɖewo megbe la, srɔ̃a kpɔe be ale si wòƒoa nu kple ale si wòwɔa nu le aƒe me la trɔ kura. Nyɔnua tsɔ dzidzɔ gblɔ be: “Ei, ame te ŋu trɔna alea!”

“Ðasefo Nyɔnuawo Le Vava Ge”

Ðasefo siwo wɔa dɔ le xɔtudɔwɔƒea dometɔ geɖe nye nyɔnuwo. Wokua bɔsuwo, dzraa xɔwo me ɖo, eye wowɔa ɔfis dɔwo hã. Gake menye emawo koe o, wo dometɔ aɖewo fiaa mɔ ʋuwo, kua katapilawo, tsiãa Internet kawo, wɔa tsi dzodzo toƒewo, wɔa dɔ le gliwo ŋu, dea pɔmpiwo, eye wowɔa kɔnkreti dɔwo hã. Wowɔa dɔ sesẽ ŋutɔ.

Xɔgbala aɖe si menye Ðasefo o de dzesii be ne Ðasefo ŋutsuwo kple wo srɔ̃wo ɖi le ʋu me yina xɔtuƒea la, woléa wo nɔewo ƒe asi. Ema wɔ dɔ ɖe edzi. Ekpɔe be nyɔnuawo hã doa vevie nu le dɔa wɔwɔ me. Egblɔ be: “Àte ŋu abui gbã be ɖeko nyɔnuawo kplɔ wo srɔ̃wo ɖo ko. Gake ne dɔ ɖo edzi la, wowɔnɛ ŋutɔ! Mewɔ dɔ le xɔtuƒe geɖe le New York City, gake nyemekpɔ naneke teƒe alea kpɔ o.”

Le ƒe 2014 kple 2015 ƒe vuvɔŋɔli la, xexea me fa wu gbɔgblɔ, eya ta adzro ame be yeanɔ xɔ me tsɔ wu be yeanɔ vuvɔa nu le gota ŋkeke bliboa anɔ dɔ wɔm. Ðasefo aɖe si ŋkɔe nye Jeremy, eye wònye xɔtudɔa dzikpɔlawo dometɔ ɖeka gblɔ be: “Le ŋkeke siwo dzi vuvɔa nu sẽna ŋutɔ la, dɔwɔla siwo ɖoa xɔwo gɔme anyi ƒe amegã ɖeka va bianam be, ‘Miaƒe Ðasefo nyɔnuawo le vava ge etsɔa?’

“‘Ɛ̃.’

“‘Esiwo nɔa gota nɔ mɔ fiam ʋuwo hã?’

“‘Ɛ̃.’

“Egblɔ emegbe be yegblɔna na yeƒe dɔwɔlawo be ele be woava dɔme elabe Ðasefo nyɔnuawo gɔ̃ hã le vava ge!”

Dɔa Dzɔ Dzi Na Bɔsukulawo

Wohaya bɔsukula siwo wu 35 be woanɔ lɔlɔ̃nu faa dɔwɔlaawo kɔm tso woƒe nɔƒewo va Warwick.

Gbe ɖeka hafi woadze mɔ la, ʋuawo dometɔ ɖeka kula tso dze ŋgɔ ame siwo le ʋua me. Egblɔ be, “Mi Ðasefowo kɔkɔ yi dɔme dzɔa dzi nam ŋutɔ. Meɖe kuku miɖo e-mail ɖe nye dɔtɔ miagblɔ nɛ be wòana manɔ miawo ɖeɖe ko kɔm. Miefia nu geɖem tso Biblia ŋu. Hafi míado go la, nyemenya Mawu ƒe ŋkɔ o, eye nyemenya be paradiso aɖeke ava anyigba dzi o. Fifia nyemegavɔ̃a ku hã o. Edzɔ dzi nam ŋutɔ be mɔnukpɔkpɔ nyui sia su asinye. Gbe si gbe nyemayi dɔme o la, miakpɔm le Fiaɖuƒe Akpata me.”

Ðasefo aɖe si ŋkɔe nye Damiana, si wɔ dɔ le Warwick xɔtuƒea, gblɔ be: “Esi míeɖo ʋua gbe ɖeka la, míaƒe ʋukulaa gblɔ na mí be nya aɖe le ye si na mí. Egblɔ be Ðasefo siwo katã yekɔna yia míaƒe xɔtudɔwɔƒe vovovo siwo le New York gakɔna wo gbɔnae la ade 4,000 sɔŋ. Eƒe numenya aɖewoe nye esi: ‘Gbagbãƒewo le ame sia ame ŋu, gake mieŋea aɖaba ƒua mia nɔewo ƒe gbɔdzɔgbɔdzɔwo dzi hewɔa dɔ aduadu. Esia wɔ dɔ ɖe dzinye ŋutɔ.’ Egblɔ hã be dzeɖoɖo kpli mí dzɔa dzi na ye.

“Esi wòwu eƒe nyaa nu la, Ðasefo siwo nɔ ʋua me la dometɔ ɖeka biae be, ‘Ne míele ha dzim la, edzɔa dzi na wòa?’

“Eko nu eye wògblɔ be, ‘Ɛ̃! Miate ŋu adzi ɖewo fifia laa. Míatsɔ 134 * lia adze egɔmea?’”

^ mm. 22 Hadzidzi 134 lia si le hadzigbalẽ si nye Midzi Ha Na Yehowa me ƒe tanyae nye “Kpɔ Ðokuiwò Le Xexe Yeyea Me.” Eku ɖe dzidzɔ si ame siwo anɔ Mawu ƒe xexe yeyea me akpɔ ŋu.