Dzo kpo yi emenuwo dzi

Dzo kpo yi emenu bubu dzi

Yehowa Ɖasefowo

Eʋegbe

Wotu Takpexɔ Yeye Ðe Amazon-vewo Me

Wotu Takpexɔ Yeye Ðe Amazon-vewo Me

Yehowa Ðasefowo tu Takpexɔ nyakpɔ aɖe ɖe Amazon-vewo me. Anyigba agbleka 128 si dzi wotu takpexɔa ɖo le Manaus, si nye du aɖe le Brazil ƒe dziehe me la ƒe akpa gãtɔ nye avewo sɔŋ. Xevi dɔlɔbɔ nyakpɔ vovovowo nɔa xɔxlɔ̃m le Braziltɔwo ƒe ati nyakpɔ siwo woyɔna be cupuaçu kple ati bubuwo tame. Nu ka tae wònye afi siae woatu Takpexɔa ɖo?

Manaus-du si didi tso Amazon-tɔsisia ƒe azizã nu gbɔ abe kilometa 1,450 ene la me tɔwo ade ame miliɔn eve kloe. Ðasefo 7,000 siwo le Manaus kple eƒe nutowo me kpakple esiwo le Amazon-tɔsisia ƒe nutowo me la woe azã takpexɔ yeye sia. Du si le didiƒe wue nye São Gabriel da Cachoeira, ele Manaus ƒe ɣetoɖoƒe eye wòdidi tso takpekpewɔƒea gbɔ kilometa 800 kple edzivɔwo. Ðasefo aɖewo nɔa tɔdziʋu me ŋkeke etɔ̃ hafi tea ŋu vaa takpekpe le afi sia!

Takpexɔ sia tutu le Amazon ƒe nuto sia me menye dɔ fenu kura o. Ehiã be woalɔ xɔtunu gago 13 kple meli tso Santos habɔ si le São Paulo ato Brazil ƒuta ava ɖo Amazon Tɔsisia nu hafi alɔ wo ayi dɔa wɔƒe.

Takpekpewɔƒe yeye siae nye takpexɔ 27 lia si wotu le Brazil. Ame 1,956 ye de takpexɔa nu ʋuʋu ƒe wɔnawo teƒe le Kwasiɖa, May 4, 2014. Dzi dzɔ vavalawo dometɔ geɖe wu gbɔgblɔ, elabe emae nye zi gbãtɔ wode takpekpe le takpexɔ me.

Vavalawo te ŋu se nuƒolawo ƒe nyawo eye wote ŋu kpɔ wo hã. Esia nye tɔtrɔ dodzidzɔname aɖe. Elabe tsã la, wowɔa takpekpewo le dutoƒo afi siwo vavala akpa gãtɔ metea ŋu kpɔa nuƒolanɔƒea kaka woahayi nuƒolawo kpɔ ge o. Ðasefo aɖe gblɔ be, “Mede takpekpe ƒe geɖe, gake nyemete ŋu kpɔ Biblia ƒe drama wɔlawo ŋutɔ kpɔ o; ɖeko mesea woƒe gbe.” Fifia ame sia ame tea ŋu kpɔa nuƒolanɔƒea nyuie.