Le August 2013 me la, Yehowa Ðasefo siwo le Philippines ɖo taɖodzinu vevi aɖe gbɔ esime wowu Fiaɖuƒe Akpata 1,000 lia tutu nu le du sia me. Abe ale si wòle le dukɔ geɖewo me ene la, ga alo xɔtutu ƒe nuteƒekpɔkpɔ si hiã mele hame siwo le Philippines la dometɔ akpa gãtɔ me tɔwo si be woawo ŋutɔwo natu Fiaɖuƒe Akpata na wo ɖokuiwo o. Ƒe geɖewoe nye esia, wo dometɔ aɖewo kpena le wo nɔviwo ƒe aƒewo me, eye bubuwo hã kpena le pamproxɔ suewo me.

Ale si Yehowa Ðasefowo yi edzi nɔ agbɔ sɔm ɖe edzi le Philippines kple dukɔ bubuwo me wɔe be wova hiã Fiaɖuƒe Akpata geɖe wu. Eya ta Yehowa Ðasefowo ƒe Dɔdzikpɔha wɔ ɖoɖo aɖe le ƒe 1999 me be woanɔ Fiaɖuƒe Akpatawo tum na wo nɔvi siwo le dukɔ siwo dzi ganyawo mede o la me. Le ɖoɖo sia nu la, Yehowa Ðasefo siwo woatu Akpata siawo na ŋutɔ dzɔa ga siwo woate ŋui eye wotsɔa ga siwo wo nɔvi siwo le dukɔ bubuwo me dzɔ la kpena ɖe eŋu hetua tadeaguƒe siawo na wo. Woma xɔtudɔwɔla siwo wona hehee la ɖe ƒuƒoƒowo me eye wokpena ɖe hameawo me tɔwo ŋu wotua woawo ŋutɔwo ƒe Fiaɖuƒe Akpatawo. Le November 2001 me la, wodze ɖoɖo sia si wowɔ na Ðasefowo le dukɔ vovovowo me la gɔme le Philippines.

Iluminado nye Marilao hame si le Bulacan, afi si wotu Fiaɖuƒe Akpata 1,000 lia le la me tɔ. Egblɔ be: “Mekpɔ Kristotɔwo ƒe nɔvilɔlɔ̃ vavã teƒe. Ame gbogbo aɖewo tsɔ wo ɖokuiwo na, ŋutsuwo kple nyɔnuwo, ɖeviwo kple tsitsiawo siaa. Míewɔ dɔ ɖekae le ŋdɔkutsu dzatsɛ. Togbɔ be ɖeɖi te mía ŋu le ŋkekea ƒe nuwuwu hã la, dzidzɔ gã aɖee wònye na mí esi míekpɔ dɔ si gbegbe míewɔ.”

Ale si wotsɔ wo ɖokuiwo na faa wɔ dɔ sia la wɔ dɔ ɖe ame siwo menye Yehowa Ðasefowo hã dzi. Ŋutsu aɖe si ƒe ʋuwo lɔa ƒutake kple kpekuiwo na mí la gblɔ be: “Miawo ya ɖeko miele abe ɖeɖiwo ene—míede ha kpaŋkpaŋ! Ame sia ame le asi kpem ɖe dɔa ŋu. Nyemekpɔ nu sia tɔgbi teƒe kpɔ o.”

Fiaɖuƒe Akpata si nu wowu

Lɔlɔ̃nu faa dɔwɔla siawo wu dɔa nu le kwasiɖa ade pɛ ko me. Fiaɖuƒe Akpata tutu kaba alea wɔe be hamea me tɔwo gate ŋu trɔ ɖe dɔ vevitɔ si nye gbeƒãɖeɖe Mawu Fiaɖuƒe ŋuti nya nyuia la ŋu bliboe.Mateo 24:14.

Ellen, si nye hame ma me tɔ bubu gblɔ be: “Míaƒe Fiaɖuƒe Akpata tsãtɔa medea mía nu o, ame geɖe tsia gota. Gake Fiaɖuƒe Akpata yeyea nya kpɔ ŋutɔ, eye míenɔa anyi le dziɖeɖi me si wɔe be mɔfiame kple dzideƒonamenya siwo míesena le míaƒe kpekpeawo me la ɖea vi na mí katã.”