Dzo kpo yi emenuwo dzi

Dzo kpo yi emenu bubu dzi

Yehowa Ɖasefowo

Eʋegbe

Wokpɔ Wɔna Aɖe To Internetikadodowo Dzi Le Xexea Me Godoo

Wokpɔ Wɔna Aɖe To Internetikadodowo Dzi Le Xexea Me Godoo

Le Memleɖa, October 5 kple 6, 2013 la, ame 1,413,676 siwo nye dukɔ 21 me tɔwo kpɔ gome le Watch Tower Bible and Tract Society of Pennsylvania ƒe ƒe sia ƒe takpekpe 129 lia me. Le ɣeyiɣi aɖe megbe le kwasiɖanuwuwu ma ke la, wogaɖe wɔnaa na Ðasefo geɖewo wokpɔ. Esia wɔe be ame siwo katã kpɔ gome le wɔnaa me ƒe agbɔsɔsɔ va le ame 1,413,676 le dukɔ 31 me. Ƒe sia me ƒe kpekpe siae nye gãtɔ kekeake si Yehowa Ðasefowo wɔ kpɔ, ame siwo kpɔ gome le eme sɔ gbɔ wu ame 1,327,704 siwo kpɔ wɔna tɔxɛ aɖe le Mexico kple Titina Amerika le April 28, 2013.

Tso ƒe 1920 ƒe ƒeawo me la, Yehowa Ðasefowo toa telefon-kadodowo kple radiodɔwɔƒe geɖewo dzi nana ame siwo ƒo ƒu le takpekpewɔƒe bubuwo le duta nɔa woƒe takpekpeawo me nyawo sem enumake. Gake egbea internet va wɔe be takpekpevala siwo le teƒe saɖeagawo gɔ̃ hã tea ŋu sea takpekpeawo me nyawo hekpɔa wɔnawo enumake alo le ɣeyiɣi ʋɛ aɖe megbe. Yehowa Ðasefo aɖe si ŋkɔe nye William, si le United States (États-Unis), de takpekpe aɖe le Richmond, Virginia le ƒe 1942 me eye wòse takpekpea me nyawo to telefon-kadodo dzi. Esi wòtsɔ mɔ si dzi wòto se takpekpewɔna ma sɔ kple ƒe sia me ƒe ƒe sia ƒe takpekpe ƒe wɔnawo la, egblɔ be: “Esi menɔ wɔna kpɔm tẽe taa, mesrɔ̃ nu geɖewo wu. Esia nyo wu sãsãsã.”

Ame siwo wɔa dɔ le Yehowa Ðasefowo ƒe alɔdzedɔwɔƒewo dometɔ geɖe nɔ dɔ wɔm tso internetikadodo sia ŋu ƒe ɖeka kple ɣleti aɖewo eye wozã gaƒoƒo akpe geɖewo. Le kwasiɖanuwuwu si amewo akpɔ gome le takpekpea me to internetikadodowo dzi la, mɔ̃ɖaŋudɔwɔlawo nɔ xɔ aɖe me le Brooklyn le New York nɔ internetikadodoa dzi kpɔm eye ame aɖe nɔa afi ma le ɣeyiɣi siwo katã me woɖe takpekpewɔna le teƒe siwo ƒe game to vovo na wo nɔewo gaƒoƒo 15 me. Ryan si hã wɔ dɔ tso internetikadodoa ŋu eye wònɔ mɔ̃a gbɔ be yeakpɔ egbɔ be nu sia nu yi edzi nyuie la gblɔ be: “Alɔ̃ tsi mía ŋu, gake míebui vevie o elabe míenyae be ele vi ɖe ge na ame gbogbo aɖewo.”

Wole wɔnaa kpɔm le Katherine si le Dziehenyigba dzi le Australia (Australie)