Dzo kpo yi emenuwo dzi

Dzo kpo yi emenu bubu dzi

Yehowa Ɖasefowo

Eʋegbe

Dɔdzikpɔha De Dzi Ƒo Na Ðasefo Siwo Le Russia Kple Ukraine

Dɔdzikpɔha De Dzi Ƒo Na Ðasefo Siwo Le Russia Kple Ukraine

“Míese le mía ɖokui me be woɖe lɔlɔ̃ gã fia mí!” Alea nyɔnu aɖe si le Ukraine gblɔ esi Yehowa Ðasefowo ƒe Dɔdzikpɔha me tɔ Stephen Lett xlẽ lɛta vevi aɖe wòse la megbe. Eya hã nɔ Ðasefo 165,000 siwo se Nɔviŋutsu Lett ƒe nyawo esi wòva dukɔ ma me le May 10 kple 11, 2014 ƒe kwasiɖanuwuwu la dome.

Woɖe nuƒo siwo wotu ɖe Biblia dzi kple lɛtaa gɔme ɖe gbegbɔgblɔ atɔ̃ me eye amewo nɔ Fiaɖuƒe Akpata siwo ade 1,100 me see le Ukraine godoo.

Le kwasiɖanuwuwu ma ke la, Dɔdzikpɔhaa me tɔ bubu si ŋkɔe nye Mark Sanderson hã xlẽ lɛtaa na nɔvi siwo kpɔ gome le wɔna sia tɔgbi me le Russia godoo. Woɖe wɔnaa me ɖe gbegbɔgblɔ 14 me, eye ame 180,413 siwo le hame 2,500 kple edzivɔ me la hã kpɔ gome le wɔnaa me to internet-kadodowo dzi le Belarus kple Russia.

Dɔdzikpɔhaa la ŋlɔ lɛta sia na hame siwo katã le Russia kple Ukraine. Nɔviŋutsu Sanderson xlẽ lɛtaa le Russiagbe me, eye esia na Russia alɔdzedɔwɔƒea ŋlɔ bena: “Ale si Dɔdzikpɔhaa tsɔ ɖe le eme na nɔvi siwo le xexea ƒe akpa sia la wɔ dɔ ɖe nɔviawo dzi ale gbegbe. Mí katã míese le mía ɖokuiwo me abe ɖe Dɔdzikpɔhaa wɔ atuu gã aɖe na mí ene.”

Ðe woŋlɔ lɛta sia be woatsɔ afa akɔ na Ðasefo siwo le nuto siwo me dunyahehe me zitɔtɔ le edzi yim le ahado ŋusẽ wo. Woxlɔ̃ nu nɔviawo be woayi edzi akpɔ egbɔ be yewomenye “xexea ƒe akpa aɖeke o,” eye woaƒo asa na nudede dunyahehe me.—Yohanes 17:16.

Be woate ŋu awɔ esia la, Dɔdzikpɔhaa de dzi ƒo na Ðasefoawo be woanɔ gbe dom ɖa, anɔ nu srɔ̃m ahanɔ ŋugble dem tso Mawu ƒe Nya ŋu ale be ƒomedodo sẽŋu nakpɔtɔ anɔ wo kple Yehowa dome. Woɖo ŋku edzi na nyaselawo hã be dodokpɔ ka kee woɖado goe o, woate ŋu aka ɖe Mawu ƒe ŋugbedodo sẽŋu si le Yesaya 54:17 dzi, kpukpui sia gblɔ be: “Lãnu sia lãnu si woatu ɖe ŋuwò la madze edzi o.”

Dɔdzikpɔhaa ƒo lɛtaa ta be: “Míelɔ̃ mi vevie. Mika ɖe edzi be míebua mia ŋu ɣesiaɣi eye míedoa gbe ɖa ɖe mia ta.”

Yehowa Ðasefowo ƒe alɔdzedɔwɔƒe si le Ukraine gblɔ tso ale si Dɔdzikpɔhaa me tɔa va kpɔ wo ɖa la ŋu be: “Beléname, lɔlɔ̃ kple ɖetsɔleme si Dɔdzikpɔhaa ɖe fia nɔviawo la na woƒe nu ku. Ale si Nɔviŋutsu Lett kple Nɔviŋutsu Sanderson va Ukraine kple Russia le kwasiɖanuwuwu ɖeka ma ke me la ɖo kpe ɖekawɔwɔ si le Mawu ƒe amewo dome la dzi eye wòna nɔviwo kpɔ ale si gbegbe Yehowa kple Yesu léa be na woe la dze sii. Mí katã míelɔ̃ ɖe edzi be wova ɖe ɣeyiɣi nyuitɔ dzi, eye esia do ŋusẽ mí be míayi edzi asubɔ Yehowa eɖanye nɔnɔme sesẽ kawoe míado goe o.”