Dzo kpo yi emenuwo dzi

Atlanta Xɔ Yehowa Ðasefowo Atuu

Atlanta Xɔ Yehowa Ðasefowo Atuu

“Mekafu miaƒe habɔbɔa me tɔwo ɖe ale si mietsɔa didi vevie wɔa dɔ na Mawu fiaɖuƒe la dzonɔamemetɔe la ta. Míekpɔa ŋudzedze gã aɖe ɖe miaƒe agbagbadzedzewo kple nu nyui siwo miewɔna wòɖea vi na mia nɔvi Yehowa Ðasefowo kple nutoa me tɔwo siaa la ŋu.”

Esia nye lɛta si Aƒetɔ Kasim Reed, si nye Atlanta-du si le Georgia le Amerika ƒe dudzikpɔla, ŋlɔ na Yehowa Ðasefowo la me nya aɖewo. Eŋlɔ lɛta sia tsɔ do wòezɔ na takpekpe gã etɔ̃ siwo Yehowa Ðasefowo wɔ le du ma me la valawo.

Nenema ke Atlanta Dudzikpɔha ɖe gbeƒã nya aɖe tsɔ do wòezɔ na takpekpevalawo. Egblɔ be: “Yehowa Ðasefo miliɔn enyi kloe le xexea me, mienye . . . gbegbɔgblɔ alafa geɖe dolawo . . . gake taɖodzinu ɖekae le mia si . . . [Eyae nye be] miedi be yewoade bubu Yehowa, Biblia ƒe Mawu la, ame si nye nuwo katã Wɔla la ŋu.”

Wowɔ takpekpe etɔ̃ siawo le July kple August 2014 me le du sia me, wowɔ eve le Eŋlisigbe me eye wowɔ ɖeka le Spaingbe me. Takpekpevalawo tso dukɔ 28 ya teti me, eye wonɔ Eŋlisigbe me takpekpeawo gɔme ɖem ɖe Russiagbe kple Japangbe me enumake ale be wòaɖe vi na takpekpea vala siwo doa gbe siawo. Takpekpe etɔ̃awo katã valawo ƒe xexlẽmee nye 95,689.

Le ƒe 2014 me la, Yehowa Ðasefowo wɔ dukɔwo dome takpekpe 24 le dukɔ asieke me, wowɔ wo dometɔ 16 le United States (États-Unis) ƒe teƒe vovovowo.