Dzo kpo yi emenuwo dzi

Dzo kpo yi emenu bubu dzi

Yehowa Ɖasefowo

Eʋegbe

Biblia Ŋutinyawo Gbalẽa Va Ðo Sukuwo Me

Biblia Ŋutinyawo Gbalẽa Va Ðo Sukuwo Me

Nye Agbalẽ si Nye Biblia Ŋutinyawo si gɔme woɖe ɖe Pangasinangbe me heɖe ɖe go le ƒe 2012 me la le kpekpem ɖe sukuvi siwo doa gbe sia ŋu le Philippines. Agbalẽ sia sɔ nyuie ŋutɔ na nufiafia, elabe Philippines Sukudenyawo Dzi Kpɔƒe de se be woafia nu ɖeviwo le wo degbe me le gɔmedzesukuwo me.

Esi wònye be gbe 100 kple edzivɔwoe wodona le Philippines ta la, ɣeyiɣi didi aɖee nye ema woʋlia nya le degbe si me woafia nu ɖeviawo le la ŋu. Le ƒe 2012 me la, Sukudenyawo Dzi Kpɔƒea gblɔ be “eɖea vi wu ne wofia nu ɖeviwo le gbe si wodona le aƒe me la me.” Esia wɔe be wova ɖo “Nufiafia Le Degbe Vovovowo Me” ƒe ɖoɖoa anyi.

Pangasinangbe nye gbe siwo wotia la dometɔ ɖeka. Gake kuxi aɖe li. Woka nya ta be sukutatɔ aɖe gblɔ be agbalẽ xexlẽ ʋɛ aɖewo koe sukuviawo ate ŋu akpɔ le Pangasinangbe me. Eya ta esi Yehowa Ðasefowo ɖe Nye Agbalẽ si Nye Biblia Ŋutinyawo ɖe go le woƒe nutome gã takpekpe si wowɔ le gbegbɔgblɔ ma me le November 2012 me la, ɖeko wòsɔ ta.

Wota agbalẽ sia ƒe agbɔsɔsɔme si ade 10,000 be woama le takpekpewo me. Dzi dzɔ ɖeviawo kple wo dzilawo siaa esi woxɔ agbalẽ sia le wo degbe me. Atsu kple asi aɖe gblɔ be: “Mía viwo lɔ̃a agbalẽ sia ƒe nya gbɔ, elabena wosea egɔme nyuie.”

Le takpekpea megbe teti la, Ðasefo ʋɛ aɖewo tsɔ Biblia Ŋutinyawo gbalẽa yi suku aɖe le Dagupan City. Dzi dzɔ nufiala siwo nɔ afi ma esi wokpɔ agbalẽ sia, elabe wonɔ Pangasinangbe me gbalẽ siwo woatsɔ afia nu sukuviawo la dim. Woma agbalẽ 340 kple edzivɔwo le sukua me. Nufialawo te agbalẽ sia zazã tsɔ le nuxexlẽ fiam ɖeviawo le wo degbe me enumake.

Enye dzidzɔ na Yehowa Ðasefowo be wole agbalẽ sia zãm tsɔ le nu fiam ɖeviwo le wo degbe me. Míaƒe gbegɔmeɖela aɖe si kpɔ gome le Biblia Ŋutinyawo gbalẽa gɔme ɖeɖe me la gblɔ be: “Míekpɔ ale si wòle vevie be woaɖe agbalẽwo gɔme ɖe degbewo me be woaɖo amewo ƒe dzi gbɔ la dze sii tso gbe aɖe gbe ke. Esia tae Ðasefowo kua kutri ɖea Biblia kple Biblia-srɔ̃gbalẽwo gɔme ɖe gbegbɔgblɔ alafa geɖewo me ɖo.”