Dzo kpo yi emenuwo dzi

Kpekpeɖeŋunana Ŋkunɔ Siwo Le Afrika

Kpekpeɖeŋunana Ŋkunɔ Siwo Le Afrika

Le dukɔ siwo me nu mede amewo dzi le o dometɔ aɖewo me la, mɔnukpɔkpɔ mesua ŋkunɔwo alo ŋkuagbãtɔwo si abe ale si wòle le teƒe bubuwo ene o. Ɣeaɖewoɣi la, amewo ƒoa asa na wo eye womenaa kpekpeɖeŋu siwo wohiã be woanɔ te ɖe agbemekuxiwo nu la wo o. Ame siwo kpɔa nu ya mehiãa kpekpeɖeŋu siawo o. Le kpɔɖeŋu me, ate ŋu asesẽ na ŋkunɔwo be woazɔ ayi asi me aɖaƒle nu, woaɖo ʋu alo woanya ga ƒe home. Nuxexlẽ hã ate ŋu anye kuxi na wo. Menye wo katãe tea ŋu xlẽa ŋkunɔwo ƒe agbalẽ o. Ne wonya exexlẽ gɔ̃ hã la, ate ŋu asesẽ na wo be woakpɔ ŋkunɔwo ƒe agbalẽ le wo degbe me.

Ƒe alafa ɖeka kple edzivɔe nye esia Yehowa Ðasefowo taa Biblia-srɔ̃gbalẽwo na ŋkunɔwo. Nyitsɔ laa la, Yehowa Ðasefowo tsɔ ŋkunɔwo ƒe agbalẽtamɔ̃ kple agbalẽblamɔ̃ tso Netherlands (Pays-Bas) yi Malawi ale be woate ŋu ata ŋkunɔwo ƒe agbalẽwo le Chichewagbe si wodona le du ma me la me.

Leo, si bi ɖe ŋkunɔgbalẽwo tata me la, zɔ mɔ tso Yehowa Ðasefowo ƒe alɔdzedɔwɔƒe si le Brazil yi Malawi. Efia ale si wozãa mɔ̃awo kple kɔmpiutaɖoɖo aɖe si wotsɔ ŋlɔa ŋkunɔgbalẽwo si Ðasefowo ŋutɔ to vɛ la ame atɔ̃ aɖewo. Kɔmpiutaɖoɖoa trɔa nuŋɔŋlɔawo wozua Chichewagbe me ŋkunɔwo ƒe nuŋɔŋlɔ. Hafi mɔ̃a zãlawo nate ŋu awɔ dɔ sia la, ehiã be woatrɔ asi le nuŋɔŋlɔwo tɔtrɔ ƒe dɔwɔnu aɖe si dzi ŋɔŋlɔdzesi siwo míezãna kple Chichewa-ŋkunɔgbe me nuŋlɔdzesiwo siaa le la ŋu. Dɔwɔnu sia tea ŋu trɔa agbalẽawo me nyawo ɖe ŋkunɔwo ƒe ŋɔŋlɔdzesiwo me eye wòtrɔa asi le agbalẽawo ŋu ale gbegbe be wo xexlẽ nɔa bɔbɔe na ŋkunɔwo. Kpɔ nya siwo ŋkunɔ siwo le Malawi la dometɔ aɖewo gblɔ tso woƒe ŋkunɔgbalẽwo ŋu la ɖa.

Munyaradzi nye ɖetugbui ŋkuagbãtɔ aɖe si kpɔa eya ŋutɔ ƒe radiodziwɔna aɖe dzi le kwasiɖa ƒe ŋkeke aɖewo dzi. Ezãa gaƒoƒo 70 ɣleti sia ɣleti tsɔ fiaa Biblia amewo. Egblɔ be: “Tsã la, wonaa Eŋlisigbe me ŋkunɔgbalẽwom, esi mexɔ mía degbe me tɔwo la, wolé dzi nam ŋutɔ. Mekpɔ ŋudzedze gã aɖe ɖe agbagba siwo nɔvinye Ðasefowo dze te ŋu wɔ ŋkunɔgbalẽwo le mía degbea me na mí la ŋu ŋutɔ. Esia nana mesena le ɖokuinye me be womeŋlɔ mí be o, eye wodea asixɔxɔ mía ŋu.”

Francis nye Ðasefo aɖe si le Malawi ƒe dziehe. Esi wònye ŋkuagbãtɔe wònye ta la, amewoe xlẽa nuwo nɛ tsã. Esi wòxɔ Chichewagbe me ŋkunɔgbalẽ gbãtɔ la, edo ɣli be: “Drɔ̃e kum melea? Esia wɔ nuku loo!”

Loyce, si hã nye ŋkunɔ alo ŋkuagbãtɔ la zãa ɣeyiɣi geɖe tsɔ fiaa Biblia amewo. Ekpe ɖe ame 52 ŋu wotrɔ woƒe agbenɔnɔ heva zu ame ɖɔʋuwo. Aleke wòwɔnɛ? Ne ele nu fiam amewo la, ezãa ŋkunɔgbalẽwo evɔ eƒe nusrɔ̃viwo ya zãa míaƒe agbalẽ siwo ame siwo kpɔa nu zãna. Yehowa Ðasefowoe taa agbalẽ siawo katã.

Loyce le Biblia srɔ̃m kple ame aɖe

Leo, nufiala si tso Brazil si ƒe nya míegblɔ va yi gblɔ be: “Ne metsɔ Biblia-srɔ̃gbalẽ siwo le ŋkunɔgbewo me na ŋkunɔwo eye mekpɔ ale si wowɔa nui ne wode dzesii be agbalẽawo le yewoƒe gbe me la, enaa dzidzeme gã aɖem. Wo dometɔ geɖe da akpe na Yehowa eye wogblɔ dzidzɔ si gbegbe wònye na wo be mɔnukpɔkpɔ su wo si be woawo ŋutɔ woate ŋu adzra ɖo ɖe Kristotɔwo ƒe kpekpewo kple gbeƒãɖeɖedɔa ŋu. Womegakpɔa ame aɖeke si nu be wòaxlẽ agbalẽawo na yewo o. Fifia woƒe ɖokuisinusɔsrɔ̃ nye ɖokuisinusɔsrɔ̃ vavã. Woate ŋu akpe ɖe woƒe ƒomewo ŋu nyuie be woasẽ ŋu le mawusubɔsubɔ me. Agbalẽ siawo kpena ɖe wo ŋu be wo kple Yehowa dome nanɔ kplikplikpli wu.”