“Enya se ŋutɔ, ewɔa dɔ ɖe ame dzi ale gbegbe, eye agbe le eme.”

“Enana mekpɔa ɖokuinye le Biblia me nudzɔdzɔ si xlẽm melea me.”

“Esese mati wò kpɔ gbeɖe o! Nyemese Biblia xexlẽ aɖeke wòwɔ dɔ ɖe dzinye alea gbegbe kpɔ o.”

Nya siawo tɔgbi sɔŋ ye ame siwo se Mateo ƒe agbalẽ si woxlẽ lé ɖe mɔ̃ dzi le Eŋlisigbe me heda ɖe jw.org la gblɔna.

Yehowa Ðasefowo xlẽ Biblia lé ɖe mɔ̃ dzi le Eŋlisigbe me zi gbãtɔ le ƒe 1978 me. Esi ƒeawo va nɔ yiyim la, woxlẽ Biblia bliboa alo eƒe akpa aɖe lé ɖe mɔ̃ dzi le gbegbɔgblɔ 20 bubuwo me.

Esi woɖe Xexe Yeye Gɔmeɖeɖe Biblia yeyea ɖe go le Eŋlisigbe me le ƒe 2013 me la, eva hiã be woagbugbɔ axlẽe alé ɖe mɔ̃ dzi. Gake to vovo na esi wolé ɖe mɔ̃ dzi va yi, si ame etɔ̃ pɛ ko xlẽ la, ame vovovowoe axlẽ bibliameme 1,000 kple edzivɔawo dometɔ ɖe sia ɖe ƒe numenyawo le yeyetɔa ya me.

Ame vovovowo ƒe gbe sese le nuxexlẽa me kpena ɖe ame ŋu be wòanɔ Biblia me nudzɔdzɔawo kpɔm ɖaa le susu me. Togbɔ be womewɔe abe Biblia xexlẽ ƒe drama, si me haƒoƒo kple gbeɖiɖi bubuwo ɖina le ene o hã la, ale si wowɔe la de agbe Biblia me nudzɔdzɔawo me le mɔ ɖedzesi aɖe nu.

Ebia ɖoɖo nyui wɔwɔ be ame gbogbo mawo naxlẽ Biblia ƒe akpa vovovoawo. Gbãa, ele be woaku nu me anya ame si le nu ƒom le mawunyakpukpui aɖe me, nu si eƒe nyaawo fia, kple seselelãme si wòtsɔ gblɔe. Le kpɔɖeŋu me, ne apostolo aɖee gblɔ nyaa, gake womeyɔ eƒe ŋkɔ tẽe le mawunyakpukpuia me o la, ke ame ka ƒe gbee woazã? Ne ɖikeke dze le nyaa me la, woate ŋu agblɔ be Toma ye gblɔe; gake ne nyaawo fia be amea tsi klokloklo la, woate ŋu agblɔ be Petro ye.

Woléa ŋku ɖe ame si le nu ƒom ƒe tsitsime hã ŋu. Ahiã be ɖekakpui naxlẽ apostolo Yohanes ƒe nya siwo wògblɔ esime wònye ɖekakpui, eye ame tsitsi naxlẽ apostolo ma ke ƒe nya siwo wògblɔ esime wòzu amegãɖeɖi.

Azɔ hã, ehiã be woadi nuxlẽla bibiwo. Wotiaa wo dometɔ akpa gãtɔ tso ame siwo le subɔsubɔm le Yehowa Ðasefowo ƒe alɔdzedɔwɔƒe si le Amerika la dome. Wotiaa Nyɔ! me nyati aɖe ƒe memama ɖeka be amewo nadzra ɖo ava xlẽ ne woakpɔe ɖa be wonye nuxlẽla nyuiwo hã. Wonana woxlẽa Biblia ƒe akpa siwo nye amewo ƒe dzeɖoɖowo hã, siwo me seselelãme vovowo dzena le, abe dziku, blanuiléle, dzidzɔ, alo dziɖeleameƒo ene. Esia nana wokpɔa nuxlẽlawo ƒe ŋutete kple nu si ƒomevi woate ŋu axlẽ nyuie wu.

Ne wode akpa si wo dometɔ ɖe sia ɖe axlẽ asi nɛ vɔ la, wovaa nyaléleɖemɔ̃dzi dɔwɔƒe siwo le Brooklyn alo Patterson la dometɔ ɖeka va xlẽnɛ woléna ɖe mɔ̃ dzi. Wonana nuxexlẽdzikpɔla aɖe kpɔa egbɔ be nuxlẽlaa zã gbe si sɔ tsɔ xlẽ nua. Wotrɔa asi le agbalẽ si dzi woakpɔ axlẽ nua la ŋu etɔxɛ na nuxlẽlaa kple nuxexlẽdzikpɔlaa ale be woate ŋu ade dzesi teƒe siwo wòle be woatɔ ɖo vie alo ate gbe ɖe nyawo dzi le. Nuxexlẽdzikpɔlaa ɖoa to Eŋlisigbe me Xexe Yeye Gɔmeɖeɖe Biblia si woxlẽ lé ɖe mɔ̃ dzi va yi la be wòakpe ɖe eŋu le mɔfiamewo nana me.

Wowɔa dɔ aɖewo tso nya siwo lém wole ɖe mɔ̃a dzi la ŋu enumake ne wole elém ɖi. Be nuxexlẽa nalé vi nyuie la, ehiãna ɣeaɖewoɣi be nuxlẽlaa naxlẽ nya alo nyagbe aɖewo zi geɖe eye ame si le wo lém ɖi la natia esiwo sɔ nyuie wu la tso wo dome.

Míenya ɣeyiɣi didi si wòaxɔ hafi woalé Eŋlisigbe me Xexe Yeye Gɔmeɖeɖe Biblia si woɖe ɖe go le ƒe 2013 me la katã ɖe mɔ̃ dzi o. Gake ne woxlẽ Biblia gbalẽ aɖe vɔ la, woadae ɖe jw.org, eye dzesi si afia be Biblia gbalẽ ma ƒe odio li la adze le Biblia gbalẽa ƒe ŋkɔ gbɔ.