Odval le Mongolia. Nyɔnu sia menya eƒe ƒe tututu o, gake esusui be anye ƒe 1921 mee wodzi ye. Le eƒe ɖevime me la, ekplɔa tɔ́a ƒe lãwo, eye ƒe ɖeka pɛ ko wòde suku. Menya nuxexlẽ o. Ke hã agbalẽ aɖe si me nɔnɔmetata nyakpɔwo le la kpe ɖe eŋu wòva nya nu tso Mawu kple etsɔme dodzidzɔname si asu ame siwo ɖoa toe si la ŋu. Nya mawo wɔ dɔ ɖe edzi vevie.

Agbalẽ gbadza sia si Yehowa Ðasefowo ta le ƒe 2011 me la ƒomevi evee li. Nɔnɔmetatawo le evea siaa me, gake nuŋɔŋlɔwo sɔ gbɔ le ɖeka me wu.

Esime nuŋɔŋlɔwo sɔ gbɔ le wu lae nye Ðo To Mawu Ne Nànɔ Agbe Tegbee, eye eteƒe madidi o gbe siwo me wòle la ade 583. Eveliae nye Ðo To Mawu, ade gbegbɔgblɔ 483. Gbe siwo me woɖe agbalẽ sia ɖo la sɔ gbɔ wu Dukɔ Ƒoƒuawo Ƒe Xexea Me Katã Ƒe Amegbetɔ Ƒe Gomenɔamesi Sewo si gɔme woɖe le October 2013 me ɖe gbegbɔgblɔ 413 me. Gakpe ɖe eŋu la, agbalẽ eve siawo ƒe agbɔsɔsɔ si woma la de miliɔn 80 kloe.

Le Brazil la, nyɔnu aɖe xɔ Ðo To Mawu gbalẽa kple dzidzɔ hegblɔ be: “Enyo ŋutɔ be ame aɖewo li tsɔa ɖe le eme na ame siwo le abe nye ene. Nyemexɔ miaƒe agbalẽwo kpɔ o, elabe nyemenya nuxexlẽ o. Gake maxɔ agbalẽ gbadza sia.”

Brigitte, si menya nuxexlẽ o eye wòle France la gblɔ be: “Meléa ŋku ɖe nɔnɔmetata siwo le agbalẽa me la ŋu gbe sia gbe.”

Ðasefo aɖe si le South Africa gblɔ be: “Agbalẽ siae nye agbalẽ nyuitɔ si akpe ɖe ŋunye mafia Biblia me nyateƒea Chinatɔwo. Medzro eme kple yunivɛsitidelawo kple ame siwo menya nuxexlẽ ale o siaa, ame sia ame ƒomevi ko. Ðo To Mawu Ne Nànɔ Agbe Tegbee gbalẽa kpena ɖe ŋunye mefiaa Biblia me nufiafia veviwo amewo le ɣeyiɣi kpui aɖe me. Le gaƒoƒo afã pɛ ko me la, meɖoa nusɔsrɔ̃a anyi.”

Ðasefo siwo le Germany srɔ̃ Biblia kple atsu kple asi agbalẽnyala aɖewo. Nu siwo le agbalẽa me wɔ dɔ ɖe srɔ̃ŋutsua dzi vevie wògblɔ be: “Nu ka tae míena agbalẽ siam kaba o? Ekpena ɖe ŋunye mesea Biblia me nudzɔdzɔwo kple nyawo gɔme bɔbɔe.”

Tokunɔ aɖe si le Australia gblɔ be: “Menɔ nyɔnu saɖagaxɔmenɔlawo gbɔ le saɖagaxɔ me ƒe geɖe. Nye kple sɔlemehakplɔlawo dome le kplikplikpli. Gake wo dometɔ aɖeke mefia nu si Mawu Fiaɖuƒea nye lam o. Nɔnɔmetata siwo le agbalẽ sia me kpe ɖe ŋunye mese nya siwo le Mateo 6:10 la gɔme nyuie.”

Yehowa Ðasefowo ƒe alɔdzedɔwɔƒe si le Canada ŋlɔ bena: “Esi Sierra Leone tɔ siwo le afi sia kpɔ Kriogbe me Ðo To Mawu gbalẽa la, ewɔ dɔ ɖe wo dometɔ geɖe dzi wogblɔ be Yehowa Ðasefowo le kutri kum le Biblia me gbedeasia gblɔm na amewo vavã. Wo dometɔ aɖewo gblɔ be: ‘Miawo ya mietsɔa ɖe le eme na amewo, evɔ mele nenema le ame akpa gãtɔ gome o.’ ”