Dzo kpo yi emenuwo dzi

Dzo kpo yi emenu bubu dzi

Yehowa Ɖasefowo

Eʋegbe

TURKMENISTAN

Wode Wo Ga Le Woƒe Xɔse Ta

Wode Wo Ga Le Woƒe Xɔse Ta

Le October 22, 2014 dzi la, Turkmenistan dziɖuɖua bia be woaɖe asi le Yehowa Ðasefo enyi aɖewo siwo wolé de ga le esi wogbe be yewomaxɔ asrafo ƒe hehe o ta la ta alo esi woda alakpa ɖe wo si ta la ŋu. * Le nyateƒe me la, le September 2, 2014 dzi la, Turkmenistan dziɖuɖumegãwo ɖe asi le aƒenɔ Bibi Rahmanova si nye Yehowa Ðasefo la ŋu. *

Ale si nyawo va le edzi yim nyuie alea wɔe be Yehowa Ðasefowo ƒe Dɔdzikpɔha ŋlɔ akpedalɛta aɖe na Turkmenistan Dukplɔla tsɔ da akpe nɛ ɖe ale si wòna woɖe asi le Ðasefoawo ŋu ta. Wohe susu yi Ðasefo eve aɖewo siwo gakpɔtɔ le ga me la dzi eye wobia be woaɖe asi le woawo hã ŋu. Yehowa Ðasefowo kpɔ dzidzɔ ɖe ale si Turkmenistan dziɖuɖumegãwo bia be yewoado go alé nyawo kpɔ be woakpɔ nyawo gbɔ ale be yewoate ŋu awɔ yewoƒe amegbetɔ ƒe gomenɔamesiwo ŋu dɔ la ŋu ŋutɔ.

Bubudede Dzitsinya, Mawusubɔsubɔ Kple Mawudzixɔse Ƒe Ablɔɖe Ŋu Ƒe Nya Gale Toa Me Kokoko

Nu si gakpɔtɔ le fu ɖem mee nye be Turkmenistan dziɖuɖua gakpɔtɔ le sɔhɛ Yehowa Ðasefo siwo gbe be yewomaxɔ asrafo ƒe hehe o lém de ga. Womewɔ dukɔmevidɔ bubuwo wɔwɔ ƒe ɖoɖo aɖeke na ame siwo gbe asrafo ƒe hehexɔxɔ le dzitsinya ta o, eye woléa wo dea ga ɣleti 12 va se ɖe ɣleti 24. Eye ne woɖe asi le wo ŋu la, wogatsɔa nya ɖe ame mawo ke ŋu be wonye “sedzidala sẽtowo” eye wodea wo gaxɔ me le teƒe siwo nɔnɔmeawo sesẽ le.

Esi sɔhɛ Yehowa Ðasefo 15 aɖewo siwo gbe be yewomaxɔ asrafo ƒe hehe o le dzitsinya ta wɔ ɖe sia ɖe wòglo wo la, wotsɔ woƒe nyaa yi Dukɔ Ƒoƒuawo Ƒe Amegbetɔwo Ƒe Gomenɔamesiwo Ŋuti Kɔmiti gbɔ be wòadrɔ̃e na yewo. * Ðasefo eve bubu aɖewo siwo nu wotso alakpatɔe eye wolé wo tu kple susu be woaxe mɔ ɖe woƒe subɔsubɔdɔa nu hã tsɔ woƒe nyawo yi Kɔmiti sia gbɔ.

Le April 2012 me la, Kɔmitia ƒo nya ta esi wòlé ŋku ɖe amegbetɔwo ƒe gomenɔamesinyawo ŋu le Turkmenistan be ele be dziɖuɖua “natrɔ asi le eƒe sewo ŋu le mɔ sia mɔ nu be wòana woawɔ dɔ bubuwo ɖe asrafodɔwo teƒe. Ele be dukɔa nakpɔ egbɔ hã be sea gblɔe kɔtɛe be gome le amewo si be woagbe be yewomaxɔ asrafo ƒe hehe o.” Eyi edzi be kɔmitia de dzi ƒo na dziɖuɖua ku ɖe mawusubɔsubɔdɔwo ŋu be wòakpɔ egbɔ be “eƒe sewo kple nuwɔnawo de bubu gome si le amewo si be woakpɔ gome le woƒe subɔsubɔnuwɔnawo me ahaƒo nu tso woƒe mawudzixɔsewo ŋu na amewo abe ale si wòle le Nubablaa me ene.” Anye dzidzɔ na Ðasefo siwo le Turkmenistan la be yewoade yewoƒe subɔsubɔdɔa agbalẽ me le se nu ale be yewoate ŋu awɔ yewoƒe mawusubɔsubɔdɔwo le ŋutifafa me.

Mɔkpɔkpɔ Li Be Nuwo Ava Ka Ðe Eme

Yehowa Ðasefowo le mɔ kpɔm be afɔ siwo Turkmenistan dziɖuɖua ɖe nyitsɔ laa la ana be woade bubu amegbetɔ ƒe gomenɔamesinyawo, vevietɔ esiwo ku ɖe dzitsinya, mawusubɔsubɔ kple mawudzixɔse ƒe ablɔɖe ŋu la ŋu geɖe wu. Senyala aɖe si ʋlia Ðasefowo ta gblɔ be: “Yehowa Ðasefowo le mɔ kpɔm be numedzodzro tuameɖowo ate ŋu ana be Turkmenistan dziɖuɖua nava se nu gɔme na Ðasefowo geɖe wu eye wòana be woate ŋu alé dzitsinya nyui me ɖe asi le woƒe mawusubɔsubɔ me le dziɖeɖi me.”

Ɣeyiɣiawo

  1. May 19, 2015

    Wobu fɔ Bahram Hemdemov ɖe eƒe mawusubɔsubɔdɔwo wɔwɔ ta eye wodee ga hena ƒe ene. Wolée de ga ɣleti eve do ŋgɔ na ʋɔnudɔdrɔ̃e.

  2. February/March 2015

    Wode Ðasefo eve ga le esi wogbe be yewomaxɔ asrafo ƒe hehe o le dzitsinya ta la ta.

  3. November 18, 2014

    Wode Ðasefo eve ga le esi wogbe be yewomaxɔ asrafo ƒe hehe o le dzitsinya ta la ta.

  4. October 22, 2014

    Turkmenistan ƒe Dukplɔla tsɔ Yehowa Ðasefo enyi siwo wode ga ƒe agɔdzedze ke wo eye wòɖe asi le wo ŋu.

  5. September 30, 2014

    Ðasefo asieke le ga me—ame adre le ga me le esi wogbe be yewomaxɔ asrafo ƒe hehe o ta eye ame eve le ga me esi wotso wo nu alakpatɔe le woƒe mawusubɔsubɔdɔwo wɔwɔ ta.

  6. September 2, 2014

    Turkmenistan dziɖuɖua ɖe asi le aƒenɔ Bibi Rahmanova ŋu eye togbɔ be woka ƒe ene nɛ be wòanɔ ga me hã la, woɖe asi le eŋu hede se aɖewo nɛ be wòawɔ ɖe wo dzi.

  7. August 18, 2014

    Wotso Bibi Rahmanova nu alakpatɔe eye wobu fɔe be wòanɔ ga me hena ƒe ene.

  8. July 25, 2014

    Ðasefo adre le ga me—ame atɔ̃ le ga me esi wogbe be yewomaxɔ asrafo ƒe hehe o le dzitsinya ta la ta eye ame eve le ga me esi wotso wo nu alakpatɔe be woatsɔ ahe to na wo ɖe woƒe mawusubɔsubɔdɔwo wɔwɔ ta.

  9. April 6, 2014

    Wole Ðasefo 26 tu, wotso wo dometɔ 13 nu be wowɔ nu vlo evɔ womekpɔ kpeɖodzi aɖeke o. Wodo fe na Ðasefo 13 be woaxe.

  10. November 2013

    Yehowa Ðasefo asieke le ga me—ame enyi le ga me le esi wogbe be yewomaxɔ asrafo ƒe hehe o ta eye ame ɖeka le ga me esi wotso enu alakpatɔe le eƒe mawusubɔsubɔdɔwo wɔwɔ ta.

  11. August 29, 2013

    Ðasefo etɔ̃ tsɔ woƒe nyawo yi Amegbetɔwo Ƒe Gomenɔamesiwo Ŋuti Kɔmiti gbɔ ɖe Turkmenistan dziɖuɖua ŋu le esi wògbe be yemana asrafodɔgbegbe le dzitsinya ta ƒe gome wo o la ta.

  12. May 1, 2013

    Ðasefo eve tsɔ woƒe nyawo yi Amegbetɔwo Ƒe Gomenɔamesiwo Ŋuti Kɔmiti gbɔ ɖe Turkmenistan dziɖuɖua ŋu le esi wògbe be yemana asrafodɔgbegbe le dzitsinya ta ƒe gome wo o la ta.

  13. January 24, 2013

    Kpovitɔ blaetɔ̃ va dze aƒetɔ Navruz Nasyrlayev dzi le kwasiɖa ʋɛ aɖewo esi Amegbetɔwo Ƒe Gomenɔamesiwo Ŋuti Kɔmitia gblɔ eƒe nyametsotsoa na Turkmenistan dziɖuɖua megbe. Kpovitɔwo ƒo aƒea me tɔwo kple amedzro siwo le aƒea me la siaa enuenu.

  14. September 7, 2012

    Ðasefo ewo tsɔ woƒe nyawo yi Amegbetɔwo Ƒe Gomenɔamesiwo Ŋuti Kɔmitia gbɔ ɖe Turkmenistan dziɖuɖua ŋu le esi wògbe be yemana asrafodɔgbegbe le dzitsinya ta ƒe gome wo o la ta. Aƒetɔ Navruz Nasyrlayev ye nye ame si xɔ ŋgɔ.

  15. August 21, 2008

    Yehowa Ðasefowo bia tso Turkmenistan dziɖuɖua si be wòade yewoƒe habɔbɔa agbalẽ me le se nu.

^ mm. 6 Amegbetɔwo Ƒe Gomenɔamesiwo Ŋuti Kɔmitia léa ŋku ɖe ale si dziɖuɖuwo le wɔwɔm ɖe Dukɔwo Dome Dukɔmeviwo Kple Dunyahehawo Ƒe Gomenɔamesi Ƒe Nubabla ƒe ɖoɖowo dzi la ŋu. Turkmenistan hã zu Nubabla sia me tɔ le ƒe 1997 me eye wòda asi ɖe Nubabla Ƒe Ðoɖo Gbãtɔ Si Dukɔ Si Lɔ̃ Ate Ŋu Ade Asi Faa la dzi.