Dzo kpo yi emenuwo dzi

Dzo kpo yi emenu bubu dzi

Yehowa Ɖasefowo

Eʋegbe

AUGUST (DASIAMIME) 21, 2015
SRI LANKA

Sri Lanka Dziɖuɖumegãwo Tso Be Yewoakpɔ Mawusubɔsubɔ Ƒe Ablɔɖe Ta

Sri Lanka Dziɖuɖumegãwo Tso Be Yewoakpɔ Mawusubɔsubɔ Ƒe Ablɔɖe Ta

Sri Lanka ʋɔnudrɔ̃ƒe kɔkɔwo lɔ̃ be yewoagbugbɔ ŋku alé ɖe ŋutasẽnu siwo subɔsubɔhawo ƒe zazɛ̃nyahelawo wɔ ɖe Yehowa Ðasefowo ŋuti la ŋu. Tso ƒe 2013 me la, Buddhatɔ saɖeagaxɔmenɔlawo dzea Ðasefoawo dzi, wodoa ŋɔdzi na wo eye wodoa vlo wo. Esi kpovitɔwo mehea to na nu gbegblẽ wɔla siawo o ta la, woyi edzi nɔ ŋuta sẽm le Yehowa Ðasefowo kple subɔsubɔha sue bubuwo me tɔwo ŋu, eye esia de dzi ƒo na zazɛ̃nyahelawo be woayi woƒe ŋutasẽnuwɔnawo dzi.

Ale Si Nyawo Yi Ʋuu Va Ðo Ʋɔnudrɔ̃ƒe Kɔkɔtɔ

Le March (Tedoxe) 1, 2014 dzi la, nyɔnu Yehowa Ðasefo eve aɖewo nɔ nu ƒom tso woƒe mawudzixɔsewo ŋu na woƒe nutoa me tɔwo le Talawa (Dziehe-Titina Nuto me). Woɖe mɔ ɖe gbeƒãɖeɖe na ame bubuwo ŋu le se nu le Sri Lanka. Buddhatɔ saɖeagaxɔmenɔla eve aɖewo tso wo nu alakpatɔe na kpovitɔwo be “wole amewo dzi zim be woado le woƒe subɔsubɔha me.” Kpovitɔawo lé nyɔnu eve siawo yi woƒe dɔwɔƒe eye kpovitɔawo kple nunɔlaawo do vlo wo le afi ma gaƒoƒo geɖe. Kpovitɔawo metsɔ nya ɖe nyɔnuawo ŋu be wowɔ nu gbegblẽ o, gake wozi wo ɖi ŋu ke hafi woɖe asi le wo ŋu.

Nu bubu aɖe hã gadzɔ le October (Kele) 29, 2014 dzi le Walasmulla (Anyiehenuto me). Kpovitɔwo lé nyɔnu ene (siwo dze le fotoa me) tu, ŋkeke si kplɔe ɖo hafi woɖe asi le wo ŋu, eye wotsɔ nya ɖe wo ŋu be wonye nu vlo wɔlawo. Togbɔ be womewɔ nu vevi wo o hã la, wodzu wo gaƒoƒo geɖe.

Le nudzɔdzɔ eveawo siaa me la, Ðasefoawo tsɔ nya ɖe kpovitɔwo ŋu eye wotsɔ nyaawo yi Sri Lanka Ʋɔnudrɔ̃ƒe Kɔkɔtɔ hã. Ʋɔnudrɔ̃ƒe Kɔkɔtɔ lɔ̃ be yeadrɔ̃ nya la. Nyɔnu siwo ŋu wowɔ nuawo ɖo le Talawa la gblɔ be: “Edzɔ dzi na mí ŋutɔ be Ʋɔnudrɔ̃ƒe Kɔkɔtɔa lɔ̃ be yeadrɔ̃ nya la. Ena míete kaka ɖe Sri Lanka ʋɔnudrɔ̃ƒewo dzi.” Esi wonɔ anyi ɖe nyaa ŋu zi gbãtɔ le May (Damɛ) 29, 2015 dzi la, Ʋɔnudrɔ̃la Sisira de Abrew gblɔ be Ðasefowo “nye ame fatuwo” eye woƒe mawusubɔsubɔgbalẽ siwo womana la “metsi tsitre ɖe Buddha-ha la ŋu o.” Wotso nya me be woadrɔ̃ nya eve siawo le ƒea ƒe nuwuwu lɔƒo.

Nyagbugbɔdrɔ̃ƒe Bu Fɔ Kpovitɔwo Le Esi Womekpɔa Ðasefoawo Ta O Ta

Le woƒe fiadu Colombo me la, Yehowa Ðasefowo tsɔ nya ɖe kpovitɔwo ŋu le Nyagbugbɔdrɔ̃ƒe ku ɖe nudzɔdzɔ 11 aɖewo siwo me kpovitɔwo mewɔ naneke tsɔ kpɔ Yehowa Ðasefowo ta o ŋu. Le nudzɔdzɔ siawo dometɔ ɖeka me la, Buddhatɔ saɖeagaxɔmenɔla aɖe ƒo aƒetɔ Niroshan Silva eye wòkplɔe akpasesẽtɔe yi kpovitɔwo ƒe dɔwɔƒe hetso enu. Ke hã, le esi kpovitɔwo nakpɔ aƒetɔ Silva ta teƒe la, ɖeko woawo ŋutɔ gawɔ fui boŋ.

Aƒetɔ Silva gblɔ be, “Mímele biabiam be woawɔ nu ɖe mía ŋu etɔxɛe le Sri Lanka o, ɖeko míele biabiam be woadrɔ̃ ʋɔnu dzɔdzɔe eye woakpɔ mawusubɔsubɔhawo katã ƒe mawusubɔsubɔ ƒe ablɔɖe si nye gomenɔamesi vevi aɖe la ta.” Ʋɔnudrɔ̃ƒea lɔ̃ be yeadrɔ̃ nya la.

Ŋgɔyiyi Si Wowɔ Nyitsɔ Laa

Sri Lanka dziɖuɖua lɔ̃ ɖe edzi be woɖe ŋku tɔ mawusubɔsubɔha aɖewo me tɔwo eye wòdo ŋugbe be “yewoadze agbagba geɖe wu akpɔ mawusubɔsubɔ ƒe ablɔɖe ta.” Yehowa Ðasefowo bu dziɖuɖua ƒe nyagbɔgblɔ sia be enye ŋgɔyiyi nyui aɖe.

Aƒetɔ J. C. Weliamuna, si nye amegbetɔ ƒe gomenɔamesi veviwo ta ʋlila gã aɖe si ʋlia Yehowa Ðasefowo ta la gblɔ be: “Ƒe geɖewoe nye esia woɖe mɔ ɖe subɔsubɔha vovovowo ŋu le Sri Lanka, eye ŋutifafa nɔ subɔsubɔha siawo katã dome va se ɖe nyitsɔ laa. Ame aɖewo gblẽ ŋutifafa sia me esi wodoa ŋɔdzi na Yehowa Ðasefowo kple subɔsubɔha sue bubuwo me tɔwo hewɔa ŋutasẽnuwo ɖe wo ŋu, eye esiawo katã wɔwɔ nye afɔtutu gomenɔamesi siwo ŋu dukplɔsea ɖe mɔ ɖo, eye wònye dukplɔsea dzi dada. Mele be dziɖuɖumegãwo naxɔ aʋatsonya siwo wotsɔ tsoa Ðasefoawo ŋu la dzi se o, ke boŋ ele be woaku nyawo gɔme nyuie.”

Ðasefoawo le mɔ kpɔm be ʋɔnudrɔ̃ƒewo akpɔ gomenɔamesi vevi si nye be woakpɔ gome le mawusubɔsubɔdɔwo me le ŋutifafa me la ta. Wole mɔ kpɔm hã be dziɖuɖua ana be se nakplɔ amewo eye wòakpɔ gomenɔamesi vevi si ŋu dukplɔsea ɖe mɔ ɖo la ta.