Yehowa Ðasefowo le South Korea (Corée du Sud) ƒe 100 kple edzivɔe nye esia eye wona mawusubɔsubɔ ƒe ablɔɖe wo—negbe wo dometɔ siwo gbe be yewomaxɔ asrafo ƒe hehe o le dzitsinya ta ko. Tso Korea-ʋaa wɔɣi va se ɖe egbea la, South Korea drɔ̃a ʋɔnu sɔhɛ Ðasefo siwo gbe be yewomaxɔ asrafo ƒe hehe o le dzitsinya ta la atraɖii eye dziɖuɖua mewɔa ɖoɖo aɖeke hã na wo be woate ŋu awɔ dukɔmevidɔ bubuwo ɖe asrafo ƒe hehexɔxɔ teƒe o. Nu kae do tso esia me? South Korea dziɖuɖua lé Ðasefo siwo wu 18,000 de ga le esi wogbe be yewomaxɔ asrafo ƒe hehe o le dzitsinya ta la ta, eye ne wotsɔ ƒe siwo katã wonɔ ga me ƒo ƒu la, ewu ƒe 35,000.

Gaxɔmenɔnɔ Ƒe Nɔnɔmeawo Va Ka Ðe Eme

Togbɔ be tsã la, Ðasefo siwo wolé de ga toa nɔnɔme dziŋɔwo me le gaxɔwo me eye woka ƒe gbogbo aɖewo na wo be woanɔ ga me hã la, nɔnɔmeawo va ka ɖe eme eye woɖe gamenɔɣia dzi wòva zu ɣleti 18. Gaxɔdzikpɔlawo ɖea mɔ na Ðasefo akpa gãtɔ wowɔa woƒe mawusubɔsubɔ ƒe kpekpewo le gaxɔa me. Gakpe ɖe ŋu la, woɖe Ðasefo siwo le ga me dometɔ siwo wu 70 le alafa me ɖe aga tso gamenɔla bubuawo gbɔ eye wona woawo ŋutɔwo ɖeɖe le woƒe gaxɔwo me. *

Ale Si Xexemedukɔwo Bua Asrafo Ƒe Hehexɔxɔ Gbegbe Le Dzitsinya Ta

Dukɔ Ƒoƒuawo ƒe Amegbetɔwo Ƒe Gomenɔamesiwo Ŋuti Kɔmiti si léa ŋku ɖe ale si dziɖuɖuwo le Dukɔwo Dome Dukɔmeviwo Kple Dunyahehawo Ƒe Gomenɔamesi Ƒe Nubabla ƒe ɖoɖowo dzi wɔm ŋu la bu fɔ South Korea * enuenu be ele afɔkpo tum ame siwo gbe be yewomaxɔ asrafo ƒe hehe o la ƒe gomenɔamesi esi wòbua fɔ wo heléa wo de ga ta. Le kpɔɖeŋu me, le eƒe nyametsotso aɖe si wòɖe ɖe go le October 25, 2012 dzi me ƒe Ðoɖo 18 lia ƒe nya nu la, South Korea dziɖuɖua tu afɔkpo ame 388 aɖewo siwo gbe be yewomaxɔ asrafo ƒe hehe o le dzitsinya ta la ƒe gomenɔamesiwo, ame siawo katã nye Yehowa Ðasefowo. Kɔmitia gblɔ be “asrafo ƒe hehexɔxɔ gbegbe le dzitsinya ta nye tamebubu, dzitsinya kple mawusubɔsubɔ ƒe ablɔɖe vevi aɖe. Ena gome ame sia ame be womazi edzi be wòawɔ asrafodɔ o nenye be amea kpɔe be esia wɔwɔ mawɔ ɖeka kple yeƒe mawusubɔsubɔ kple mawudzixɔsewo o.” South Korea dziɖuɖua yi edzi le afɔkpo tum sɔhɛ alafa geɖewo ƒe tamebubu, dzitsinya kple mawusubɔsubɔ ƒe ablɔɖe heléa wo dea ga, eye wògbe be yemawɔ ɖe Kɔmitia ƒe nyametsotsowo dzi o.

Ɣeyiɣiawo

  1. April 30, 2015

    Yehowa Ðasefo 653 le ga me le esi wogbe be yewomaxɔ asrafo ƒe hehe o ta.

  2. March 3, 2015

    Yehowa Ðasefo 613 le ga me le esi wogbe be yewomaxɔ asrafo ƒe hehe o ta.

  3. October 31, 2014

    Yehowa Ðasefo 597 le ga me le esi wogbe be yewomaxɔ asrafo ƒe hehe o ta.

  4. August 31, 2014

    Yehowa Ðasefo 562 le ga me le esi wogbe be yewomaxɔ asrafo ƒe hehe o ta.

  5. June 30, 2014

    Nya 28 siwo ku ɖe ame 618 aɖewo siwo wolé de ga le esi wogbe be yewomaxɔ asrafo ƒe hehe o le dzitsinya ta la kpɔtɔ le Dukplɔsetakpɔʋɔnudrɔ̃ƒea.

  6. January 28, 2014

    Dukplɔlaa tsɔ gamenɔlawo ƒe agɔdzedzewo ke wo eye le ame aɖewo gome la, woɖe woƒe gamenɔɣi dzi kpɔtɔ ɣleti ɖeka alo eve, esia wɔe be woɖe asi le ŋutsu Ðasefo 100 aɖewo siwo wolé de ga le asrafo ƒe hehexɔxɔ gbegbe le dzitsinya ta la ta ŋu; Ðasefo 513 gakpɔtɔ le ga me le January 31 dzi.

  7. November 2013

    Yehowa Ðasefo 599 le ga me le esi wogbe be yewomaxɔ asrafo ƒe hehe o ta.

  8. April 2013

    Woɖe Ðasefo siwo le ga me dometɔ siwo wu 70 le alafa me ɖe aga tso gamenɔla bubuawo gbɔ eye wona woawo ŋutɔwo ɖeɖe le woƒe gaxɔwo me.

  9. October 25, 2012

    Dukɔ Ƒoƒuawo ƒe Kɔmitia kpɔe be South Korea da yeƒe Ðoɖo 18 lia (si ku ɖe tamebubu, dzitsinya kple mawusubɔsubɔ ƒe ablɔɖe ŋu) dzi esi wògbe be yemade bubu gome si le Ðasefo 388 aɖewo si be woagbe be yewomaxɔ asrafo ƒe hehe o le dzitsinya ta la ŋu o.

  10. August 30, 2011

    Dukplɔsetakpɔʋɔnudrɔ̃ƒea tso nya me be dziɖuɖua meda le Korea Dukplɔsea dzi ne ehe to na ame siwo gbe asrafo ƒe hehexɔxɔ le dzitsinya ta la o.

  11. March 24, 2011

    Dukɔ Ƒoƒuawo ƒe Kɔmitia kpɔe be South Korea da yeƒe Ðoɖo 18 lia dzi esi wògbe be yemade bubu gome si le Ðasefo 100 aɖewo si be woagbe be yewomaxɔ asrafo ƒe hehe o le dzitsinya ta la ŋu o.

  12. January 15, 2009

    Dukplɔla Ƒe Nyagɔmekuha Si Kua Asrafowo Ƒe Ku Masegɔmena Me ɖe nyatakaka aɖe ɖe go si ɖo kpe edzi be South Korea dziɖuɖua gbɔe sɔhɛ Ðasefo siwo ku tso ƒe 1975 va ɖo ƒe 1985 me, siwo wolé de ga le asrafo ƒe hehexɔxɔ gbegbe le dzitsinya ta la ta ƒe ku tso.

  13. December 2008

    South Korea dziɖuɖua te fli ɖe ɖoɖo aɖe si wɔm wòle be yeaɖe mɔ na dukɔmevi siwo gbe asrafo ƒe hehexɔxɔ le dzitsinya ta nawɔ dukɔmevidɔ bubuwo ɖe eteƒe la me.

  14. September 18, 2007

    South Korea Dudɔwɔƒe Si Kpɔa Dukɔa Ta ɖe gbeƒãe be ɖoɖo aɖe si wɔm wole be woaɖe mɔ na ame siwo gbe be yewomaxɔ asrafo ƒe hehe o le mawusubɔsubɔnyawo ta la nawɔ dukɔmevidɔ bubuwo ɖe asrafodɔ teƒe, eye wòdo ŋugbe be yewoatrɔ asi le dukɔa ƒe se siwo ku ɖe asrafodɔ ŋu la ŋu.

  15. November 3, 2006

    Dukɔ Ƒoƒuawo ƒe Kɔmitia kpɔe be South Korea da yeƒe Ðoɖo 18 lia dzi esi wògbe be yemade bubu gome si le Ðasefo eve aɖewo si be woagbe be yewomaxɔ asrafo ƒe hehe o le dzitsinya ta la ŋu o.

  16. August 26, 2004

    Dukplɔsetakpɔʋɔnudrɔ̃ƒea tso nya me be ele se nu be dziɖuɖua nahe to na ame siwo gbe be yewomaxɔ asrafo ƒe hehe o le dzitsinya ta.

  17. Ƒe 2001

    Asrafowo Xɔxɔ Ƒe Dɔdzikpɔƒea te fli ɖe ameléle de asrafodɔ me akpasesẽtɔe me, eye wòɖe ƒe etɔ̃ siwo woɖo be ame siwo gbe asrafo ƒe hehexɔxɔ natsɔ anɔ ga me godoo la dzi kpɔtɔ wòzu ƒe ɖeka kple afã.

  18. December 1, 1985

    Kim, Young-geun ku le funyafunya si asrafowo wɔe le gaxɔ me esi wògbe asrafo ƒe hehexɔxɔ le dzitsinya ta la ta.

  19. August 17, 1981

    Kim, Sun-tae ku le funyafunya si asrafowo wɔe le gaxɔ me esi wògbe asrafo ƒe hehexɔxɔ le dzitsinya ta la ta.

  20. March 28, 1976

    Jeong, Sang-bok ku le ale si asrafowo ƒoe kutɔkutɔe hewɔ funyafunyae le ga me esi wògbe asrafo ƒe hehexɔxɔ le dzitsinya ta la ta.

  21. March 19, 1976

    Lee, Choon-gil ku esi kpovitɔwo ƒoe kutɔkutɔe ale gbegbe be eƒe ƒomeɖe dome gblẽ esime wòle gaxɔ me esi wògbe asrafo ƒe hehexɔxɔ le dzitsinya ta la ta.

  22. November 14, 1975

    Kim, Jong-sik ku esi asrafowo ƒoe vevie, wotu kɔe basabasa hewɔ funyafunyae le esi wògbe be yemaxɔ asrafo ƒe hehe o le dzitsinya ta la ta.

  23. Ƒe 1975

    Dukplɔla Park Jeong-hee ɖo asrafodɔwɔwɔ dzizizitɔe anyi eye wòbia tso ame sia ame si be wòakpɔ gome le eme bliboe. Wolé ŋutsu Ðasefowo akpasesẽe yi asrafoxɔƒe.

  24. January 30, 1973

    Woɖo ɖoɖo yeye aɖe anyi si nye Ðoɖo Tɔxɛ Hena Tohehe Na Ame Siwo Gbe Asrafodɔwɔwɔ, si na woda ɖe ƒe gbogbotɔ si woatsɔ ahe to na ame siwo gbe asrafo ƒe hehexɔxɔ le dzitsinya ta la dzi wòzu ƒe ewo le ƒe etɔ̃ teƒe. Eye woɖe mɔ be woate ŋu alé ame aɖewo ade ga madzemadzee faa.

  25. Ƒe 1953

    South Korea te ame siwo gbe asrafo ƒe hehexɔxɔ le dzitsinya ta la dede ga.

^ mm. 4 Ne èdi nyatakaka bubuwo la, kpɔ nyati si nye South Korea Ma Ame Siwo Gbe Asrafo Ƒe Hehexɔxɔ Alafa Geɖewo Ða Tso Nu Vlo Wɔlawo Gbɔ

^ mm. 6 South Korea le Dukɔwo Dome Dukɔmeviwo Kple Dunyahehawo Ƒe Gomenɔamesi Ƒe Nubabla me eye wòde asi eƒe ɖoɖo gbãtɔ hã te, ɖoɖo sia na gome South Korea dukɔmevi ɖe sia ɖe be ate ŋu aŋlɔ nu tso dziɖuɖua ƒe sedzidada ɖe sia ɖe ŋu aɖo ɖe Nubabla la faa.