Singapore dziɖuɖua de se be ame sia ame naxɔ asrafo ƒe hehe, eye meda asi ɖe asrafo ƒe hehexɔxɔ gbegbe le dzitsinya ta dzi o. Wodea ɖekakpui Yehowa Ðasefo siwo gbe be yewomaxɔ asrafo ƒe hehe o le dzitsinya ta la gaxɔ me zi eve tre ɖe enu eye woƒe gaxɔa me nɔnɔa katã xɔa ɣleti 39.

Ne ɖekakpui Ðasefo aɖe xɔ ƒe 18 la, sea bia tso esi be wòana ŋkɔ axɔ asrafowo ƒe hehe. Ne egbe la, wotunɛ ɖe asrafowo ƒe asaɖa me ɣleti 15. Ne ɣleti 15 de la, woɖea asi le eŋu, eye wogabiana tso esi enumake be wòava xɔ asrafowo ƒe hehe. Ne egagbe la, wogadenɛ gaxɔ me ɣleti 24 sɔŋ.

Singapore Dziɖuɖua Gbe Be Yemawɔ Ðe Dukɔ Ƒoƒuawo Ƒe Sedede Dzi O

Ɣeyiɣi didi aɖee nye esia Dukɔ Ƒoƒuawo biana tso dziɖuɖu siwo le eme la si be “woada asi ɖe asrafo ƒe hehexɔxɔ gbegbe le dzitsinya ta dzi be enye tamebubu, dzitsinya kple mawusubɔsubɔ ƒe gome si le amewo si abe ale si wòle le Xexea Me Katã Ƒe Amegbetɔ Ƒe Gomenɔamesi ƒe Sewo me ene la dzi.” Togbɔ be Singapore le Dukɔ Ƒoƒuawo me tso ƒe 1965 me hã la, egbe be yemawɔ ɖe Dukɔ Ƒoƒuawo ƒe se sia dzi o. Le lɛta aɖe si Singapore dziɖuɖua ŋlɔ na Dukɔ Ƒoƒuawo Ƒe Amegbetɔwo Ƒe Gomenɔamesi Gbɔkpɔha le April 24, 2002 me la, Singapore dziɖuɖumegã aɖe gblɔ be “ne ame ɖekaɖekawo ƒe dzixɔsewo kple nuwɔnawo kple [dukɔa ƒe dedienɔnɔ ƒe gomenɔamesiwo o la] kpe ŋgo la, dukɔa ƒe dedienɔnɔ ƒe gomenɔamesiwo koe awɔ dɔ.” Dziɖuɖumegã la ŋlɔ ɖe lɛtaa me tẽe be, “Mímeda asi ɖe edzi be asrafo ƒe hehexɔxɔ gbegbe le dzitsinya ta ƒe ɖoɖoa bla xexemedukɔwo katã o.”

Ɣeyiɣiawo

  1. June 11, 2015

    Wolé Yehowa Ðasefo 18 tu ɖe asrafo ƒe hehexɔxɔ gbegbe le dzitsinya ta la ta.

  2. March 10, 2015

    Wolé Yehowa Ðasefo 17 tu ɖe asrafo ƒe hehexɔxɔ gbegbe le dzitsinya ta la ta.

  3. December 12, 2014

    Wolé Yehowa Ðasefo 19 tu ɖe asrafo ƒe hehexɔxɔ gbegbe le dzitsinya ta la ta, eye wo dometɔ ɖeka nye ame si gbe be yemanye dukɔmevi si wona asrafo ƒe hehe si woate ŋu azã le aʋawɔɣi o.

  4. September 16, 2014

    Wolé Yehowa Ðasefo 15 tu ɖe asrafo ƒe hehexɔxɔ gbegbe le dzitsinya ta, eye wo dometɔ ɖeka nye ame si gbe be yemanye dukɔmevi si wona asrafo ƒe hehe si woate ŋu azã le aʋawɔɣi o.

  5. July 30, 2014

    Wolé Yehowa Ðasefo 16 tu ɖe Singapore-srafowo Ƒe Nɔƒe ɖe asrafo ƒe hehexɔxɔ gbegbe le dzitsinya ta la ta.

  6. November 2013

    Wolé Yehowa Ðasefo 18 tu ɖe asrafo ƒe hehexɔxɔ gbegbe le dzitsinya ta la ta.

  7. April 24, 2002

    Dziɖuɖumegãwo gaɖo kpe edzi be Singapore dziɖuɖua meda asi ɖe asrafo ƒe hehexɔxɔ gbegbe le dzitsinya ta dzi o.

  8. February 1995

    Ŋutasesẽ le Singapore dukɔmevi siwo nye Yehowa Ðasefowo ŋu kple wo léle de ga do gã ɖe edzi.

  9. August 8, 1994

    Singapore Ʋɔnudrɔ̃ƒe Kɔkɔtɔ gbe be yemagbugbɔ nyaa adrɔ̃ na Yehowa Ðasefowo o.

  10. January 12, 1972

    Singapore dziɖuɖua te fli ɖe mɔɖeɖe si wona Yehowa Ðasefowo wonye habɔbɔ si wode agbalẽ me le se nu la me.