Ƒe blaevee nye esi va yi la, Eritrea dziɖuɖumegãwo lé ɖekakpuivi etɔ̃ aɖewo de ga le Sawa Gakpɔ me, wole nɔnɔme madeamedziwo me, eye wogakpɔtɔ le gakpɔa me va se ɖe egbe. Wometsɔ nya aɖeke ɖe wo ŋu o, eye womena mɔnukpɔkpɔ aɖeke wo hã be woaɖe wo ɖokuiwo nu le ʋɔnu o. Nu ka tae wolé wo de ga madzemadzee?

Paulos Eyassu, Negede Teklemariam kple Isaac Mogos nye Yehowa Ðasefowo, eye wogbe be yewomaxɔ asrafo ƒe hehe o le woƒe mawusubɔsubɔ si womefena kple o ta. Ne ɖe wodrɔ̃ ʋɔnu wo hebu fɔ wo be wowɔ “nu gbegblẽ” le esi wogbe be yewomaxɔ asrafo ƒe hehe o ta la, anye ne woka ƒe aɖe koŋ na wo be woanɔ ga me. Fifia Paulos xɔ ƒe 41, Negede xɔ ƒe 40 eye Isaac hã xɔ ƒe 38, eye wo katã wozã woƒe sɔhɛmenɔɣia katã le ga me. Woxɔ srɔ̃ɖeɖe, vidzidzi, wo dzilawo dzi kpɔkpɔ alo agbenɔnɔ ale si woawo ŋutɔ wodii ƒe mɔnukpɔkpɔ le wo si. Eye woxɔ tadede agu ɖekae kple woƒe haxɔsetɔwo ƒe mɔnukpɔkpɔ hã le wo si.

Esi wolé Paulos, Negede kple Isaac le September 24, 1994 dzi yi Sawa Gakpɔ me la, gakpɔa dzi kpɔlawo sẽ ŋuta le wo ŋu vevie hewɔ funyafunya wo gɔ̃ hã. Gake le ƒe ʋɛ siwo va yi me la, womegasẽa ŋuta le wo ŋu ale o, eye womegawɔa funyafunya wo hã o. Ale si woɖoe kplikpaa be yewomaɖe asi le yewoƒe mawudzixɔse ŋu o la na be gakpɔa dzi kpɔlawo dea bubu wo ŋu.

Ðasefo Bubu Siwo Wolé De Ga Le Nɔnɔme Sesẽwo Me

Eritrea yee wole Yehowa Ðasefowo yome tim kutɔkutɔe le wu le xexea me godoo. Esime míele nyati sia ŋlɔm la, Ðasefo 73 le ga me, nyɔnuwo, ɖeviwo kple ame tsitsiwo hã le wo dome. Wo dometɔ geɖe le te nɔm ɖe gbedadaƒo ƒe nɔnɔme sesẽ mawo nu, womekpɔa nu nyui ɖuna o, womekpɔa tsi nona wosua wo o, eye gakpɔa dzi kpɔlawo wɔa fu wo vevie. Wolé Ðasefo etɔ̃ bubu aɖewo hã de ga le Sawa Gakpɔa me ƒe ewo kple edzivɔe nye ema, gake Paulos, Negede kple Isaac le ga me wòdidi wu Ðasefo ɖe sia ɖe le Eritrea.

Xexemedukɔwo Le Biabiam Tso Eritrea Si Be Wòadzudzɔ Mawusubɔlawo Yome Titi

Xexemedukɔwo nyae nyuie be Eritrea dziɖuɖua wɔa fu Yehowa Ðasefowo kple subɔsubɔha sue bubuwo me tɔwo.

  • Tso ƒe 2004 me la, United States (États-Unis) Dukɔa Ƒe Dɔwɔƒe yɔa Eritrea be enye “dukɔ si ƒe nuwɔna ɖe fu etɔxɛe.” Wozãa “nya sia na dukɔ siwo ƒe dziɖuɖuwo ɖoe koŋ yi edzi xea mɔ ɖe mawusubɔsubɔ ƒe ablɔɖe nu megbemakpɔmakpɔe.”

  • Amegbetɔwo Ƒe Gomenɔamesinyawo Gbɔkpɔha tsi dzi vevie le ale si “Eritrea dziɖuɖumegãwo yi edzi le afɔkpo tum woƒe dukɔmeviwo ƒe gomenɔamesiwo” la ŋu. Ebia tso Eritrea dziɖuɖua si be wòade bubu “ame sia ame ƒe . . . tamebubu, dzitsinya, mawusubɔsubɔ kple dzixɔse ƒe ablɔɖe ŋu.”

  • United States dukɔa ƒe Dukɔwo Dome Mawusubɔsubɔ Ƒe Ablɔɖe Gbɔkpɔha gblɔ le eƒe ƒe 2014 ƒe Ƒe Sia Ƒe Nyatakaka me be: “Yehowa Ðasefowo ƒe mawusubɔsubɔ ƒe ablɔɖe . . . ɖo afɔku me vevie ŋutɔ.”

  • Amegbetɔ ƒe Gomenɔamesi Dzikpɔha gblɔ le eƒe Ƒe 2013 Xexea Me Ƒe Nyatakaka me be Eritrea dziɖuɖua gakpɔtɔ le mawusubɔsubɔha siwo dzi dziɖuɖua “meda asi ɖo o” la me tɔwo lém hele fu wɔm wo, eye Yehowa Ðasefowo koŋue wotɔ ŋkui.

  • Le December 2005 me la, Afrika Ƒe Amegbetɔwo Kple Dukɔwo Ƒe Gomenɔamesi Ƒe Hakplɔɖoɖowo da asi ɖe Nyametsotso Ku Ðe Amegbetɔ Ƒe Gomenɔamesinyawo Le Eritrea Ŋu dzi eye wòbia tso Eritrea dziɖuɖua si be “wòakpɔ egbɔ be wodrɔ̃ ʋɔnu amewo ameŋkumemakpɔtɔe, woana ame ƒe susu gbɔgblɔ kple nuƒoƒo kpakple kpekpewo wɔwɔ le ŋutifafa me ɣesiaɣi ƒe ablɔɖe amewo.”

Philip Brumley, si nye Yehowa Ðasefowo ƒe senyawo gbɔ kpɔla gbãtɔ na xexea me godoo gblɔ be: “Míele mɔ kpɔm vevie be Eritrea dziɖuɖua aɖe asi le Yehowa Ðasefo siwo katã le ga me la ŋu, tsɔ kpe ɖe ŋutsu etɔ̃ siawo siwo le ga me ƒe 20 ye nye esia la hã ŋu, eye woadzudzɔ míaƒe haxɔsetɔwo yome titi.”