Dzo kpo yi emenuwo dzi

ERITREA

Wode Wo Ga Le Woƒe Xɔse Ta

Wode Wo Ga Le Woƒe Xɔse Ta

Eritrea dziɖuɖua léa Yehowa Ðasefowo kple ame bubuwo dea ga, evɔ womedrɔ̃a ʋɔnu wo alo tsɔa nya aɖeke hã ɖe wo ŋu le ʋɔnu hafi o. Ame siwo wolé de ga la dometɔ geɖe nye Ðasefo ŋutsu siwo gbe asrafo ƒe hehexɔxɔ le dzitsinya ta. Ke hã, Ðasefoawo dometɔ akpa gãtɔ siwo dome nyɔnuwo, ɖeviwo kple ame tsitsiwo le la le gaxɔ me ɖe woƒe mawusubɔsubɔdɔwo kple nya bubu siwo womeʋu goe na wo o la ta.

Dukplɔla Afewerki ɖe dukplɔla ƒe sedede aɖe ɖe go le October 25, 1994 dzi si xɔ dukɔmevinyenye le Ðasefoawo si le esi womekpɔ gome le ɖokuisinɔnɔ ƒe akɔ si woda le dukɔa me le ƒe 1993 me o kple esi wogbena be yewomaxɔ asrafo ƒe hehe o le dzitsinya ta la ta. Hafi Eritrea dziɖuɖua nava de ɖoɖoa to me be dumeviwo nanɔ asrafo ƒe hehe xɔm la, ɖoɖo nyuiwo nɔ anyi be ame nawɔ dukɔmevidɔ bubu ɖe asrafodɔ teƒe. Ðasefo geɖe wɔ dɔ mawo tɔgbi le dziɖuɖu vovovo siwo kplɔ dukɔ ma la te. Dziɖuɖua naa “Dukɔmevidɔ Nu Wuwu Ƒe Ðaseɖigbalẽ” ame siwo wɔ dɔ mawo eye zi geɖe la, ekafua wo ɖe dɔ siwo wowɔ ta. Gake tso esime dukplɔlaa de se ma ko la, dukɔa ƒe kpovitɔwo léa Yehowa Ðasefowo tuna, wowɔa funyafunya wo heɖea fu na wo agbadre ale be woagbe nu le woƒe xɔse gbɔ.

Ðasefowo Ku Le Nɔnɔme Sesẽ Siwo Me Woto Le Gaxɔ Me Ta

Ðasefo ene ku le gaxɔ me le Eritrea eye Ðasefo tsitsi etɔ̃ siwo ŋu woɖe asi le le gaxɔ me la va ku le nɔnɔme sesẽ siwo me woto esime wonɔ gaxɔ me la ta.

Le ƒe 2018 me la, Ðasefo eve ku esi woɖe wo yi Mai Serwa Gakpɔ me vɔ megbe. Aƒetɔ Habtemichael Tesfamariam ku le January 3 lia dzi esi wòxɔ ƒe 76, eye Habtemichael Mekonen ku le March 6 lia dzi esi wòxɔ ƒe 77. Eritrea dziɖuɖua lé wo de gaxɔ me le ƒe 2008 me evɔ metsɔ nya aɖeke ɖe wo ŋu le ʋɔnu hafi o.

Le ƒe 2011 kple ƒe 2012 me la, Ðasefo eve ku le nɔnɔme dziŋɔ siwo me woto le Meitir Asaɖamegaxɔa me ta. Gamenɔla si ŋkɔe nye Misghina Gebretinsae, si xɔ ƒe 62 la ku le ga me le July 2011 me le dzoxɔxɔ dziŋɔ si le tohehe ƒe teƒe si wotsɔ ŋkɔ na be “tomexɔ” si me wotui ɖo la ta. Aƒetɔ Yohannes Haile, si xɔ ƒe 68 la hã ku le August 16, 2012 dzi esime wònɔ ga me ƒe ene kloe le nɔnɔme dziŋɔ mawo tɔgbi me. Ðasefo tsitsi etɔ̃ bubu siwo ŋkɔwoe nye Kahsai Mekonnen, Goitom Gebrekristos kple Tsehaye Tesfariam ku esi woɖe asi le wo ŋu le gaxɔ me vɔ megbe le esi woto nɔnɔme dziŋɔwo me le Meitir Asaɖamegaxɔa me ta.

Woŋe Aɖaba Ƒu Amegbetɔ Ƒe Gomenɔamesi Ƒe Habɔbɔ Xɔŋkɔwo Ƒe Nyawo Dzi

Eritrea yi edzi le xexemedukɔwo ƒe amegbetɔwo ƒe gomenɔamesi ƒe ɖoɖowo dzi dam. Amegbetɔ ƒe gomenɔamesi ƒe habɔbɔ xɔŋkɔwo ƒo nu tsi tre ɖe ale si Eritrea dziɖuɖua le amewo ƒe gomenɔamesi veviwo tem ɖe to, eye woyi edzi le biabiam tso Eritrea dziɖuɖua si be wòaɖɔ nɔnɔmea ɖo.

Le ƒe 2014 me la, Amegbetɔwo Ƒe Gomenɔamesinyawo Gbɔkpɔha kpɔ ŋudzedze ɖe nyatakaka si numekulawo na ku ɖe ale si amegbetɔwo ƒe gomenɔamesi ƒe nyawo le le Eritrea la ŋu. Le nyatakaka me la, wobia tso Eritrea dziɖuɖua si be wòade bubu gome si le dukɔmeviwo si be woagbe asrafo ƒe hehexɔxɔ le dzitsinya ta la ŋu “le ɖekawɔwɔ me kple xexemedukɔwo ƒe ɖoɖowo,” eye “wòakpɔ egbɔ be gamenɔlawo le dedie; wòakpɔ atikewɔnyawo gbɔ na ame siwo hiã nɛ . . . eye wòana ale si nɔnɔmeawo le le gaxɔawo me la nanyo ɖe edzi le ɖekawɔwɔ me kple xexemedukɔwo ƒe ɖoɖowo.” Le nyametsotso aɖe si dzi woda asi ɖo le ƒe 2015 me me la, Amegbetɔwo Ƒe Gomenɔamesinyawo Gbɔkpɔhaa bia tso Eritrea dziɖuɖua si be “wòana mɔ dumeviwo be woagbe asrafo ƒe hehexɔxɔ le dzitsinya ta.”

Le ƒe 2016 me la, Habɔbɔ Si Ku Nu Me Tso Amegbetɔ Ƒe Gomenɔamesinyawo Ŋu Le Eritrea la de dzesii be Eritrea dziɖuɖua wɔ “nu tovo ɖe ame havi ŋu” elabena “woti” Yehowa Ðasefowo kple ame bubuwo “yome ɖe subɔsubɔnyawo kple to si me tɔwo ameawo nye ta.”

Le ƒe 2017 me la, Afrikatɔwo Ƒe Kɔmiti Si Kpɔa Ðeviwo Ƒe Gomenɔamesinyawo Kple Dedienɔnɔnyawo Gbɔ la gblɔ be ete ɖe yewo dzi be togbɔ be sewo li hena ɖeviwo ta kpɔkpɔ hã la, gomenɔamesi sia meɖea vi na “Yehowa Ðasefowo ƒe viwo o” eye wowɔa ŋlɔmi le wo ŋu. Kɔmitia bia tso Eritrea dziɖuɖua si be “wòalɔ̃ ɖe edzi be Tamebubu, Dzitsinya Kple Mawusubɔsubɔ Ƒe Ablɔɖe le ɖeviwo si eye wòaɖe mɔ na wo woawɔ eŋu dɔ, gake wòawɔ esia ameŋkumekpɔkpɔ manɔmee.”

Le ƒe 2018 me la, Afrikatɔwo Ƒe Habɔbɔ Si Kpɔa Amegbetɔwo Ƒe Gomenɔamesinyawo Gbɔ bia tso Eritrea dziɖuɖua si be “wòaɖe afɔ enumake atsɔ akpɔ egbɔ be woagate ame siwo le gaxɔ me, siwo dome . . . Yehowa Ðasefowo hã le la ƒe gomenɔamesiwo ɖe to azɔ o,” eye wòbia tso wo si be woaku nu me tso Ðasefo siwo ku le gaxɔ me la ƒe nyawo ŋu. Habɔbɔ sia te gbe ɖe edzi be ehiã be Eritrea nakpɔ egbɔ be wogbugbɔ “dukɔmevinyenye ƒe gomenɔamesiwo” na Yehowa Ðasefoawo.

Le May 2019 me la, Dukɔ Ƒoƒuawo Ƒe Amegbetɔwo Ƒe Gomenɔamesiwo Ŋuti Kɔmiti bia tso Eritrea si be wòakpɔ egbɔ be wona mawusubɔsubɔ kple dzixɔse ƒe ablɔɖe dukɔmeviwo eye “woaɖe asi le ame siwo katã wolé alo wode gaxɔ me le esi wowɔ woƒe mawusubɔsubɔ ƒe ablɔɖe ŋu dɔ ta la ŋu, eye Yehowa Ðasefowo hã le eme.” Kɔmiti sia gabia tso Eritrea si be “wòakpɔ egbɔ be se ɖe mɔ be dukɔmeviwo nate ŋu agbe asrafo ƒe hehexɔxɔ le dzitsinya ta eye wòawɔ ɖoɖo ɖe dukɔmevidɔ bubu si menye asrafodɔ o ŋu na ame siwo dzitsinya meɖe mɔ na be woaxɔ asrafo ƒe hehe o.”

Gaxɔmenɔnɔ Ðikaa

Ðekakpui etɔ̃ siwo ŋkɔwoe nye Paulos Eyasu, Isaac Mogos kple Negede Teklemariam le ga me tso September 17, 1994 dzi le esi wogbe be yewomaxɔ asrafo ƒe hehe o le dzitsinya ta la ta. Ame 10 bubu aɖewo hã le ga me ƒe ewo kple edzivɔe nye esia.

Wotu Ðasefo aɖewo ɖe meligagowo me, eye wotu bubuwo hã ɖe kpexɔwo kple gakpoxɔ siwo ƒe afã le to me la me.

Le July 2017 me la, woɖe Ðasefo siwo katã le Meitir Asaɖamegaxɔ me la yi Mai Serwa Gakpɔ me le Asmara dua godo. Le November 30, 2017 dzi la, woɖe Ðasefo 13 siwo katã wolé de ga le Sawa Asaɖamegaxɔ me, siwo dome Paulos Eyasu, Isaac Mogos, kple Negede Teklemariam le, la hã yi Mai Serwa Gakpɔ me.

Le Ðasefo ŋutsu akpa gãtɔ siwo le gaxɔ me gome la, womeka ƒe ale si nu woatsɔ anɔ ga mee o, eya ta mɔkpɔkpɔ meli be woaɖe asi le wo ŋu o va se ɖe esime woku alo woɖo kudo nu hafi. Esi wònye be ʋɔnudrɔ̃nyawo kple senyawo mewɔa dɔ nyuie le dukɔa me o ta la, ne wolé wo de ga la, ɖeko wòle abe ɖe wotso kufia na wo ene.

Ɣeyiɣiawo

  1. December 17, 2019

    Ðasefo siwo katã le ga mee nye 52.

  2. March 6, 2018

    Aƒetɔ Habtemichael Mekonen, si xɔ ƒe 77 la, ku esi woɖee yi Mai Serwa Gakpɔa me vɔ megbe.

  3. January 3, 2018

    Aƒetɔ Habtemichael Tesfamariam, si xɔ ƒe 76 la, ku esi woɖee yi Mai Serwa Gakpɔa me vɔ megbe.

  4. July 2017

    Woɖe Ðasefo siwo katã le Meitir Asaɖamegaxɔa me la yi Mai Serwa Gakpɔa me le Asmara dua godo.

  5. July 25, 2014

    Woɖe asi le Ðasefo siwo wolé le April 14 dzi la dometɔ akpa gãtɔ ŋu, gake wo dometɔ 20 siwo wolé le April 27 dzi la gakpɔtɔ le ga me.

  6. April 27, 2014

    Wova lé Ðasefo 31 le woƒe kpekpe me esime wonɔ Biblia srɔ̃m.

  7. April 14, 2014

    Wolé Ðasefo siwo wu 90 le Yesu Kristo ƒe ku ƒe Ŋkuɖodziwɔna si wowɔna ƒe sia ƒe la me.

  8. August 16, 2012

    Aƒetɔ Yohannes Haile, si xɔ ƒe 68 la, ku esime wònɔ gaxɔ me le nɔnɔme dziŋɔwo me.

  9. July 2011

    Aƒetɔ Misghina Gebretinsae, si xɔ ƒe 62 la, ku esime wònɔ gaxɔ me le nɔnɔme dziŋɔwo me.

  10. June 28, 2009

    Dziɖuɖumegãwo va ge ɖe Ðasefo aɖe ƒe aƒe me esime wole woƒe mawusubɔsubɔwɔnawo wɔm eye wolé Ðasefo 23 siwo katã nɔ kpekpea me, woƒe ɖevitɔ xɔ ƒe 2 eye woƒe tsitsitɔ xɔ ƒe 80.

  11. April 28, 2009

    Dziɖuɖumegãwo ɖe Yehowa Ðasefo siwo katã wotu ɖe poliswo ƒe dɔwɔƒe la yi Meitir Asaɖamegaxɔ me negbe wo dometɔ ɖeka koe womekplɔ yi o.

  12. July 8, 2008

    Dziɖuɖumegãwo ge ɖe aƒewo me kple dɔwɔƒewo ɖalé Ðasefo 24, wo dometɔ akpa gãtɔ nye ame siwo kpɔa woƒe ƒomewo dzi.

  13. May 2002

    Dziɖuɖua ɖo asi mawusubɔsubɔha siwo katã mele mawusubɔsubɔha ene siwo dzi wòda asi ɖo dome o la ƒe dɔwɔwɔwo dzi.

  14. October 25, 1994

    Dukplɔla ƒe sedede na woxɔ dukɔmevinyenye kple amegbetɔ ƒe gomenɔamesi veviwo le Yehowa Ðasefowo si.

  15. September 17, 1994

    Wolé Paulos Eyasu, Isaac Mogos kple Negede Teklemariam de ga, evɔ wometsɔ nya aɖeke ɖe wo ŋu o, eye womedrɔ̃ ʋɔnu wo hã o, eye wogakpɔtɔ le ga me fifia.

  16. Le Ƒe 1940-awo Me

    Woɖo Yehowa Ðasefowo ƒe ƒuƒoƒo gbãtɔwo le Eritrea.