Dzo kpo yi emenuwo dzi

AZERBAIJAN

Wode Wo Ga Le Woƒe Xɔse Ta

Wode Wo Ga Le Woƒe Xɔse Ta

Azerbaijan ƒe Dukplɔsea ɖe mɔ be ame siwo gbe asrafo ƒe hehexɔxɔ la nawɔ dukɔmevidɔ bubu, gake dziɖuɖua mekpɔ de se aɖeke si ku ɖe esia ŋu o. Esia na be wotia Yehowa Ðasefo siwo gbe be yewomaxɔ asrafo ƒe hehe o le woƒe dzixɔsewo ta la yome hedea wo ga.

Azerbaijan Mewɔ Ðe Eƒe Nyawo Dzi O

Esi Azerbaijan nɔ mɔ biam be yeage ɖe Europa Aɖaŋudeha me le ƒe 1996 me la, edo ŋugbe be (1) yeawɔ se si wode ku ɖe dukɔmevidɔ bubuwo wɔwɔ ɖe asrafo ƒe hehexɔxɔ teƒe ŋu la dzi le ƒe eve me (2) yeaɖe asi le ame siwo katã be yewomaxɔ asrafo ƒe hehe o le dzitsinya ta la ŋu, eye (3) yeaɖe mɔ na ame siwo gbe asrafo ƒe hehexɔxɔ le dzitsinya ta la natia dukɔmevidɔ bubu siwo woawɔ. Ƒe 13 kple edzivɔwoe nye esia Azerbaijan va zu Europa Aɖaŋudeha me tɔ, gake mewɔ ɖe eƒe nyawo dzi o.

Le ƒe 2011 me la, esi Europa Aɖaŋudeha ƒe dɔwɔha si woyɔna be Dɔwɔha Si Kpɔa Vovototodede Ame Me Kple Mɔxexe Ðe Amewo Ƒe Ablɔɖe Nu Nyawo Gbɔ lé ŋku ɖe ale si nyawo le edzi yim le Azerbaijan ŋu la, egblɔ be: “Dɔwɔha Si Kpɔa Vovototodede Ame Me Nyawo Gbɔ le biabiam tso Azerbaijan dziɖuɖua si be wòawɔ dukɔmevidɔ bubuwo wɔwɔ ɖe asrafo ƒe hehexɔxɔ teƒe ƒe ɖoɖo aɖe si wɔ ɖeka kple Europa ƒe ɖoɖowo la kaba na dukɔmeviwo. . . . [Dɔwɔhaa] gale gbe tem ɖe edzi vevie be dziɖuɖua megatsɔ nya ɖe ame siwo gbe be yewomaxɔ asrafo ƒe hehe o la ŋu alo alé wo tu azɔ o, ke boŋ wòaɖe mɔ na wo woawɔ dɔ siwo aɖe vi na woƒe dukɔmeviwo evɔ maɖe fu na woƒe dzitsinya o.”

Wole Ame Siwo Gbe Asrafo Ƒe Hehexɔxɔ Le Dzitsinya Ta Lém De Ga

Azerbaijan gakpɔtɔ le ame siwo gbe asrafo ƒe hehexɔxɔ le dzitsinya ta la lém. Le August 23, 2013 dzi la, Yehowa Ðasefo aɖe si ŋkɔe nye Kamran Shikhaliyev, si xɔ ƒe 17 la, yi Baku Nizami Nutomedɔwɔƒe Si Kpɔa Asrafonyawo Gbɔ be ɖɔktawo nadoe kpɔ. Le gododo sia kple esiwo kplɔ esia ɖo me la, aƒetɔ Shikhaliyev ɖe eme na Nutomedɔwɔƒea be yeƒe dzitsinya meɖe mɔ na ye be yeaxɔ asrafo ƒe hehe o, gake yeate ŋu awɔ dukɔmevidɔ bubuwo ɖe asrafodɔ teƒe. Le October 8, 2013 dzi la, aƒetɔ Shikhaliyev ŋlɔ agbalẽ na Nutomedɔwɔƒea hebia be woana yeawɔ dukɔmevidɔ bubuwo ɖe asrafodɔ teƒe. Esi aƒetɔ Shikhaliyev trɔ yi Nutomedɔwɔƒea le October 10, 2013 dzi la, Azerbaijan dziɖuɖumegãwo lée akpasesẽe be wòazu asrafo. Kpovitɔwo lée akpasesẽe yi na asrafowo, eye wògakpɔtɔ le ga me le asrafowo nɔƒe va se ɖe fifia.

Le April 16, 2014 dzi, si nye ɣleti ade kple edzivɔ le eléle madzemadzee megbe la, Jalilabad Asraƒowo Ƒe Ʋɔnudrɔ̃ƒe de aƒetɔ Shikhaliyev ga hena ƒe ɖeka le afi si wohea to na asrafowo le. Ʋɔnudrɔ̃ƒea bui be enye asrafo si si le asrafodɔ nu. Gake aƒetɔ Shikhaliyev meka atam kpɔ be yezu asrafo o, medo asrafowu kpɔ alo kpɔ gome le asrafodɔ aɖeke me kpɔ o. Tsɔ kpe ɖe eŋu la, ɣesiaɣi si Nutomedɔwɔƒea samae la, evana, gake eɖea eme na wo ɣesiaɣi be yeƒe dzitsinya maɖe mɔ na ye be yealé tu o.

Aƒetɔ Shikhaliyev bia be woagbugbɔ nyaa adrɔ̃ na ye, gake Shirvan Nyagbugbɔdrɔ̃ƒea gbe le July 16, 2014 dzi be yemagbugbɔ nyaa adrɔ̃ o. Le December 2014 me la, asrafowo kplɔe yi Salyan, afi si wohea to na ame siwo gbe asrafodɔ le le Azerbaijan, gake womekpɔ nya nenye asrafoawo bui be esiae nye ƒe ɖeka si woka nɛ la gɔme dzedze o. Aƒetɔ Shikhaliyev le mɔ kpɔm be Azerbaijan Ʋɔnudrɔ̃ƒe Kɔkɔtɔ alɔ̃ agbugbɔ nyaa adrɔ̃ na ye eye wòalɔ̃ ɖe edzi be gome le ye si be yeagbe be yemawɔ asrafodɔ o.

Ɣeyiɣiawo

  1. February 17, 2015

    Sabail Nutomeʋɔnudrɔ̃ƒe si le Baku ɖe gbe be woalé aƒenɔ Irina Zakharchenko kple aƒenɔ Valida Jabrayilova tu enumake woanɔ ga me ɣleti etɔ̃ hafi woava drɔ̃ ʋɔnu wo be wole mawusubɔsubɔgbalẽwo mam mɔɖeɖe aɖeke maxɔmaxɔe.

  2. December 2014

    Wokplɔ Kamran Shikhaliyev yi Salyan, afi si wohea to na asrafowo le le Azerbaijan.

  3. September 16, 2014

    Kamran Shikhaliyev gakpɔtɔ le ga me madzemadzee eye mekpɔ dze ƒe ɖeka si wòka nɛ be wòanɔ ga me la gɔme gɔ̃ hã o.

  4. April 16, 2014

    Wotso nya me be Kamran Shikhaliyev anɔ gakpɔ si me wohea to na asrafowo le le esi wògbe be yemawɔ asrafodɔ o ta.

  5. October 10, 2013

    Nutomedɔwɔƒe Si Kpɔa Asrafonyawo Gbɔ lé aƒetɔ Kamran Shikhaliyev de asrafodɔ me sesẽe eye wokplɔe yi asrafowo nɔƒe aɖe.

  6. March 12, 2013

    Wobu fɔ Yehowa Ðasefo si ŋkɔe nye Kamran Mirzayev be wòanɔ ga me ɣleti asieke le esi wògbe be yemaxɔ asrafo ƒe hehe o ta. Gake esi wònɔ ga me la, dziɖuɖua tsɔ gamenɔlawo ƒe agɔdzedzewo ke wo, eye esia wɔe be woɖe asi le eŋu do ŋgɔ na eƒe ɣeyiɣia.

  7. September 25, 2012

    Wobu fɔ Yehowa Ðasefo si ŋkɔe nye Fakhraddin Mirzayev eye woka ƒe ɖeka nɛ be wòanɔ ga me le esi wògbe asrafo ƒe hehexɔxɔ ta.

  8. September 8, 2010

    Wobu fɔ Yehowa Ðasefo si ŋkɔe nye Farid Mammadov be wòanɔ ga me ɣleti asieke le esi wògbe be yemaxɔ asrafo ƒe hehe o le dzitsinya ta la ta.

  9. August 19, 2009

    Wogalé Mushfig Mammedov ake le esi wògbe be yemaxɔ asrafo ƒe hehe o le dzitsinya ta la ta, eye wodee gaxɔ me do ŋgɔ na ʋɔnudɔdrɔ̃e, eye wogado fe nɛ ake esi wogabu fɔe zi evelia sia.

  10. March 7, 2008

    Senyala siwo ʋlia Mushfig Mammedov kple Samir Huseynov ta tsɔ woƒe nyawo yi Europa Amegbetɔ Ƒe Gomenɔamesiwo Ŋuti Ʋɔnudrɔ̃ƒe le esi Azerbaijan dziɖuɖua tsɔa nya ɖe ame siwo gbe be yemaxɔ asrafo ƒe hehe o le dzitsinya ta ŋuti la ta.

  11. October 4, 2007

    Wolé Yehowa Ðasefo si ŋkɔe nye Samir Huseynov de ga ɣleti ewo le esi wògbe be yemaxɔ asrafo ƒe hehe o le dzitsinya ta la ta.

  12. Ƒe 2006

    Wolé Yehowa Ðasefo si ŋkɔe nye Mushfig Mammedov de ga do ŋgɔ na ʋɔnudɔdrɔ̃e le esi wògbe be yemaxɔ asrafo ƒe hehe o le dzitsinya ta la ta, eye woɖe asi le eŋu ɣleti ade be woalé ŋku ɖe eŋu be agawɔ nu ma ake hã.