Dzo kpo yi emenuwo dzi

Dzo kpo yi emenu bubu dzi

Yehowa Ɖasefowo

Eʋegbe

JANUARY (DZOVE) 7, 2016
AZERBAIJAN

Dukɔ Ƒoƒuawo Ƒe Dɔwɔha Aɖe Bia Tso Azerbaijan Dziɖuɖua Si Be Wòaɖe Asi Le Aƒenɔ Zakharchenko Kple Aƒenɔ Jabrayilova Ŋu

Dukɔ Ƒoƒuawo Ƒe Dɔwɔha Aɖe Bia Tso Azerbaijan Dziɖuɖua Si Be Wòaɖe Asi Le Aƒenɔ Zakharchenko Kple Aƒenɔ Jabrayilova Ŋu

Dukɔ Ƒoƒuawo Ƒe Dɔwɔha Si Kpɔa Amedede Ga Madzemadzee Ƒe Nyawo Gbɔ bia tso Azerbaijan dziɖuɖua si be wòaɖe asi le aƒenɔ Irina Zakharchenko kple aƒenɔ Valida Jabrayilova ŋu. Dɔwɔhaa kpɔe be dziɖuɖua lé nyɔnu eve siawo de ga madzemadzee le woƒe mawusubɔsubɔ ƒe ablɔɖe si ŋuti dɔ wowɔ ŋutifafatɔe la tae. Ekpɔe hã be dziɖuɖua tɔ ŋku nyɔnu siawo le woƒe mawusubɔsubɔ ta, eye mewɔ ɖe xexemedukɔwo ƒe ɖoɖo ku ɖe nya dzɔdzɔe dɔdrɔ̃ na ame la dzi o. Menye wo léle de ga ŋu koe Dɔwɔha ƒe nyametsotsoa ku ɖo o, egblɔ hã be to ɖe sia ɖe si wòahe na wo le woƒe mawusubɔsubɔdɔwo wɔwɔ ta anye nu madzemadze wɔwɔ eye afia hã be ɖe wotɔ ŋku wo.

Dukɔ Ƒoƒuawo Ƒe Amegbetɔwo Ƒe Gomenɔamesiwo Ŋuti Kɔmiti bia tso Azerbaijan dziɖuɖua si va yi be wòaɖe asi le aƒenɔ Irina Zakharchenko ŋu, gake ɖeko dziɖuɖua gbe gbidii. Nyɔnu sia ƒe lãmesẽ meɖe mɔ nɛ be wòanɔ kodzoɖoɖoa me le January (Dzove) 7, 2016 dzi o. Ne wogadze kodzoɖoɖoa gɔme la, ɖe Ʋɔnudrɔ̃la Akram Gahramanov awɔ ɖe xexemedukɔwo ƒe sewo dzia?