Dzo kpo yi emenuwo dzi

Dzo kpo yi emenu bubu dzi

Yehowa Ɖasefowo

Eʋegbe

MARCH (TEDOXE) 3, 2014
RUSSIA

Russia Ƒe Nyagbugbɔdrɔ̃ƒe De Amegbetɔ Ƒe Gomenɔamesi Dzi Esi Wògbe Be Yemaxe Mɔ Ðe JW.ORG Nu O

Russia Ƒe Nyagbugbɔdrɔ̃ƒe De Amegbetɔ Ƒe Gomenɔamesi Dzi Esi Wògbe Be Yemaxe Mɔ Ðe JW.ORG Nu O

Le January (Dzove) 22, 2014 dzi la, Tver Nutome Ʋɔnudrɔ̃ƒe ƒe ʋɔnudrɔ̃la etɔ̃ te fli ɖe ʋɔnudrɔ̃ƒe suetɔ ƒe nyametsotso be woaxe mɔ ɖe Yehowa Ðasefowo ƒe nyatakakadzraɖoƒe si nye jw.org nu la me. * Nutome Ʋɔnudrɔ̃ƒea nɔ te ɖe sea dzi pɛpɛpɛ mu agbagba si dzem ʋɔnudrɔ̃la amesamala le vevie be yeaxe mɔ ɖe nyatakakadzraɖoƒea nu la ƒu anyi. Esia to vovo na ʋɔnu siwo Russia ʋɔnudrɔ̃ƒewo drɔ̃ le ƒe ʋɛ siwo va yi me.

Ale si dziɖuɖua da megbe na amewo wole fu ɖem na Yehowa Ðasefo siwo le Russia hele wo yome tim la do gã ɖe edzi kpata le August (Dasiamime) 7, 2013 dzi, esi Tver ƒe ʋɔnudrɔ̃ƒe suetɔ tso nya me be woaxe mɔ ɖe jw.org nu le nyadɔdrɔ̃ si xɔ miniti 25 pɛ ko me. Tver le Moscow ƒe dziehe eye wòdidi tso egbɔ kilometa 160. Womena nyanya Yehowa Ðasefowo ƒe teƒenɔlawo tso nyadɔdrɔ̃a ŋu o, eye mɔnukpɔkpɔ aɖeke mesu wo si woɖe wo ɖokuiwo nu le nya siwo ʋɔnudrɔ̃la amesamala tsɔ ɖe wo ŋu la me o. Yehowa Ðasefowo se nu tso mɔxexe ɖe nyatakakadzraɖoƒea nu ŋuti le nyadzɔdzɔwo me gaƒoƒo ʋɛ aɖewo ko do ŋgɔ na game si woɖo ɖi be woate ŋu abia be woagbugbɔ nya adrɔ̃ na yewo la na va yi le September (Anyɔnyɔ) 12, 2013 dzi. Ðasefoawo bia tso Tver Nutome Ʋɔnudrɔ̃ƒea si enumake be woagbugbɔ nya adrɔ̃ na yewo.

Le gbe si gbe wogbugbɔ nya drɔ̃ le January (Dzove) 22, 2014 dzi la, Nutome Ʋɔnudrɔ̃ƒea kpɔe be wotu afɔ Watchtower Bible and Tract Society of New York, Inc. si tɔ nyatakakadzraɖoƒea nye la ƒe gomenɔamesiwo, eye wòbia be woagbugbɔ nya la adrɔ̃ ale be akpa eveawo naɖe wo ɖokuiwo nu. Ʋɔnudrɔ̃la amesamala si Ʋɔnudɔdrɔ̃ Ƒe Dudɔwɔƒe kple Dudɔwɔƒe Si Kpɔa Dukɔmenyawo Gbɔ nɔ megbe na la, bia tso ʋɔnudrɔ̃ƒea si be wòabu nyatakakadzraɖoƒea be “edea aglãdzedze ƒe dzi ƒo” eye woaxe mɔ ɖe enu le Russia-dukɔ bliboa me. Gake Nutome Ʋɔnudrɔ̃ƒea ƒo eƒe nya siawo katã ƒu gbe.

Fuɖenamewo dze egɔme le dukɔ bliboa me—wozã se siwo ku ɖe dzidede ƒo be woadze aglã ɖe dziɖuɖu ŋu la madzemadzee ku ɖe Yehowa Ðasefowo ƒe subɔsubɔdɔwɔnawo ŋu. Tso ƒe 2009 me la, Russia dziɖuɖumegãwo wɔ dukɔa ƒe ɖoɖo si nye Dukɔa Ƒe Sedede Hena Nu Siwo Dea Aglãdzedze Ƒe Dzi Ƒo Nu Tsitsi la ŋu dɔ madzemadzee tsɔ na ale si woɖea fu na Yehowa Ðasefowo la gadzi ɖe edzi le dukɔa me godoo. Dziɖuɖumegãwo wɔ se sia ŋu dɔ madzemadzee:

  • hena wolé Yehowa Ðasefo 1,600 kple edzivɔwo;

  • hena woxe mɔ ɖe woƒe mawusubɔsubɔgbalẽ 70 nu;

  • hena woka aƒe 171 kple tadeaguƒewo me;

  • hena wogblẽ subɔsubɔwɔna 69 me tso ɣeaɖeɣi va se ɖe egbea.

Le Tver ƒe nya gome la, amesamalaa bia be woaxe mɔ ɖe nyatakakadzraɖoƒea nu elabe agbalẽ ade siwo wobu be ‘wodea aglãdzedze ƒe dzi ƒo’ la le edzi. Tsentralniy Dua Ƒe Ʋɔnudrɔ̃ƒe si le Tver nɔ te ɖe se ma dzi tso nya me le August (Dasiamime) 7, 2013 dzi be woaxe mɔ ɖe jw.org nu eye woabui de Agbalẽ Siwo Dziɖuɖua Buna Be Wodea Aglãdzedze Ƒe Dzi Ƒo la dome.

Edze ƒãa be nyametsotso sia gbɔ eme, elabe womena mɔnukpɔkpɔ ame siwo tɔe nye nyatakakadzraɖoƒea be woawɔ naneke tso nɔnɔmea ŋu o. Le kpɔɖeŋu me, woate ŋu abia tso wo si be woaɖe agbalẽ siwo wobe “wodea aglãdzedze ƒe dzi ƒo” la ɖa le woƒe nyatakakadzraɖoƒea hafi. Esi Nutome Ʋɔnudrɔ̃ƒea kpɔe be ame siwo tɔe nye nyatakakadzraɖoƒea ɖe agbalẽ siwo wobe “wodea aglãdzedze ƒe dzi ƒo” la katã le jw.org si Russiatɔwo zãna dzi la, mesesẽ nɛ kura be wòatso nya me be naneke meli si dzi woanɔ tɔ ɖo axe mɔ ɖe nyatakakadzraɖoƒea nu o. Tɔtrɔ megale nyametsotso mamlɛtɔ sia ŋu o, togbɔ be wona ɣleti ade amesamalaa be wòabia be woanɔ ŋku lém nyatakakadzraɖoƒea ŋu be wolé wɔwɔm ɖe sea dzi mahã hã.

Ðe wòanye be Tver Nutome Ʋɔnudrɔ̃ƒea ƒe nyametsotsoa fia be nu nyuiwo le ŋgɔ gbɔna?

Nu gbogbo aɖewo kpɔtɔ li wòle be woaɖɔ ɖo. Tver Nutomeʋɔnudrɔ̃ƒea ƒe ŋkukeke ɖe nyaa me nyuie kple nyametsotso dzɔdzɔe sia to vovo sãsãsã na ale si Russia ʋɔnudrɔ̃ƒe bubuwo tso nya me be woaxe mɔ na Yehowa Ðasefowo le nu gbogbo aɖewo gome. Europa Amegbetɔ Ƒe Gomenɔamesiwo Ŋuti Ʋɔnudrɔ̃ƒe bu fɔ Russia dziɖuɖua zi geɖe ɖe ale si wotua afɔ Yehowa Ðasefowo ƒe mawusubɔsubɔ ƒe ablɔɖe mee ta. Le esi teƒe be Russia dziɖuɖua nawɔ ɖe Europa Ƒe Ʋɔnudrɔ̃ƒea ƒe mɔfiamewo dzi la, ɖe wòyi edzi le afɔkpo tum amegbetɔ ƒe gomenɔamesiwo. Yehowa Ðasefowo tsɔ nya 23 ɖe Russia dziɖuɖua ŋuti fifia le Europa Ƒe Ʋɔnudrɔ̃ƒea.

Ðe wòanye be Tver Nutome Ʋɔnudrɔ̃ƒea ƒe nyametsotsoa fia be nu nyuiwo le ŋgɔ gbɔna? Yehowa Ðasefowo ada ŋku ɖi anɔ ale si Russia dziɖuɖua le nu wɔ ge ɖe nyametsotso sia kple Europa Ƒe Ʋɔnudrɔ̃ƒea ƒe nyametsotso siwo gbɔna ŋui ɖa.

^ mm. 2 Ne ʋɔnudrɔ̃ƒea xe mɔ ɖe nyatakakadzraɖoƒea nu hã la, amewo agate ŋu aʋui faa. Gake esia ana ŋusẽ setɔwo be woatsɔ nya ɖe ame sia ame si ade dzi ƒo na amewo be woazãe la ŋu be enye nu vlo wɔla.