Dzo kpo yi emenuwo dzi

Dzo kpo yi emenu bubu dzi

Yehowa Ɖasefowo

Eʋegbe

NAGORNO-KARABAKH

Wode Wo Ga Le Woƒe Xɔse Ta

Wode Wo Ga Le Woƒe Xɔse Ta

Nagorno-Karabakh dziɖuɖua léa sɔhɛ Yehowa Ðasefo siwo tsi axɔ asrafo ƒe hehe la dea ga le esi wogbe be yewomaxɔ asrafo ƒe hehe o le dzitsinya ta la ta. Dziɖuɖua meda asi ɖe gomenɔamesi sia dzi o eye mewɔ ɖoɖo hã be woate ŋu awɔ dukɔmevidɔ bubuwo ɖe asrafo ƒe hehexɔxɔ teƒe o. Esia na be woléa sɔhɛ Ðasefowo dea ga le esi wolé woƒe mawudzixɔsewo me ɖe asi hegbe be yewomatsɔ tu ɖe yewo haviwo ŋu o ta.

Agbagba Siwo Dze Be Yewoawɔ Dukɔmevidɔ Bubuwo Ðe Asrafo Ƒe Hehexɔxɔ Teƒe Medze Edzi O

Le January 29, 2014 dzi la, Askeran Nutoa Ƒe Asrafodɔwɔƒe sama Yehowa Ðasefo aɖe si ŋkɔe nye aƒetɔ Artur Avanesyan be wòava xɔ asrafo ƒe hehe. Le ŋkeke si kplɔe ɖo dzi la, aƒetɔ Avanesyan bia tso Nagorno-Karabakh Asrafodɔwɔƒea si be wòaɖe mɔ na ye yeawɔ dukɔmevidɔ bubuwo ɖe asrafo ƒe hehexɔxɔ teƒe. Senyala si ʋlia eta do go kple dziɖuɖumegãwo enumake ku ɖe dukɔmevidɔ bubu wɔwɔ ɖe asrafo ƒe hehexɔxɔ teƒe ƒe nya sia ŋu hedo susu ɖa be woaɖo aƒetɔ Avanesyan ɖe Armenia be wòayi aɖawɔ dukɔmevidɔ bubu ɖe asrafo ƒe hehexɔxɔ teƒe le afi ma, eye nyamedzodzroa nɔ afɔ tsɔ nyuie.

Esi aƒetɔ Avanesyan kpɔe be nya la le afɔ tsɔ ge ta la, eʋu yi Armenia eye wòŋlɔ agbalẽ bia tso Armenia Masis Dua Ƒe Asrafodɔwɔƒe si le February 13, 2014 dzi be woana yeawɔ dukɔmevidɔ bubuwo ɖe asrafo ƒe hehexɔxɔ teƒe. Aƒetɔ Avanesyan nɔ mɔ kpɔm be woakpe ye be yeneva Armenia dukɔa ƒe dɔwɔƒe si kpɔa dukɔmevidɔ bubuwo wɔwɔ ɖe asrafo ƒe hehexɔxɔ teƒe, gake ɖeko wosamae le July 14, 2014 dzi be neva Yerevan kpovitɔwo ƒe dɔwɔƒegã. Esi wòva ɖo kpovitɔwo ƒe dɔwɔƒegã la, kpovitɔwo tso Nagorno-Karabakh va nɔ elalam. Wolée hegbugbɔ kplɔe yi Nagorno-Karabakh. Le ŋkeke si kplɔe ɖo dzi la, wodee ga me do ŋgɔ na ʋɔnudɔdrɔ̃e eye wova kplɔe yi Nagorno-Karabakh Ʋɔnudrɔ̃ƒe.

Le nyaa drɔ̃ɣi la, wona wònya be ʋɔnudrɔ̃ƒea ɖe gbe be woadii akpɔ ahalée de ga ɣleti ene do ŋgɔ hafi ava drɔ̃ ʋɔnui. Ʋɔnudrɔ̃ƒea gaɖo kpe gbeɖeɖe ma dzi eye wolé aƒetɔ Avanesyan tu enumake. Ʋɔnudrɔ̃ƒea tu afɔ agbagba siwo katã wodze be womagalée de ga do ŋgɔ na ʋɔnudɔdrɔ̃e o la me keŋ.

Le September 30, 2014 dzi la, ʋɔnudrɔ̃ƒea bu fɔ aƒetɔ Avanesyan eye wòtso nya me be anɔ ga me ɣleti 30. Nyagbugbɔdrɔ̃ƒea hã da asi ɖe nyametsotso sia dzi. Esia wɔe be aƒetɔ Avanesyan tsɔ eƒe nya la yi Nagorno-Karabakh Ʋɔnudrɔ̃ƒe Kɔkɔtɔ, gake le December 25, 2014 dzi la, Ʋɔnudrɔ̃ƒe Kɔkɔtɔa hã gada asi ɖe nyametsotso ma ke dzi.

Nagorno-Karabakh dziɖuɖua yi edzi le ɖekakpuiwo lém de ga le esi wole wɔwɔm ɖe woƒe dzitsinya si wotsɔ Biblia na hehee ƒe mɔfiamewo dzi ta. Dziɖuɖua to esia wɔwɔ me le dadam le xexemedukɔwo ƒe ɖoɖo si ɖe mɔ be woawɔ dukɔmevidɔ bubuwo wɔwɔ ƒe ɖoɖo na ame siwo gbe be yewomaxɔ asrafo ƒe hehe o le dzitsinya ta la dzi.

Ɣeyiɣiawo

  1. December 25, 2014

    Nagorno-Karabakh Ʋɔnudrɔ̃ƒe Kɔkɔtɔ hã da asi ɖe edzi be aƒetɔ Artur Avanesyan ɖi fɔ.

  2. September 30, 2014

    Martakert, Nagorno-Karabakh Ʋɔnudrɔ̃ƒe bu fɔ aƒetɔ Artur Avanesyan eye wòtso nya me be anɔ ga me ɣleti 30.

  3. July 14, 2014

    Wolé aƒetɔ Artur Avanesyan le Armenia hegbugbɔ kplɔe yi Nagorno-Karabakh ale be woalée de ga hafi ava drɔ̃ ʋɔnui.

  4. December 30, 2011

    Wotso nya me be Karen Harutyunyan, si nye Ðasefo aɖe, si xɔ ƒe 18 la, anɔ ga me ɣleti 30 le asrafo ƒe hehexɔxɔ gbegbe le dzitsinya ta la ta.

  5. February 16, 2005

    Wolé Areg Avanesyan, si nye Yehowa Ðasefo la, tu le esi wògbe be yemaxɔ asrafo ƒe hehe o le dzitsinya ta la ta, eye woka ɣleti 48 nɛ be wòanɔ ga me.

  6. June 12-13, 2001

    Wolé Ðasefo etɔ̃ aɖewo siwo gbe be yewomaxɔ asrafo ƒe hehe o le dzitsinya la de ga ɣleti ade va ɖo ƒe ɖeka.