Dzo kpo yi emenuwo dzi

FEBRUARY 5, 2015
ARMENIA

Armenia Dze Dziɖuɖudɔ Si Menye Asrafodɔ O Ƒe Ðoɖo Gɔme Dzidzedzetɔe

Armenia Dze Dziɖuɖudɔ Si Menye Asrafodɔ O Ƒe Ðoɖo Gɔme Dzidzedzetɔe

Armenia-dziɖuɖua de dziɖuɖudɔ si menye asrafodɔ o wɔwɔ ƒe ɖoɖo aɖe to me na ame siwo gbe be yewomaxɔ asrafo ƒe hehe o le dzitsinya ta la ƒe ɖekae nye esia. Eye edze abe nuwo le afɔ tsɔm nyuie ene. Ame gbãtɔ siwo kpɔ gome le ɖoɖo yeye sia mee nye ɖekakpui Yehowa Ðasefowo eye wowɔ dɔ siwo ɖe vi na dukɔa le esi teƒe be woade wo gaxɔ me be wogbe be yewomaxɔ asrafo ƒe hehe o ta.

Tso ƒe 1985 me la, ne ɖekakpui Ðasefo siwo le Armenia la gbe be yewomaxɔ asrafo ƒe hehe o le dzitsinya ta la, tiatia ɖeka koe dzea ŋgɔ wo, eyae nye be woalé wo ade ga. Esi wònye be ɖoɖo aɖeke mele dukɔa ƒe se me be woate ŋu awɔ dziɖuɖudɔ bubu aɖe ɖe asrafowo ƒe hehexɔxɔ teƒe o ta la, wolé Yehowa Ðasefo siwo wu 450 de ga le ƒe 20 kple edzivɔ siwo va yi me. Zi geɖe la, wonɔa ga me le nɔnɔme sesẽtɔwo me. Nɔnɔme sia va trɔ le June 2013 me esi Armenia-dziɖuɖua va wɔ ɖoɖo be woate ŋu awɔ dziɖuɖudɔ bubuwo ɖe asrafo ƒe hehexɔxɔ teƒe.

October 23, 2013 dzie Armenia Dukɔa Ƒe Kɔmiti da asi ɖe ame 57 aɖewo siwo bia be woaɖe mɔ na yewo yewoawɔ dziɖuɖudɔ bubuwo ɖe asrafo ƒe hehexɔxɔ teƒe, siwo katã nye Yehowa Ðasefowo, ƒe biabiawo dzi. * Eye esiae nye zi gbãtɔ kɔmiti sia tso nya me alea. Emegbe Kɔmitia va da asi ɖe Ðasefo bubuwo hã ƒe biabiawo dzi. Ðekakpui Ðasefo 71 dze woƒe dɔawo gɔme le January 13, 2014 ƒe kwasiɖa me. Kaka ƒe 2014 nawu enu la, Ðasefo siwo wu 126 lae wɔ dziɖuɖudɔ siwo menye asrafodɔ o.

Ðoɖoa Le Afɔ Tsɔm Nyuie

Nu siwo ɖo kpe edzi be dziɖuɖudɔ bubuwo wɔwɔ ɖe asrafo ƒe hehexɔxɔ teƒe ƒe ɖoɖoa le afɔ tsɔm nyuie la dze kɔtɛe le Ðasefoawo ƒe dɔmemegãwo, dɔdzikpɔlawo kple dɔwɔhatiwo ƒe nyagbɔgblɔwo me. Ame siawo de dzesi ɖekakpui Ðasefo siawo ƒe kutrikuku, kpekpeɖeŋu siwo wonaa amewo kple woƒe nɔnɔme nyuiwo. Dukɔa ƒe Kɔmitia me tɔ geɖewo gblɔ be dɔ siwo wɔm Ðasefoawo le la le vi ɖem na Armenia-dziɖuɖua eye wodoa vevie dɔ wɔna.

  • “Miele dɔ gã aɖe wɔm na dukɔa, evɔ fetu sue aɖe ko miexɔna. Edze ƒãa be dɔ sesẽ wɔlawoe mienye.”​—Yerevan/Shengavit Nutomedɔwo ƒe dɔdzikpɔla.

  • “Eme nyo na mi ŋutɔ! Miedzea agbagba be yewoanɔ agbe ɖe Kristotɔwo ƒe sewo nu, evɔ miegadzea agbagba vevie be yewoawɔ nu siwo aɖe vi na mia haviwo hã.”​—Vidzikpɔla le tsɔ̃eviwo nɔƒe si Ðasefowo wɔ dɔ le.

  • “Ðe miaƒe hametɔ aɖewo gali siwo le abe miawo enea? Mina woava wɔ dɔ nam!”​—Yerevan/Arabkir Nutomedɔwo ƒe dɔmemegã.

Ðasefo siwo le dziɖuɖudɔ si menye asrafodɔ o wɔm la kplɔ Yerevan, Dukɔa Ƒe Ablɔ me eye wodzra eme ɖo nyuie.

Ðasefo siwo wɔ dziɖuɖudɔ bubuwo ɖe asrafo ƒe hehexɔxɔ teƒe ŋutɔ hã gblɔ nya nyui geɖewo tso dɔ siwo wowɔ la ŋu.

  • “Ale si nye dɔwɔhatiwo lɔ̃am hedea bubu ŋunye la doa dzidzɔ nam ŋutɔ. Esi medze dɔ tsi aƒe me gbe ɖeka la, nye dɔwɔhatiwo yɔm be yewoakpɔ nye fɔfɔme ɖa. Mebu esiawo katã be wonye yayra nam, elabe esiawo katã kpena ɖe ŋunye mesubɔa Mawu fuɖename aɖeke manɔmee.”​—Gevorg Taziyan, si wode dɔ asi na be wòanye ʋukula ƒe kpeɖeŋutɔ na Dziɖuɖudɔwɔƒe Si Kpɔa Nyadzɔdzɔ Kpatawo Gbɔ ƒe Alɔdze Si Le Nutoa Me

  • “Le dɔwɔƒewo la, mí kple míaƒe dɔdzikpɔlawo kple dɔwɔhatiwo dome le nyuie. Esi míekpɔ ale si wotsɔa ɖe le eme na mí la, míawo hã míedzea agbagba tsɔa ɖe le eme na wo. Ɣeaɖewoɣi la, wodea dɔ aɖewo mía si, togbɔ be dɔ mawo menye mía tɔ o hã la, míewɔa wo faa.”​—Samvel Abrahamyan, si wode dɔ asi na be wòanye Sevan Tagbɔdɔlélawo Ƒe Kɔdzi ƒe abɔmedzraɖola.

  • “Mí ame 13 aɖewoe te dɔwɔwɔ le Dziɖuɖudɔwɔƒe Si Kpɔa Nyadzɔdzɔ Kpatawo Gbɔ le January 14, 2014 dzi. Tso ɣemaɣi va se ɖe fifia la, mí kple ame sia ame dome le nyuie ŋutɔ. Masɔmasɔ aɖeke mele mí kple dɔdzikpɔlawo dome o. Ale si míewɔa dɔ ɖekae la wɔa dɔ ɖe wo dzi ŋutɔ.”​—Artsrun Khachatryan, si wode dɔ asi na be wòanye abɔmedzraɖola le Dziɖuɖudɔwɔƒe Si Kpɔa Nyadzɔdzɔ Kpatawo Gbɔ.

Nu siwo koŋ gbɔ wòtso be Armenia-dziɖuɖua ƒe dziɖuɖudɔ bubuwo wɔwɔ ɖe asrafo ƒe hehexɔxɔ teƒe ƒe ɖoɖoa tsɔ afɔ nyuie lae nye ale si dɔdzikpɔlawo kple dɔmemegãwo wɔ nu aduadu hekpe ɖe Yehowa Ðasefoawo ƒe kutrikuku le dɔ me kple woƒe nɔnɔme nyuiwo ŋu. Yehowa Ðasefo siwo le Armenia kpɔ ŋudzedze ɖe mɔnukpɔkpɔ si dziɖuɖua na wo be woawɔ dziɖuɖudɔ siwo mana be woada woƒe mawudzixɔsewo dzi o alo woade wo ga le esi wogbe be yewomaxɔ asrafo ƒe hehe o le dzitsinya ta la ŋu.

^ mm. 4 Ne èdi be yeaxlẽ nu geɖe tso nya sia ŋu la, xlẽ nyati si nye “Armenia-dziɖuɖua Wɔ Ðoɖo Be Amewo Nawɔ Dziɖuɖudɔ Siwo Menye Asrafodɔ O