Dzo kpo yi emenuwo dzi

Dzo kpo yi emenu bubu dzi

Yehowa Ɖasefowo

Eʋegbe

MAY 13, 2015
UNITED STATES (ÉTATS-UNIS)

Yehowa Ðasefowo Ðo Amerika Tokunɔgbegɔmeɖeƒe Le Florida

Yehowa Ðasefowo Ðo Amerika Tokunɔgbegɔmeɖeƒe Le Florida

FORT LAUDERDALE, Florida—Le November 14, 2014 dzi la, Yehowa Ðasefowo te Amerika Tokunɔgbegɔmeɖeƒea ɖeɖe tso woƒe Gbetakpɔxɔ Habɔbɔa Ƒe Hehenaƒe si le Patterson le New York yi Fort Lauderdale si le Florida ƒe dɔwo gɔme. Yehowa Ðasefowo dze Biblia kple Biblia-srɔ̃gbalẽwo gɔme ɖeɖe ɖe Amerika Tokunɔgbe me le Patterson tso ƒe 1995 me ke. Le ɣleti ʋɛ siwo va yi me la, Ðasefoawo te asitɔtrɔ le woƒe teƒe si le Fort Lauderdale la ŋu, woɖo dɔwɔxɔ yeyewo kple dɔwɔƒe si woléa nuwo ɖe mɔ̃ dzi le ɖe teƒe sia. Tso May 2015 me la, Ðasefoawo ƒe Amerika Tokunɔgbegɔmeɖeƒea dze dɔ gɔme bliboe le teƒe sia.

Ðasefoawo daa Amerika Tokunɔgbe me videowo ɖe internet dzi le woƒe nyatakakadzraɖoƒe si nye jw.org, eye wowɔa DVD geɖewo hã. Wozãa wo edziedzi le woƒe kwasiɖa sia kwasiɖa ƒe kpekpe siwo wowɔna le tokunɔgbehame 500 kple edzivɔ siwo le xexea me godoo me la me, eye wogazãa wo le woƒe takpekpe sue kple gã siwo wowɔna ƒe sia ƒe hã me.

Aƒetɔ Jonathan Galvez si nye Ðasefoawo ƒe Amerika Tokunɔgbegɔmeɖeƒea dzi kpɔla si le Florida gblɔ be: “Míaƒe taɖodzinue nye be míana ame siwo katã zãa Amerika Tokunɔgbea nase míaƒe videoawo gɔme bɔbɔe, eɖanye dukɔ ka ke mee wotso alo afi kae wode suku se ɖo o.” Egblɔ yi edzi be: “Wozãa Amerika Tokunɔgbea le dukɔ siwo ade 45 me, eye abe ale si ko ame siwo ƒoa nu ƒe gbewo toa vovo ene la, nenema kee dzesi siwo tokunɔwo zãna tsɔ gblɔa nyawoe hã toa vovo tso teƒe yi teƒe. Esi míeɖe míaƒe gbegɔmeɖeƒea yi Fort Lauderdale fifia la, míaƒe gbegɔmeɖelawo va le nuto si me Amerika Tokunɔgbea zãla siwo tso dukɔ vovovowo me la sɔ gbɔ ɖo wu la me.”

Le ƒe 2014 me la, Frank Bechter, si nye agbalẽnyalagã le hadomenyawo kple gbegbɔgblɔ ŋuti nyawo me la de Yehowa Ðasefowo ƒe tokunɔgbe me takpekpe gã aɖe si wowɔ le Richmond si le Virginia kple susu be yeaku nu me tso tokunɔgbewo kple tokunɔwo ŋu. Nunyalagã Bechter gblɔ be, “Ale si miaƒe habɔbɔa léa fɔ ɖe Amerika Tokunɔgbe gɔme ɖeɖe kple tokunɔgbe me wɔna adodoeawo wɔwɔ ŋu dze ƒãa le Richmond wɔnaa me, vevietɔ le ale si miezã mawunyakpukpuiwo ƒe video siwo gɔme woɖe nyuie la edziedzi ta. Mekpɔe be Amerika Tokunɔgbe si wozã la de ŋgɔ ŋutɔ.” Eyi edzi be, “Mekpɔ ŋudzedze ɖe Ðasefoawo ƒe kutrikuku le Biblia la gɔme ɖeɖe nyuie ɖe Amerika Tokunɔgbe me la ŋu ŋutɔ, elabe ŋudɔwɔnu vevi aɖe wònye le míaƒe dukɔa kple xexe bliboa ƒe ŋutinya me. Eye mexɔe se be ele be tokunɔwo hã ƒe asi nasu ŋudɔwɔnu vevi siwo ɖea vi na ame bubuwo le xexea me godoo la dzi.”

Yehowa Ðasefowo ƒe gbegɔmeɖela siwo le xexea me godoo ɖea video geɖewo gɔme ɖe tokunɔgbe 80 aɖewo me eye womaa wo na amewo femaxee. Yehowa Ðasefowo wɔ JW Library Sign Language dɔwɔnu hã, eye amewo tea ŋu wɔa tokunɔgbe me video siwo le jw.org nyatakakadzraɖoƒea ƒe kɔpi, ɖoa wo ɖe ɖoɖo nu heƒoa wo le edzi bɔbɔe.

Woƒe Kadodowo:

Xexea Me Godoo: J. R. Brown, Office of Public Information, tel. +1 718 560 5000