Yehowa Ðasefowo ƒe Dɔdzikpɔhaa me tɔ Anthony Morris ɖe Ŋɔŋlɔ Kɔkɔeawo—Xexe Yeye Gɔmeɖeɖe Biblia yeyea ɖe go.

LVIV, Ukraine—Togbɔ be wonɔ aʋa wɔm le Ukraine ƒe ɣedzeƒenutowo me hã la, Yehowa Ðasefowo ƒo ƒu ɖe Lviv le July 4 va se ɖe 6, 2014 dzi hewɔ “Yi Edzi Nànɔ Mawu Fiaɖuƒea Dim Gbã!” Nutome Gã Takpekpe. Yehowa Ðasefowo ƒe Dɔdzikpɔhaa me tɔ Anthony Morris ɖe Ŋɔŋlɔ Kɔkɔeawo—Xexe Yeye Gɔmeɖeɖe Biblia yeye si gɔme woɖe ɖe egbegbe Ukrainegbe me la ɖe go.

Ðasefowo ƒe alɔdzedɔwɔƒe si le dukɔa me wɔ ɖoɖo ale be amewo kpɔ gome le wɔnaa me to videokadodo dzi le du enyi me tsɔ kpe ɖe teƒe 62 bubuwo ŋu le Donetsk, afi si aʋa le kpe ɖem le. Ame siwo kpɔ gome le takpekpea me le afi si wowɔe le kple ame siwo kpɔ gome le eme to videokadodo dzi la ƒe agbɔsɔsɔe nye 82,832, eye ame siwo nɔ Lviv bɔlƒoƒea ɖeɖe dzaa ƒe agbɔsɔsɔe nye 18,336. Nyɔnyrɔxɔlawo ƒe agbɔsɔsɔe nye 1,068.

Ame 18,336 ye de “Yi Edzi Nànɔ Mawu Fiaɖuƒea Dim Gbã!” Nutome Gã Takpekpe le Lviv Fefewɔƒe.

Eva hiã be woatɔ te takpekpea ƒe ŋkeke gbãtɔ ƒe wɔnawo sẽe esi wose be woɖi bɔmb ɖe takpekpewɔƒea, eye takpekpea vavalawo dzo le bɔlƒoƒea enumake. Ame 16,000 kple edzivɔ siwo va ƒo ƒu ɖe bɔlƒoƒea la dzo le miniti 11 pɛ ko me, gake esi dziɖuɖumegãwo ɖo kpe edzi na wo be alakpanyae bɔmb ƒe nyaa nye la, takpekpea gadze egɔme enumake.

Vasyl Kobel, si nye Yehowa Ðasefowo ƒe nyanuɖela le Ukraine gblɔ be: “Dzi dzɔ mí ale gbegbe be míewɔ ɖoɖo be ame geɖewo va kpɔ gome le takpekpea me. Wɔna ƒe akpa vevitɔe nye Ŋɔŋlɔ Kɔkɔeawo—Xexe Yeye Gɔmeɖeɖe Biblia yeye si míexɔ. Woɖe Biblia sia ƒe Eŋlisigbe me tɔ ɖe go le October 2013 me. Dzi dzɔ mí ŋutɔ be míagblɔ Biblia me mɔkpɔkpɔ si ku ɖe ŋutifafa si ava le etsɔme la ŋu nya na míaƒe aƒelikawo le ɣeyiɣi sesẽ siawo me le míaƒe dukɔa ƒe ŋutinya me.”

Woƒe Kadodowo:

Xexea Me Godoo: J. R. Brown, Office of Public Information, tel. +1 718 560 5000

Ukraine: Vasyl Kobel, tel. +38 032 240 9323