Dzo kpo yi emenuwo dzi

APRIL 24, 2015
MEXICO

Woɖe Kristotɔwo Ƒe Hela Ŋɔŋlɔawo—Xexe Yeye Gɔmeɖeɖe Ðe Go Le Tzotzilgbe Me Le Mexico

Woɖe Kristotɔwo Ƒe Hela Ŋɔŋlɔawo—Xexe Yeye Gɔmeɖeɖe Ðe Go Le Tzotzilgbe Me Le Mexico

Geoffrey Jackson, si nye Yehowa Ðasefowo ƒe Dɔdzikpɔhaa me tɔ, ɖe Kristotɔwo Ƒe Hela Ŋɔŋlɔawo—Xexe Yeye Gɔmeɖeɖe Biblia ɖe go le Tzotzilgbe me. Edo Jerkil, si nye Tzotziltɔwo ƒe awu si wotsɔa alẽfu wɔna.

MEXICO CITY—Yehowa Ðasefowo ɖe Kristotɔwo Ƒe Hela Ŋɔŋlɔawo—Xexe Yeye Gɔmeɖeɖe Biblia ɖe go le Tzotzilgbe me le takpekpe gã aɖe si wowɔ le December 26-28, 2014 le Tuxtla Gutierrez le Chiapas la me. Wowɔ “Yi Edzi Nànɔ Mawu Fiaɖuƒea Dim Gbã!” Nutome Gã Takpekpe le Tzotzilgbe si nye Mayagbe ƒomevi aɖe la me eye ame bubuwo kpɔ gome le wɔnawo me to videokadodowo dzi le takpekpewɔƒe bubu le Comitan le Chiapas. Menye Biblia koe takpekpea vala 5,073 xɔ o, woxɔ agbalẽ kple nu yeye bubu ade siwo woɖe ɖe go le Tzotzilgbe me hã.

Gamaliel Camarillo, si nye Yehowa Ðasefowo ƒe nyanuɖela le Mexico, gblɔ be: “Dzi dzɔ mí ale gbegbe esi woɖe Kristotɔwo Ƒe Hela Ŋɔŋlɔawo—Xexe Yeye Gɔmeɖeɖe ɖe go le Tzotzilgbe me na mí. Míele mɔ kpɔm be míana Biblia sia mía havi Tzotzilgbedolawo.”

Ðasefo Tzotzilgbedolawo le Kristotɔwo Ƒe Hela Ŋɔŋlɔawo—Xexe Yeye Gɔmeɖeɖe Biblia yeye si woɖe ɖe go le woƒe takpekpe gã me le Chiapas le Mexico la zãm.

Mexico-dukɔa ƒe Hahoonufiafia Ƒe Dɔwɔƒe gblɔ be ame 350,000 kple edzivɔwoe doa Tzotzilgbe le Baja California, Campeche, Chiapas, Oaxaca kple Veracruz. Be Yehowa Ðasefowo nate ŋu agblɔ Biblia me gbedeasia na Tzotzilgbedolawo la, woɖo Tzotzil-gbegɔmeɖeƒe le San Cristobal de las Casas le Chiapas, eye gbegɔmeɖelawo nye ame 15. Le ƒe 2002 me la, Ðasefoawo ɖe woƒe agbalẽ gbãtɔ ɖe go le Tzotzilgbe me. Yehowa Ðasefowo da Tzotzilgbe me agbalẽwo kple nu bubu siwo wu 60 ɖe woƒe nyatakakadzraɖoƒe si nye jw.org.

Woƒe Kadodowo:

Xexea Me Godoo: J. R. Brown, Office of Public Information, tel. +1 718 560 5000

Mexico: Gamaliel Camarillo, tel. +52 555 133 3048