Dzo kpo yi emenuwo dzi

Dzo kpo yi emenu bubu dzi

Yehowa Ɖasefowo

Eʋegbe

DECEMBER 3, 2012
ARMENIA

Wobia Tso Armenia Dziɖuɖua Si Be Wòaxe Fe Na Yehowa Ðasefo 17

Wobia Tso Armenia Dziɖuɖua Si Be Wòaxe Fe Na Yehowa Ðasefo 17

STRASBOURG le France—Le November 27, 2012 dzi la, Europa Amegbetɔ Ƒe Gomenɔamesiwo Ŋuti Ʋɔnudrɔ̃ƒea tso nya me be ele be Armenia dziɖuɖua naxe home si nye euro 112,000 (dɔlar 145,226) ɖe nu siwo dome wògble kple senyawo ƒe fe na ame 17 siwo gbe be yewomawɔ asrafodɔ o le woƒe dzitsinya ta.

Le ƒe 2005 me la, ɖekakpui 17 siwo nye Yehowa Ðasefowo nɔ dziɖuɖudɔ bubu aɖe wɔm ɖe asrafodɔ teƒe. Gake esi wova de dzesii be dɔ sia le asrafowo ƒe dzikpɔkpɔ te, eye wòna yewoƒe dzitsinya le fu ɖem na yewo la, wodzudzɔ dɔa wɔwɔ. Esia na wolé wo hekplɔ wo yi ʋɔnui. Wozi wo dometɔ aɖewo dzi ɖe ga me ɣleti geɖe va se ɖe esime wowu nyaa dɔdrɔ̃ nu, eye mlɔeba la, wode wo dometɔ 11 mɔ́. Ame siawo dometɔ aɖewo anɔ mɔ́ me ƒe eve eye ɖewo anɔe ƒe etɔ̃.

Europa Ƒe Ʋɔnudrɔ̃ƒea tso nya me be ale si wolé ame siawo hekplɔ wo yi ʋɔnu be wonye nu vlo wɔlawo hede wo mɔ́ la mele se nu o, elabena ɣemaɣi le ƒe 2005 me la, se aɖeke menɔ Armenia dziɖuɖua si si gblɔ be enye nu vlo wɔwɔ be ame nagbe be yemawɔ dziɖuɖudɔ bubu aɖe ɖe asrafodɔ teƒe o. Ʋɔnudrɔ̃ƒea tso nya me be Armenia dziɖuɖua tu afɔkpo Yehowa Ðasefoawo ƒe ablɔɖe kple dedienɔnɔ si le ɖekawɔwɔ me kple Europa Amegbetɔ Ƒe Gomenɔamesiwo Ŋuti Ðoɖo ƒe Se 5 lia. Togbɔ be Armenia dziɖuɖua te fli ɖe nu vlo wɔwɔ ƒe nya si wòtsɔ ɖe ame 17 ŋu me hã la, egbe be yemaxe fe aɖeke na wo ɖe fɔbubu wo be wonye nu vlo wɔlawo kple wo dede mɔ́ madzemadzee la ta o. Le ema yome me la, Ʋɔnudrɔ̃ƒea bia tso Armenia dziɖuɖua si be wòaxe fe na wo ɖe wo ŋu gbegblẽ kple ga si wogblẽ le senyawo me la na wo.

Wodrɔ̃ ʋɔnu sia le ʋɔnu etɔ̃ bubu siwo ku ɖe akpaɖekedzimademade ƒe nyawo ŋu si me Europa Ƒe Ʋɔnudrɔ̃ƒea tso nya me wòyi ɖe Armenia dziɖuɖua dzi la megbe. Le nyaa dɔdrɔ̃ eneawo katã me la, Armenia dziɖuɖumegãwo sẽ ŋuta le Yehowa Ðasefo siwo gbe be yewomawɔ asrafodɔ le dzitsinya ta o la ŋu hetu nu kpli wo abe nu vlo wɔla vɔ̃ɖiwoe wonye ene.

André Carbonneau, si nye ame siwo nu wotso la ƒe senyala gblɔ be: “Ale si Europa Ƒe Ʋɔnudrɔ̃ƒea drɔ̃ nyae ɖee fia be wowɔ nu madzɔmadzɔ ɖe Yehowa Ðasefowo ŋu. Dukɔ siwo katã le Europa Aɖaŋudehaa me kple dukɔwo abe Eritrea, South Korea kpakple Titina Asia dukɔwo asrɔ̃ nu tso ale si nyametsotsoawo va yi ɖe Armenia dziɖuɖua dzi le Europa Ƒe Ʋɔnudrɔ̃ƒea ku ɖe gome si le Yehowa Ðasefowo si be woagbe asrafodɔ la me.”

Míaƒe Kadodowo:

David Semonian, Office of Public Information, tel. +1 718 560 5000

Armenia: Tigran Harutyunyan, tel. +374 93 900 482