Dzo kpo yi emenuwo dzi

JUNE 17, 2015
NEPAL

Yehowa Ðasefo Siwo Tso Dukɔ Vovovowo Me Naa Kpekpeɖeŋu Ame Siwo Ŋu Nepal Anyigbaʋuʋua Gblẽ Nu Le

Yehowa Ðasefo Siwo Tso Dukɔ Vovovowo Me Naa Kpekpeɖeŋu Ame Siwo Ŋu Nepal Anyigbaʋuʋua Gblẽ Nu Le

KATHMANDU si le Nepal—Yehowa Ðasefo siwo tso Bangladesh, Germany (Allemagne), India, Japan, Switzerland (Suisse) kple Amerika wɔ ɖeka le kpekpeɖeŋu nam ame siwo ŋu anyigba si ʋuʋu le Nepal le April 25, 2015 dzi gblẽ nu le. Anyigbaʋuʋu sia wu ame akpe geɖewo, eye Yehowa Ðasefo ɖeka kple via eve hã ƒe agbe tsi eme. Anyigba gaʋuʋu le Nepal ake le May 12, 2015 dzi. Gake Ðasefoawo gblɔ be nu vevi boo mewɔ yewoƒe hamevi aɖeke le anyigbaʋuʋu evelia sia me o, wo dometɔ aɖeke meku o, eye megblẽ nu boo le woƒe nunɔamesiwo hã ŋu o.

Yehowa Ðasefowo naa nuɖuɖu woƒe haxɔsetɔwo kple ame bubu siwo ŋu anyigbaʋuʋua gblẽ nu le la zi eve gbe sia gbe.

Le ŋkeke si kplɔ anyigbaʋuʋu gbãtɔa ɖo la, Yehowa Ðasefowo ƒe alɔdzedɔwɔƒe si le Nepal ƒe ame dɔdɔwo yi ɖakpɔ woƒe hame ɖe sia ɖe me tɔwo ɖa le Kathmandu Balime, si nye afi si anyigbaʋuʋua nu sẽ wu le ne woanya ame siwo ŋu anyigbaʋuʋua gblẽ nu le la ƒe hiahiãwo. Anyigbaʋuʋua gbã Ðasefowo ƒe aƒe 38 keŋkeŋ eye wògblẽ nu le woƒe aƒe 126 bubuwo hã ŋu. Wona dzeƒe woƒe hametɔ siwo ƒe aƒewo dome gblẽ la le woƒe haxɔsetɔwo ƒe aƒe me, eye wona dzeƒe wo dometɔ bubuwo hã le woƒe tadeaguƒe siwo woyɔna be Fiaɖuƒe Akpatawo me kple agbadɔ siwo wotu ɖe dogbadzi la me. Nepal alɔdzedɔwɔƒea te nuɖuɖuwo lɔlɔ yi na ame siwo dzi nu sia dzɔ ɖo. Eteƒe medidi o, nuɖuɖuawo va sɔ gbɔ ɖe edzi esi woƒe hametɔ siwo le Bangladesh, India kple Nepal ƒe du siwo nye Birgunj, Damauli, Mahendranagar kple Pokhara me hã lɔ nuɖuɖuwo vae. Woɖo Kpekpeɖeŋunakɔmiti aɖe si le lɔlɔ̃nu faa dɔwɔla siwo tso India, Japan kple Nepal ƒe dɔwo dzi kpɔm wole xɔ tum na ame siwo ŋu anyigbaʋuʋua gblẽ nu le be woanɔ zazãm gbɔ.

Lɔlɔ̃nu faa dɔwɔla siwo tso Yehowa Ðasefowo ƒe alɔdzedɔwɔƒe si le Nepal le kpekpeɖeŋunanu siwo wolɔ tso Nepal ƒe du si nye Birgunj me la nu ƒom ƒu.

Aƒetɔ Reuben Thapaliya, si nye Yehowa Ðasefowo ƒe nyanuɖela le Nepal, gblɔ be: “Menye ame siwo ŋu anyigbaʋuʋua gblẽ nu le la ƒe ŋutilãmehiahiãwo ŋu koe míetsi dzi ɖo o, míetsi dzi ɖe ale si míado ŋusẽ wo le mawusubɔsubɔ me hã ŋu. To vovo na tsi, nuɖuɖu kple mlɔƒe didi na ameawo la, míetsɔ Biblia me nyawo hã le akɔ fam na wo.” Aƒetɔ Gary Breaux, si wodɔ ɖa tso Yehowa Ðasefowo ƒe dɔwɔƒegã ɖi tsa to nuto si me anyigbaʋuʋua gblẽ nu le la me le May 2 va se ɖe May 5, 2015 dzi, eye wòyi ɖakpɔ woƒe hamewo kple ƒome ɖekaɖekawo ɖa. Le May 4, 2015 dzi la, aƒetɔ Breaux ƒo nuƒo tɔxɛ aɖe si wotu ɖe Biblia dzi eye amewo kpɔ wɔnaa tẽe to videokadodowo dzi le hame siwo le nuto bubuwo me hã me. Tsɔ kpe ɖe eŋu la, aƒetɔ Kenji Chichii si wodɔ ɖa tso Yehowa Ðasefowo ƒe alɔdzedɔwɔƒe si le Japan hã va ɖo le May 5, 2015 dzi. Eya hã yi ɖakpɔ ƒomewo ɖa eye wòƒo nuƒo siwo wotu ɖe Biblia dzi tsɔ de dzi ƒo na wo.

Ame dɔdɔ si tso Yehowa Ðasefowo ƒe dɔwɔƒegã Gary Breaux (le ɖusime), le ŋku lém ɖe nu siwo gblẽ le aƒe aɖe ŋu la ŋu.

Yehowa Ðasefowo ƒe alɔdzedɔwɔƒe si le Germany dɔ Yehowa Ðasefo aɖewo ɖa, wo dometɔ ɖeka nye ɖɔkta si dea ame alɔ̃ me, ɖeka nye amekola, ɖeka hã nye dɔnɔdzikpɔla eye bubu hã nye dɔnɔdzikpɔla si kpɔa nudzɔdzɔ kpatawo gbɔ. Ame siawo zãa atike siwo Ðasefo siwo le Bangladesh, India kple Japan ɖo ɖa la kple dɔwɔnu siwo wozãna le amekoko kple dɔwɔwɔ na ame siwo xɔ abi vevie me siwo wotea ŋu tsɔna yia teƒeteƒewo bɔbɔe la tsɔ kpɔ ame siwo dze afɔku la gbɔ le Fiaɖuƒe Akpatawo me le afi si anyigbaa ʋuʋu le, eye wowɔ dɔ aduadu kple Nepal Kpekpeɖeŋunakɔmiti la.

Lɔlɔ̃nu faa dɔwɔlawo le nuɖuɖu nam amewo le Fiaɖuƒe Akpata me afi si woxɔ ame siwo ŋu anyigbaʋuʋua gblẽ nu le la ɖo.

Aƒetɔ J. R. Brown, si nye Yehowa Ðasefowo ƒe nyanuɖela le woƒe dɔwɔƒegã gblɔ be: “Míaƒe kpekpeɖeŋunadɔa ayi edzi ɖaa, elabena míenyae be ame siwo ŋu anyigbaʋuʋua gblẽ nu le la hiã nu geɖe wu ŋutilãmenuwo ko. Míaƒe haxɔsetɔ siwo le Nepal kple ame bubu siwo tsi agbe le anyigbaʋuʋu siawo me ate ŋu aka ɖe edzi be míayi edzi atsɔ Biblia me nyawo anɔ akɔ fam na yewo ahanɔ ŋutilãmekpekpeɖeŋu hã nam yewo. Míaŋlɔ wo be o, eye míaɖo ŋku wo dzi le míaƒe gbedodoɖawo me.”

Woƒe Kadodowo:

Xexea Me Godoo: J. R. Brown, Office of Public Information, tel. +1 718 560 5000

Germany: Wolfram Slupina, tel. +49 6483 41 3110

Japan: Ichiki Matsunaga, tel. +81 46 233 0005

Nepal: Reuben Thapaliya, tel. +977 9813469616