Ðe wò hã nèsena le ɖokuiwò me abe Jeanette enea? Ne nenemae la, ke ate ŋu adzɔ be nàke ɖii be menye ɖe wowɔ xexea kple emenuwo o. Nyateƒeae nye be ame aɖeke medina be woabu ye bometsila o. Nu kae akpe ɖe ŋuwò?

•  Amenutsonyawo

•  De ŋugble tso wò dzixɔsewo ŋu

•  Nu siwo akpe ɖe ŋuwò nàdzro kpeɖodziawo me

•  Nya siwo hawòtiwo gblɔ

1. Ne èxɔe se be ɖe wowɔ xexea la, ke ètsi tsitre ɖe dzɔdzɔmeŋutinunya ŋu.

“Nye nufiala gblɔ be ame siwo ɖɔe ale gbegbe be womate ŋu aɖe ale si xexemenuwo wɔa dɔe gɔme o lae xɔnɛ sena be ɖe wowɔ xexea kple emenuwo”​—Maria.

Nu si wòle be nànya: Ame siwo gblɔa nya mawo la menya ale si tututu nyaa le o. Dzɔdzɔmeŋutinunyala xɔŋkɔwo abe Galileo kple Isaac Newton ene gɔ̃ hã xɔe se be Wɔla aɖe li. Woƒe dzixɔse sia mewɔe be womegalɔ̃ dzɔdzɔmeŋutinunya o. Nenema kee, dzɔdzɔmeŋutinunyala siwo li egbea dometɔ aɖewo lɔ̃ dzɔdzɔmeŋutinunya vevie eye wogaxɔe se hã be ɖe wowɔ xexemenuwo.

Te esia kpɔ: Ŋlɔ “Aɖe Ƒe Xɔse” (nenɔ dzesi siawo “” me) le Gbetakpɔxɔ INTERNET DZI AGBALẼDZRAÐOƑE ƒe nudinyaŋlɔƒe ne nàkpɔ dzɔdzɔmeŋutinunyala kple atikewɔla siwo xɔe se be ɖe wowɔ xexea kple emenuwo la dometɔ aɖewo. De dzesi nu siwo kpe ɖe wo ŋu woxɔe se nenema.

Nya vevitɔ: Ne èxɔe se be ɖe wowɔ xexea kple emenuwo la, mefia be ètsi tsitre ɖe dzɔdzɔmeŋutinunya ŋu o. Le nyateƒe me la, nusɔsrɔ̃ tso dzɔdzɔmenuwo ŋu ana nàkpɔ kpeɖodzi geɖe be ɖe wowɔ xexea kple emenuwo.​—Romatɔwo 1:​20.

2. Ne èxɔe se be ɖe wowɔ xexea abe ale si Biblia gblɔe ene la, ke amewo abu be mawudzixɔsela zazɛ̃nyahelae nènye.

“Ame geɖewo bua ame siwo xɔe se be ɖe wowɔ xexea be womele ɖeke me nyam o. Wobua nya siwo le Mose Ƒe Agbalẽ Gbãtɔ me la nyakpakpawo.”​—Jasmine.

Nu si wòle be nànya: Ame geɖe mesea nya si Biblia gblɔ tso xexemewɔwɔ ŋu la gɔme o. Le kpɔɖeŋu me, mawudzixɔsela aɖewo hã gblɔna be nyitsɔ laa koe wowɔ anyigba eye ŋkeke ade siwo wotsɔ wɔ anyigbadzinuwo la dometɔ ɖe sia ɖe nye gaƒoƒo 24. Biblia meda asi ɖe nya siawo dometɔ aɖeke dzi o.

• Ðeko 1 Mose 1:1 gblɔ be: “Le gɔmedzedzea me Mawu wɔ dziƒo kple anyigba.” Esia metsi tsitre ɖe kpeɖodzi si ŋu dzɔdzɔmeŋutinunyalawo ke ɖo be anyigba li ƒe miliɔn akpe geɖee nye esia la ŋu o.

• Nya “ŋkeke” si wozã le Mose Ƒe Agbalẽ Gbãtɔ me la ate ŋu afia ɣeyiɣi didi aɖe. Le nyateƒe me la, woyɔ ŋkeke ade siwo katã wotsɔ wɔ anyigba kple edzinuwo be “ŋkeke” le 1 Mose 2:4, Xexe Yeye Gɔmeɖeɖe Biblia.

Nya vevitɔ: Nya si Biblia gblɔ tso xexea kple emenuwo wɔwɔ ŋu wɔ ɖeka kple kpeɖodzi siwo ŋu dzɔdzɔmeŋutinunyalawo ke ɖo.

Nyae be ne wobe nàxɔe ase be ɖe wowɔ xexea la, menye ɖe wobe nàxɔe se tamemabumabui o. Ke boŋ ebia be nàde ŋugble tso kpeɖodziawo ŋu. Bu esia ŋu kpɔ:

Le xexe sia me la, ne èkpɔ aɖaŋunu aɖe ko la, ènyana be aɖaŋuwɔla aɖee wɔe. Ne èkpɔ fotoɖemɔ̃, yameʋu alo aƒe aɖe la, èƒoa nya ta enumake be ame aɖee wɔe alo tsoe. Ðe susu manɔ eme wu be nàƒo nya ta nenema ke ne èkpɔ amegbetɔ ƒe ŋku, xeviwo le yame alo míaƒe anyigba la oa?

Bu nya sia ŋu: Aɖaŋuwɔlawo kpɔa anyigbadzinuwo ƒe nɔnɔme tsɔ trɔa si le woƒe aɖaŋudɔwo ŋu woganyona wu eye wokpɔa mɔ be amewo nade dzesii be yewoe nye nuawo wɔlawo. Ðe susu le eme be míalɔ̃ ɖe amegbetɔwo ƒe agbagbadzedzewo dzi evɔ míagbe dzesidede Wɔla la kple eƒe nuwɔwɔ siwo de ŋgɔ sãsãsã la?

Àte ŋu ana ale si nèxɔe se be ɖe wowɔ xexea la me nagasẽ ɖe edzi ne èdea ŋugble le kpeɖodzi siwo dze le dzɔdzɔmenuwo me la ŋu.

Te esia kpɔ: Ŋlɔ “Ðe Wowɔea?” (nenɔ dzesi siawo “” me) le Gbetakpɔxɔ INTERNET DZI AGBALẼDZRAÐOƑE ƒe nudinyaŋlɔƒea. Tia “Ðe Wowɔea?” ƒe nyati aɖewo tso Nyɔ! me. Le nyati ɖe sia ɖe gome la, de dzesi nu siwo ɖe dzesi le nuwɔwɔ si ŋuti wòku ɖo la ŋu. Aleke wòna nèka ɖe edzi be Wɔla aɖe li?

Ku nu me yi ŋgɔe: Zã agbalẽ gbadza siwo gbɔna nàtsɔ adzro kpeɖodzi siwo ɖee fia be ɖe wowɔ nuwo la me tsitotsito; wole yevugbe me.

• Was Life Created? alo La vie a-t-elle été créée ?

  • Anyigba le afi si sɔ pɛpɛpɛ le yame ale be agbe nanya nɔ le edzi.​—Kpɔ axa 4-​10.

  • Nu siwo ɖee fia be ɖe wowɔ nuwo.​—Kpɔ axa 11-​17.

  • Nya si Biblia gblɔ tso xexemewɔwɔ ŋu le Mose Ƒe Agbalẽ Gbãtɔa me wɔ ɖeka kple dzɔdzɔmeŋutinunya.​—Kpɔ axa 24-​28.

• The Origin of Life​—Five Questions Worth Asking alo Cinq questions à se poser sur l’origine de la vie

  • Agbe mate ŋu adzɔ tso nu siwo me agbe mele o me le eɖokui si o.​—Kpɔ axa 4-7.

  • Nu gbagbewo ƒe wɔwɔme de ŋgɔ ale gbegbe be womate ŋu adzɔ le wo ɖokui si o.​—Kpɔ axa 8-​12.

  • Dzɔdzɔmeŋutinunyala siwo li egbea mete ŋu wɔ naneke si tea ŋu xɔa nyatakaka gbogbowo abe domenyiŋusẽfianuwo ene o.​—Kpɔ axa 13-​21.

  • Nu gbagbewo katã medzɔ tso nu gbagbe ɖeka me o. Lãwo ƒe ŋutinu siwo ŋu woke ɖo le tomenukuku me la, ɖo kpe edzi be lãwo ƒe hatsotso gãgãwo dzɔ le ɣeyiɣi ɖeka me, ke menye nu gbagbe sue aɖee nɔ tɔtrɔm vivivi ʋuu va zu lã gãwo o.​—Kpɔ axa 22-​29.

“Xexemenuwɔwɔwo, tso anyigbadzilãwo dzi va ke ɖe xexe gbahooa kple ɖoɖo si nu nuwo le le xexea me dzi, na meka ɖe edzi keŋ be Mawu li.”​—Thomas.