Àbia ɖokuiwò be, “Ðe manyo be nye hã mawɔe oa?” “Ðe ame sia ame mele ewɔm oa?”

Tɔ sẽe nàbu eŋu kpɔ!

Nyateƒenya: Menye ame sia amee le ewɔm o.

Ðewohĩ èxlẽe le afi aɖe kpɔ be ahiãvi le sɔhɛ geɖewo si fifia. Le kpɔɖeŋu me, numekuku aɖe si wowɔ le Amerika ɖee fia be sɔhɛ 2 le 3 ɖe sia ɖe me dzea ahiã hedɔna hafi wua sekɛndrisuku (lycée) nu. Gake esia fia hã be ame 1 le 3 ɖe sia ɖe me ya medzea ahiã o; ne èbu eŋu kpɔ la, ame gbogbo aɖee nye ema!

Ke ame siwo kpɔa gome le eme ya ɖe? Numekuku ɖee fia be nu siwo gbɔna la dometɔ aɖe va dzɔna ɖe sɔhɛ siwo dze ahiã hedɔ la dzi godoo.

Woxaa nu. Sɔhɛ siwo meɖe wo nɔewo o gake dɔ la dometɔ akpa gãtɔ gblɔ emegbe be nu si yewowɔ la va ve yewo vevie.

Gomekpɔkpɔ le gbɔdɔdɔ me hafi aɖe srɔ̃ le ko abe nutata xɔasi aɖe si va zu afɔɖodzinu ene

Womegakana ɖe wo nɔewo dzi o. Ne wodɔ vɔ la, ame eveawo dometɔ ɖe sia ɖe va nɔa eɖokui biam be: ‘Ame bubu ka gbɔe wògadɔ?’

Wotɔtɔna. Nyɔnuviwo dina be yewoadze ahiã ŋutsu si alé be na yewo, ke menye esi azã yewo vɔ ko aɖe asi le yewo ŋu o. Ŋutsuvi geɖewo megava lɔ̃a nyɔnuvi siwo ɖe mɔ wodɔ kpli wo la ƒe nya gbɔ o.

Nya vevitɔ: Wò ŋutilã xɔ asi ŋutɔ eya ta mègatsɔe da kaɖigbegbe o. Ðee fia be yeléa dzidzenu dzɔdzɔewo me ɖe asi to ale si nàwɔ ɖe se si Mawu de ku ɖe gbɔdɔdɔ do ŋgɔ na srɔ̃ɖeɖe ŋu dzi me. Ekema ne èva ɖe srɔ̃ emegbe la, àte ŋu akpɔ gome le gbɔdɔdɔ me faa. Àse vivi nɛ bliboe. Àvo tso dzimaɖitsitsi, nuxaxa kple dediemanɔmanɔ siwo nye gbɔdɔdɔ do ŋgɔ na srɔ̃ɖeɖe me tsonuwo me.—Lododowo 7:22, 23; 1 Korintotɔwo 7:3.