Dzo kpo yi emenuwo dzi

Nu Kae Mawɔ Be Mía Kple Nye Nufiala Dome Nanɔ Nyui?

Nu Kae Mawɔ Be Mía Kple Nye Nufiala Dome Nanɔ Nyui?

Tɔ nabu eŋu kpɔ!

Bu nu si me Rachel to la ŋu kpɔ. Ne wowɔ dodokpɔ la, Rachel xɔa dzeside nyui siwo nye A alo B. Esi wòva ɖo xɔ 7 lia me la, nuwo va trɔ. Rachel gblɔ be: “Míaƒe nufiala wɔ nu sia nu si wòate ŋui be magakpɔ dzidzedze le dodokpɔ me o.” Nu ka tae? Nufiala na Rachel kple dadaa wonya be yemelɔ̃ subɔsubɔha si me wole la o.

Nufialawo le ko abe tɔmekpe siwo akpe ɖe ŋuwò nàsi le numanyamanya nu ahadze si nunya, gake wòe wòle be nàwɔ afɔɖeɖea

Nu kae va dzɔ? Rachel gblɔ be: “Ɣesiaɣi si wòdze ƒãa be nufialaa ɖe mɔ eƒe susu gbegblẽ bubu kpɔ ŋusẽ ɖe dzesi si wònam le dodokpɔ me dzi la, Dada kplɔam ɖo vaa sukua va ƒoa nu tso eŋu kple nufialaa. Mlɔeba la, nufiala dzudzɔ fuɖeɖe nam.

Ne nuwo le na wò hã alea la, dzi nenɔ ƒowò nàgblɔe na dziwòlawo. Ðikeke mele eme o be woadi be yewoaƒo nu tso eŋu kple wò nufiala, eye ɖewohĩ woana sukutatɔwo nanya nu tso eŋu be woakpɔ nyaa gbɔ.

Ele eme baa be, menye ɣesiaɣie agbagbadzedze be woaɖɔ nuwo ɖo kpɔa dzidzedze o. Ɣeaɖewoɣi la, ɖeko wòle be nàyi edzi ado dzi. (Romatɔwo 12:17, 18) Ðetugbui si ŋkɔe nye Tanya gblɔ be: “Dzi kua míaƒe nufialawo dometɔ ɖeka ɖe sukuviwo ŋu. Zi geɖe la, edzua mí be míenye tagbɔkukutɔwo. Le gɔmedzedzea me la, esia tena ɖe dzinye mefaa avi, gake nyemegava ɖea mɔ eƒe dzugbewo kpɔa ŋusẽ ɖe dzinye o. Metsɔ nye susu ɖo nye sukudɔwo ŋu eye mebia ŋku ɖe eƒe sukudɔdeasiwo ŋu. Nu si do tso emee nye, megaɖea fu nam azɔ abe tsã ene o, eye menye sukuvi ʋɛ siwo kpɔa dzidzedze le eƒe dodokpɔwo me la dometɔ ɖeka. Le ƒe eve megbe la, wonya nufiala ma le sukua.

Nya vevitɔ: Srɔ̃ ale si nàwɔ nu kple nufiala siwo ƒe nya me sẽ, eye esia ana nàtu ŋutete nyuiwo, siwo akpe ɖe ŋuwò nàsrɔ̃ ale si nàwɔ nu kple dɔtɔ si ƒe nya me sẽ ɖo. (1 Petro 2:18) Ana nàde asixɔxɔ nufiala nyuiwo hã ŋu.