Dzo kpo yi emenuwo dzi

Dzo kpo yi emenu bubu dzi

Yehowa Ɖasefowo

Eʋegbe

SƆHƐWO BIANA BE

Ke Ne Lãmesẽkuxiwo Ðe Kpe Nam Ðe? (Akpa 3)

Ke Ne Lãmesẽkuxiwo Ðe Kpe Nam Ðe? (Akpa 3)

Sɔhɛmenɔɣi nye ɣeyiɣi si me wogblɔna be ame nɔa lãmesẽ me eye ŋusẽ geɖe nɔa eŋu. Ke hã le sɔhɛ aɖewo ya gome la, dɔléle sesẽwo na be wɔna boo megale wo ŋu o. Alea wòle le gowòmea? Ne nenemae la, ke nu siwo me V’loria, Justin kple Nisa to la ade dzi ƒo na wò. Yehowa Ðasefowoe wo katã wonye. De dzesi ale si wowɔ nɔ te ɖe lãmesẽkuxi sesẽ aɖewo nui la ɖa.

 V’loria

Lãmekaveamedɔ le ŋunye tso esime mexɔ ƒe 14 pɛ ko. Kaka maxɔ ƒe 20 la, wokpɔ ƒunukpeƒetetedɔ kple dɔléle vɔ̃ɖi siwo woyɔna be lupus kple Lyme le ŋunye. Esi wònye be megbɔdzɔna ɣesiaɣi ta la, esesẽna nam be mawɔ nu siwo katã medina be mawɔ. Ɣeaɖewoɣi la, metutuna tsia bunɔkeke me.

Nane si ɖea fu nam wu nye dɔlélea ŋutɔe nye ale si wòtena ɖe dzinye vevie be nyemetea ŋu wɔa nu bɔbɔetɔ teti gɔ̃ hã o, abe nuŋɔŋlɔ alo nuʋuʋu le ze nu ene. Ne mekpɔ ɖeviwo le zɔzɔm la, nyemetea ŋu sea nu si tae azɔlizɔzɔ sesẽna na nye ya nenema gbegbe ɖo la gɔme o. Mesena le ɖokuinye me be medo kpo nu.

Dzidzɔtɔe la, nye ƒometɔwo kple Yehowa Ðasefowo ƒe hame si me mele la me tɔwo naa kpekpeɖeŋum. Hamea me tɔwo va kpɔam ɖa, eye esia nana be nyemegasena le ɖokuinye me be metsi akogo o. Togbɔ be menɔa bɔbɔe be woakɔm le nye bunɔkeke me alo akɔm de ʋu loo alo akɔm do go le ʋu me o hã la, hamea me tɔ aɖewo kpeam hena hadomewɔnawo.

Ame tsitsi siwo le hamea me la kpena ɖe ŋunye ŋutɔ, elabena wosea nye nɔnɔmea gɔme nyuie. Wokpe ɖe ŋunye mekpɔ afi si nye ŋutete se ɖo, eye wona mese egɔme hã be mele be wòate ɖe dzinye ne nyemetea ŋu wɔa geɖe abe ame bubuwo ene o. Afi siwo mekpɔa dzidzɔ le wue nye hamea ƒe kpekpewo me kple gbeadzi. (Hebritɔwo 10:25) Le ɣeyiɣi mawo me la, mekpɔnɛ be togbɔ be mele dɔ lém hã la, nyemeto vovo boo tso ame bubuwo gbɔ o.

Meɖoa ŋku edzi na ɖokuinye be Yehowa naa nu siwo akpe ɖe mía ŋu míado dzi la mí. Le kpɔɖeŋu me, Biblia gblɔ be ne míaƒe gota gome le gbegblẽm hã la, ame si míenye le ememe ya ate ŋu anɔ “yeye zum gbe sia gbe.” (2 Korintotɔwo 4:16) Nenema tututue mesena le ɖokuinye me!

Bu nya sia ŋu: Ne dɔléle vɔ̃ɖi aɖe ɖe kpe na wò la, nu ka tae wòle vevie be nàdi kpekpeɖeŋu tso ame bubuwo gbɔ? Ne èle lãmesẽ me la, aleke nàte ŋu akpe ɖe ame aɖe si le dɔ lém la ŋu?Lododowo 17:17.

 Justin

Medze anyi, eye nyemegate ŋu le fɔfɔm o. Nye akɔta lia goŋgoŋ, eye nyemete ŋu le ʋaʋãm o. Wokɔm enumake yi kɔdzixɔ si me wokpɔa nɔnɔme kpatawo gbɔ le la me. Gbã la, ɖɔktawo mete ŋu nya nu si tututu nɔ fu ɖem nam o. Gake esi nu sia gadzɔ ɖe dzinye zi geɖe la, wova de dzesii be Lyme-dɔlélee le fu ɖem nam.

Lyme-dɔléle sia gblẽ nu le nye ahɔhɔ̃mekawo ŋu. Le nyateƒe me la, megaƒona tititi ɣeaɖewoɣi togbɔ be ƒe geɖee nye esia wokpɔ dɔléle sia le ŋunye hã. Gbe aɖewo gbe la, lãme kple asibidɛwo veam ale gbegbe be nyemetea ŋu ʋãa wo o. Ðeko wòwɔna nam abe ɖe nye ƒunukpeƒewo katã nyunyɔ ene.

Megblɔna na ɖokuinye be, ‘nyemekpɔ tsi madze dɔ sia o ɖe,’ eye esia nana medoa dziku. Mefaa avi na Mawu gbe sia gbe hebianɛ be, “Nu ka tae mele nɔnɔme sia me tom?” Meva nɔ sesem le ɖokuinye me gɔ̃ hã be Mawu gblẽm ɖi. Gake mede ŋugble tso Hiob ƒe ŋutinya si le Biblia me la ŋu. Hiob mese nu si tututu tae wònɔ kuxi geɖe me tom la gɔme o, gake eyi edzi wɔ nuteƒe na Mawu. Ne Hiob te ŋu wɔ nu nenema le kuxi gbogbo mawo me la, ke nye hã mate ŋu awɔ nenema ke.

Hamemetsitsi siwo le míaƒe hamea me la kpe ɖe ŋunye ŋutɔ. Wova kpɔa nye fɔfɔme ɖa ɣesiaɣi. Hamemetsitsi aɖe gblɔ nam be mate ŋu ayɔ ye ɣesiaɣi si medi be maƒo nu kple ame aɖe. Medaa akpe na Yehowa gbe sia gbe ɖe xɔlɔ̃ siawo tɔgbi ta!Yesaya 32:1, 2.

Ɣeaɖewoɣi ne míele dɔ lém vevie la, míeŋlɔa nyateƒenya vevi aɖe be, eyae nye be Yehowa nya nɔnɔme siwo me tom míele. Biblia gblɔ be: “Dro wò agba ɖe Yehowa dzi, ekema alé wò ɖe te.” (Psalmo 55:22) Nu siae medzea agbagba wɔna gbe sia gbe.

Bu nya sia ŋu: Aleke ame siwo lɔ̃ wò ate ŋu akpe ɖe ŋuwò nànɔ te ɖe lãmesẽkuxiwo nu?Lododowo 24:10; 1 Tesalonikatɔwo 5:11.

 Nisa

Esi menye sɔhɛvi ko la, wokpɔ dɔléle si woyɔna be Marfan le ŋunye. Enye dɔléle aɖe si nana be ame ƒe ƒunukpeƒewo gbɔdzɔna. Dɔléle sia gblẽa nu le ame ƒe dzi, ŋkuwo kple lãmenu vevi bubuwo hã ŋu. Nyemesea veve gbe sia gbe ya o, gake ne eho nam la, nye dzi koe dina be yeage ɖe dɔ me nam.

Esime wokpɔ dɔ sia le ŋunye la, avi dzi ko menɔna. Mevɔ̃na be nyemagate ŋu awɔ nu siwo katã wɔwɔ doa dzidzɔ nam la o. Le kpɔɖeŋu me, melɔ̃a ɣeɖuɖu, eya ta ne mebu eŋu kpɔ be gbe ɖeka la, vevesesea nu asẽ ale gbegbe be nyemagate ŋu aɖu ɣe alo azɔ azɔli teti o la, esia nana mevɔ̃na na etsɔme.

Nɔvinye nyɔnu tsitsia kpe ɖe ŋunye ŋutɔ. Ekpe ɖe ŋunye ale be nye nu megawɔa nublanui na ɖokuinye o. Egblɔ nam be mele be manɔ vɔvɔ̃m o, elabena esia ana wɔna navɔ le ŋunye le agbe me. Ede dzi ƒo nam hã be manɔ gbedodoɖa dzi vevie, elabena ame si nya nu si me tom mele hese nye nɔnɔmeawo gɔme nyuie wu lae nye Yehowa.1 Petro 5:7.

Mawunyakpukpui si de dzi ƒo nam ŋutɔe nye Psalmo 18:6, egblɔ be: “Meyɔ Yehowa le nye xaxawo me, eye mele ɣlidodo dzi na nye Mawu be wòaxɔ nam. Ese nye gbe tso eƒe gbedoxɔ me, eye nye ɣlidodo be wòaxɔ nam la ɖo eƒe to me.” Mawunyakpukpui sia kpe ɖe ŋunye mekpɔe be ne medo gbe ɖa na Yehowa hebiae be wòakpe ɖe ŋunye manɔ te ɖe nye dɔlélea nu la, aɖo tom ahakpe ɖe ŋunye. Ele klalo be yeakpe ɖe ŋunye ɣesiaɣi.

Mesrɔ̃e be esɔ be míalé blanui alo ado dziku gɔ̃ hã ɖe nɔnɔme madeamedzi si me tom míele la ta, gake mele be míaɖe mɔ be nɔnɔmea nana wɔna navɔ le mía ŋu le agbe me alo agblẽ mí kple Mawu dome o. Menye eya gbɔe míaƒe kuxiwo tso o, eye ne míena wònye ame vevitɔ na mí le agbe me la, magblẽ mí ɖi kpɔ gbeɖe o.Yakobo 4:8.

Bu nya sia ŋu: Ðe wòle be míabu fɔ Mawu ɖe míaƒe fukpekpewo ta?Yakobo 1:13.