Nu si nàte ŋu awɔ

Susu nyui nenɔ asiwò! Mègaɖe dzi le ɖokuiwò ƒo ahasusui be yemate ŋu awɔ dɔ nyuie gbeɖe o. Ne eva susu me na wò be yemate ŋui o la, gblɔ na ɖokuiwò be yeate ŋu. Le kpɔɖeŋu me, esi amewo tsɔ nya ɖe apostolo Paulo ŋu be nuƒoƒo ƒe ŋutete mele esi o (ɖewohĩ si dzi womete ŋu ɖo kpee o) la, egblɔ na wo be: “Gake ne nyemebi le nuƒoƒo me o kura gɔ̃ hã la, nyemele nenema le sidzedze ya me o.” (2 Korintotɔwo 10:10; 11:6) Paulo nya be ne yemebi le nanewo me o hã la, yetea ŋu wɔa nanewo ya nyuie. Ke wò ya ɖe? Nu ka nètea ŋu wɔna nyuie? Ne mènyae o la, ɖe manyo be nàbia ame aɖe si bua nuwo ŋu nyuie oa? Xɔlɔ̃ sia tɔgbi ate ŋu akpe ɖe ŋuwò nànya nu siwo nètea ŋu wɔna nyuie ale be nàte ŋu ayi ŋgɔ le wo me geɖe wu.

Tu nusɔsrɔ̃ ƒe ɖoɖo nyui ɖo. Mɔ bɔbɔe aɖeke meli si dzi nàto akpɔ dzidzedze le suku o. Ele be nàsrɔ̃ nu godoo. Ele eme be, nya siawo vea to me na ame ɣeaɖewoɣi ya. Ke hã, viɖe le nusɔsrɔ̃ ŋu. Le nyateƒe me la, ne èdo vevie nu vie la, ate ŋu ase vivi nɛ. Gake be nusɔsrɔ̃ ƒe ɖoɖo nyuiwo nanɔ asiwò la, ele be nàwɔ ɖoɖo ɖe wò ɣeyiɣiwo ŋu. Ðo ŋku edzi be ele be nàna nusɔsrɔ̃ naxɔ nɔƒe vevi aɖe le wò ɖoɖowo me. Nyateƒee, Biblia gblɔ be: “nukoɣi li” eye “ɣeɖuɣi li.” (Nyagblɔla 3:1, 4; 11:9) Eya ta, esi wònye sɔhɛe nènye ta la, adi be yeagblẽ ɣeyiɣi aɖe ɖi si nàtsɔ aɖe modzakae. Gake Nyagblɔla 11:4 xlɔ̃ nu be: “Ame si le to lém ɖe ya ŋu la, maƒã nuku o, eye ame si le ŋku lém ɖe alilikpo ŋu la, maŋe nu o.” Nufiame kae le eme na mí? Mègahe megbelele o. Esia ana nu vevitɔwo natsi mawɔmawɔ. Srɔ̃ nu gbã hafi nàyi aɖaɖe modzaka. Mègatsi dzi o—àte ŋu akpɔ ɣeyiɣi ɖe evea siaa ŋu!

Abe ale si ko kpeƒoƒo ate ŋu ana ame natri ene la, nenema kee ne nusɔsrɔ̃ ƒe ɖoɖowo le ame si la, ana be wòawɔ dɔ nyuie le suku.