Dzo kpo yi emenuwo dzi

Dzo kpo yi emenu bubu dzi

Yehowa Ɖasefowo

Eʋegbe

SƆHƐWO BIANA BE

Nu Kae Mawɔ Be Madzudzɔ Blanuiléle?

Nu Kae Mawɔ Be Madzudzɔ Blanuiléle?

“Ne ame bubuwo le nɔnɔme sesẽwo me tom la, mekpena ɖe wo ŋu hedea dzi ƒo na wo. Gake ame ʋɛ aɖewoe koe nya be ne meyi aƒe me la, menɔa xɔ me hefaa avi.”—Kellie.

“Ne melé blanui la, meɖea ɖokuinye ɖe aga. Ne wokpem na wɔna aɖe la, medoa taflatsɛ. Metea ŋu ɣlaa nye blanuilélea ale gbegbe be ƒonyemetɔwo menyana kura be melé blanui o. Wosusuna be meli nyuie.”—Rick.

Ðe wò hã nèsena le ɖokuiwò me abe Kellie alo Rick enea? Ne alea wòle le gowòme la, mègatsi dzi nàƒo nya ta be nane le gbegblẽm le ye ŋu o. Nya lae nye be, ame sia ame léa blanui tso ɣeyiɣi yi ɣeyiɣi. Nuteƒewɔla siwo ŋu woƒo nu tsoe le Biblia me gɔ̃ hã lé blanui.—1 Samuel 1:6-8; Psalmo 35:14.

Le nɔnɔme aɖewo me la, ɖewohĩ ànya nu si tae yelé blanui ɖo, gake le nɔnɔme bubuwo me la anɔ eme be mànya o. Anna si xɔ ƒe 19 gblɔ be: “Menye nya sesẽ koe dzɔna ɖe ame dzi hafi woléa blanui o. Blanuiléle ate ŋu ava le nɔnɔme ɖe sia ɖe me, ne mèle kuxi aɖeke me tom o gɔ̃ hã. Màse egɔme o, gake edzɔna!”

Nu ka kee na nèlé blanui o, nu kae nàte ŋu awɔ, ne edze abe mènya nu si gbɔ wòtso gɔ̃ hã o ene? Te mɔnu siwo gbɔna la kpɔ:

  1. Ƒo nu tso eŋu. Esi Hiob ɖo nɔnɔme sesẽwo me la, egblɔ be: “Maƒo nu le nye luʋɔ ƒe vevesesewo me.”—Hiob 10:1.

    Kellie: Gbɔdzɔe si mekpɔna ne meƒo nu tso eŋu na ame bubu la mele gbɔgblɔ me o. Mlɔeba la, mesena le ɖokuinye me be ame aɖe nya nu si me tom mele. Le kpɔɖeŋunyagbɔgblɔ nu la, woate ŋu aɖiɖi ka nam ahahem do goe le blanuiléle ƒe ʋe globo ma me!

  2. Ŋlɔ nu tso eŋu. Ne blanuiléle na mɔkpɔkpɔ bu ɖe wò le agbe me la, anyo be nàŋlɔ nu siwo va susu me na wò la ɖe pepa dzi. David ŋlɔ nu tso ale si wòlé blanui vevie la ŋu le psalmo siwo gbɔgbɔ ʋãe wòŋlɔ la me. (Psalmo 6:7) Ne èŋlɔ ale si nèsena le ɖokuiwò me da ɖi la, akpe ɖe ŋuwò nàlé “nunya vavã kple tamebubu me ɖe asi sesĩe.”—Lododowo 3:21.

    Heather: Nye seselelãmewo ŋɔŋlɔ ɖi nana be megbugbɔ ɖoa nu siwo blanuiléle tsɔ do agba ɖe susu me nam la ɖe ɖoɖo nu. Ne àte ŋu aŋlɔ wò seselelãmewo ɖi ahagbugbɔ wo aɖo ɖe ɖoɖo nu le susu me la, ke blanuilélea makpe dziwò fũu o.

  3. Do gbe ɖa tso eŋu. Biblia gblɔ be ne èdo gbe ɖa tso nu siwo le fu ɖem na wò ŋu la, ‘Mawu ƒe ŋutifafa, si ƒoa susu ɖe sia ɖe ta la, adzɔ wò dzi kple wò tamesusuwo ŋu.’—Filipitɔwo 4:6, 7.

    Esther: Menɔ agbagba dzem be manya nu si tae meléa blanui vevie ɖo la, gake nyemete ŋui o. Mebia Yehowa be wòakpe ɖe ŋunye manɔ dzidzɔ kpɔm. Ne naneke medzɔ o ko melé blanui la, etena ɖe dzinye vevie. Mlɔeba la, meva ɖu blanuiléle sia dzi. Mègabu vi si gbedodoɖa ɖena la nu tsɛ kura o!

    Kpekpeɖeŋu si woana wò kple ale si nàdo vevie nu la ate ŋu ana nàvo tso ale si nèléa blanuiléle vevie la si me

    Aɖaŋuɖoɖo: Srɔ̃ ale si nàdo gbe ɖa na Yehowa to ŋugbledede le Psalmo 139:23, 24 me nyawo ŋu me. Gblɔ wò dzimenyawo nɛ eye nàbiae be wòakpe ɖe ŋuwò nàde dzesi nu si nana nèléa blanui.

Tsɔ kpe ɖe eŋu la, nu xɔasiwo le Mawu ƒe Nya, Biblia me siwo akpe ɖe ŋuwò. Ne èna nya tuameɖo siwo le Biblia me la xɔ susu me na wò la, akpɔ ŋusẽ nyui ɖe wò seselelãme dzi.—Psalmo 1:1-3.

Ne blanuilélea xɔ zikpui ɖe gbɔwò

Aƒetɔvi aɖe si woyɔ be Ryan gblɔ be: “Mesena le ɖokuinye me be anyo nam be mayi edzi anɔ anyimlɔƒe wu be mafɔ le aba dzi agadze ŋgɔ ŋkeke manyataleŋu bubu.” Blanuiléle si gbɔ ɖɔktawo ko ate ŋu akpɔ ye nɔ fu ɖem na Ryan, eye menye eya ɖeka koe le nɔnɔme sia me o. Numekukuwo ɖee fia be blanuiléle si nu sẽ alo esi nu mesẽ o ɖea fu na sɔhɛ ɖeka le ene ɖe sia ɖe me hafi wòva zua ame tsitsi.

Aleke nàwɔ anya be blanuiléledɔ lém ye le? Dzesi siwo nàkpɔ la dometɔ aɖewoe nye ne wò seselelãme alo nuwɔna trɔna zi ɖeka kpata, èɖea ɖokuiwò ɖe aga, ne nuwɔna ɖe sia ɖe kloe megale fu tsɔm le lã me na wò o, nu meganya le ɖuɖum na wò alo mègate ŋu le alɔ̃ dɔm o, èsena le ɖokuiwò me be yemele ɖeke me o alo èbua fɔ ɖokuiwò madzemadzee.

Nyateƒee, seselelãme siawo dometɔ ɖeka alo esi wu nenema ɖe fu na mía dometɔ ɖe sia ɖe kloe kpɔ. Gake ne seselelãme sia nu gbe tsotso kwasiɖa geɖe la, ɖe manyo be nàƒo nu tso eŋu na dziwòlawo be woakplɔ wò ayi kɔdzi ne woado wò kpɔ oa? Ðɔktawo ate ŋu ade dzesii nenye blanuiléledɔ lém nèle.

Ne blanuiléledɔ lém nèle la, mehiã be ŋu nakpe wò o. Esi wowɔ atike na ame siwo lé blanuiléledɔ sia tɔgbi la, woƒe lã me sẽ, eye woanya kpɔ gbɔdzɔe si tɔgbi womegakpɔ kpɔ ɣeyiɣi didi aɖee nye ema o. Eɖanye blanuilélee na nèle sesem le ɖokuiwò me nenema alo nu bubu aɖee o, ɖo ŋku nya fakɔname siwo le Psalmo 34:19 la dzi. Afi ma gblɔ be: “Yehowa tsɔ ɖe ame siwo ƒe dzi gbã gudugudu la gbɔ, eye wòxɔna na ame siwo ƒe gbɔgbɔ woƒo ƒu anyi.”