Dzo kpo yi emenuwo dzi

Dzo kpo yi emenu bubu dzi

Yehowa Ɖasefowo

Eʋegbe

Nu Kae Mawɔ Be Dzinyelawo Naka Ðe Dzinye?

Nu Kae Mawɔ Be Dzinyelawo Naka Ðe Dzinye?

Nu si nàte ŋu awɔ

Bu nya siawo ŋu kpɔ: Ðe wò agbenɔnɔ na wòsesẽna dziwòlawo be woaka ɖe dziwòa?

Le kpɔɖeŋu me, Paulo ŋlɔ bena: “Míedina be míawɔ nu le anukwareɖiɖi me le nuwo katã me.” (Hebritɔwo 13:18) Bia ɖokuiwò be, ‘Aleke gbegbee meɖia anukware na dzinyelawo le afi siwo meyina kple nu siwo mewɔna gbɔgblɔ na wo me?’

Tia ŋkɔ siwo le afi sia la dometɔ ɖeka.

 Lori  Beverly

Lori

 Menɔ e-mail ɖom ɖe ŋutsuvi aɖe si ƒe nu lé dzi nam la le adzame. Dzinyelawo va nya eye wogblɔ nam be madzudzɔ. Melɔ̃ na wo, gake nyemedzudzɔ o. Menɔ nu sia wɔwɔ dzi hena ƒe ɖeka. Meɖoa e-mail ɖe ŋutsuvia, dzinyelawo va nyana emegbe, meɖea kuku hegblɔna be nyemagawɔe o, gake megawɔnɛ ake. Esia va wɔe be dzinyelawo megate ŋu va kana ɖe dzinye kura o!

Èsusu be nu ka tae Lori dzilawo megava kana ɖe edzi o?

Ne wòe nye Lori dzilawo la nu kae nàwɔ eye nu ka tae nàwɔ nenema?

Aleke nèbu be ele be Lori nawɔ nu esi edzilawo ƒo nu nɛ tso kuxia ŋu zi gbãtɔ megbe?

Beverly

 Dzinyelawo mekana ɖe dzinye le nye hadede kple ŋutsuviwo me o, gake fifia mese nu si tae la gɔme. Menɔ ahiãmo ɖom na wo dometɔ eve aɖewo siwo tsi wum ƒe eve. Meɖoa dze kpli wo le telefon dzi hena gaƒoƒo geɖe, eye ne míeyi modzakaɖeƒewo la, nyemegaɖoa dze kple ame bubu aɖeke tsɔ wu woawo o. Dzinyelawo xɔ nye telefon le asinye ɣleti ɖeka sɔŋ, eye womeɖea mɔ nam be mayi teƒe siwo ŋutsuvi siawo anɔ o.

Ne wòe nye Beverly dzilawo la, nu kae nàwɔ eye nu ka tae nàwɔ nenema?

Èsusu be to siwo Beverly dzilawo he nɛ la sesẽ akpa? Nenye nenemae la, ke nu ka tae?

Nu kae wòle be Beverly nawɔ be edzilawo nagaka ɖe edzi?

Ale si nàwɔ woagaka ɖe dziwò

Nu si nàte ŋu awɔ

Dodo le sɔhɛnyenye me ahazu ame tsitsi si dzi woaka ɖo le abe atrakpui si nànɔ lialiam ɖekaɖeka le wò sɔhɛmenɔɣi katã ene

Gbã la, de dzesi nu siwo me dziwòlawo megakana ɖe dziwò le o.

  • Gbɔgbɔ va aƒe me ɖe game dzi

  • Nye ŋugbedodowo dzi wɔwɔ

  • Nuwɔwɔ ɖe game dzi pɛpɛpɛ

  • Gazazã nyuie

  • Aƒemedɔwo wɔwɔ ahawu wo nu

  • Fɔfɔ le aba dzi kaba

  • Nana be nye xɔdɔme nanɔ dzadzɛ

  • Nyateƒetoto

  • Telefon alo kɔmpiuta zazã le mɔ nyuitɔ nu

  • Lɔlɔ̃ ɖe nye vodadawo dzi ahaɖe kuku

  • Bubuwo

Evelia, ɖoe wò taɖodzinu. Ðoe kplikpaa nàwɔ nu atsɔ aɖee afia be woate ŋu aka ɖe ye dzi le go siwo me nèkpɔ be ele be yeawɔ asitɔtrɔ le. Wɔ ɖe Biblia ƒe aɖaŋuɖoɖo siwo gbɔna dzi: “[Miɖe] amenyenye xoxo, si wɔa nu ɖe agbenɔnɔ si nɔ mia si tsã nu, . . . la ɖa.” (Efesotɔwo 4:22) Ne ɣeyiɣiawo va le yiyim la, wò ŋgɔgbedede ava dze ƒãa na amewo katã, na dziwòlawo hã.—1 Timoteo 4:15.

Etɔ̃lia, Ðe nu siwo nèɖo be yeawɔ bene woate ŋu aka ɖe dziwò la me na wo. Le esi nàhe nya ɖe wo ŋu be ele be woaka ɖe ye dzi geɖe wu teƒe la, bia wo bubutɔe be nu kawoe wokpɔ be ehiã be yeawɔ bene woate ŋu aka ɖe ye dzi geɖe wu hã.

Aɖaŋuɖoɖo: Mègakpɔ mɔ be dziwòlawo aka ɖe dziwò keŋkeŋ enumake o. Ðikeke mele eme o be woadi godoo be yewoakpɔe ɖa be àwɔ ɖe wò ŋugbedodowo dzi hã. Wɔ mɔnukpɔkpɔ sia ŋu dɔ nàtsɔ aɖee afia be woate ŋu aka ɖe ye dzi. Ne ɣeyiɣiawo va le yiyim la, anɔ eme be dziwòlawo ava ka ɖe dziwò geɖe wu eye woana ablɔɖe geɖe hã wò. Nenemae wòdzɔ le Beverly si ŋu míeƒo nu tso va yi la gome. Egblɔ be: “Ebia agbagbadzedze geɖe ŋutɔ be nàna woaka ɖe dziwò, gake nu sue aɖe koe awɔe be amewo magava ka ɖe dziwò o.” Egblɔ kpee be: “Mena dzinyelawo va le kakam ɖe dzinye fifia, esia na mevo le ɖokuinye me ŋutɔ!”

Nya vevitɔ: Zi ale si nèɖenɛ fiana be woate ŋu aka ɖe ye dzie la, anɔ eme be zi nenemae woagaka ɖe dziwò geɖe wu.