Dzo kpo yi emenuwo dzi

SƆHƐWO BIANA BE

Nu Kae Mawɔ Ne Amewo Le Nye Nya Gblɔm?

Nu Kae Mawɔ Ne Amewo Le Nye Nya Gblɔm?

 Nu si tae wòvena

Ameŋunyagbɔgblɔ aɖewo vɔ̃ɖi. Le kpɔɖeŋu me, ne amea ɖoe koŋ be yeaƒo ɖi wò ŋkɔ. Gake ne menye ameŋunyagbɔgblɔ vɔ̃ɖie o hã la, evena vevietɔ nenye be míaƒe ame vevi aɖee gblɔ nya sia ɖe mía ŋu!​—⁠Psalmo 55:13-​15.

“Meva see be xɔ̃nye aɖe le gbɔgblɔm na amewo be nyemetsɔa ɖeke le eme na ame bubuwo o. Evem ŋutɔ! Nyemese nu si tae wògblɔ nya ma ɖo la gɔme o.”​—Ashley.

Nyateƒenya: Ne wogblɔ nya manyomanyo ɖe ame ŋu la, evena ŋutɔ, eɖanye ame xɔlɔ̃ vevi alo ame bubu aɖee gblɔe o.

 Nya vɔ̃​—màte ŋu axe mɔ ɖe enu ɣesiaɣi o

Susu vovovo siwo ta wogblɔa amewo ƒe nya la dometɔ aɖewoe nye esi:

Ðetsɔleme vavã. Amegbetɔwo bɔa ha kple wo nɔewo. Eya ta esɔ be míaɖo dze kple mía nɔewo alo aƒo nu tso mía nɔewo ŋu. Biblia ŋutɔ hã de dzi ƒo na mí be ‘míaƒe ŋku nenɔ ame bubuwo ƒe nyonyo ŋu’ va se ɖe afi aɖe ya teti.​—⁠Filipitɔwo 2:4.

“Amegbetɔwo ŋue mielɔ̃a dzeɖoɖo tsoe wu!”​—Bianca.

“Medina be manya nu siwo le edzi yim le amewo ƒe agbe me eye be maƒo nu tso eŋu na ame bubuwo. Nyemenya nu si tae o, gake ɖeko wòvivia nunye.”​—Katie.

Modzakaɖeɖe. Ame aɖewo nɔ anyi le Biblia-ŋlɔɣiwo siwo “mezãa woƒe vovoɣiwo ɖe naneke ŋu tsɔ wu be woanɔ nya yeyewo gblɔm alo anɔ wo sem o.” (Dɔwɔwɔwo 17:21) Nenema ke ko wòle egbea hãe!

“Ɣeaɖewoɣi ne nu wɔdɔɖeamedzi aɖeke medzɔ o la, woawo ŋutɔ wokpaa ɖe ale be woakpɔ nya aɖe si ŋu woaɖo dze le.”​—Joanna.

Ŋuʋaʋã. Biblia xlɔ̃ nu mí wòsɔ nyuie be míagatsɔ mía ɖokuiwo anɔ sɔsɔm kple ame bubuwo o. (Galatiatɔwo 6:4) Nublanuitɔe la, ne ame aɖewo kpɔ be ame bubuwo ƒe ŋutete wu yewo tɔ le nanewo me la, wonɔa wo ŋu gblẽm.

“Zi geɖe la, ameŋugbegblẽ ɖea nane fiana tso ameŋugblẽlawo ŋutɔ ŋu. Eɖenɛ fiana zi geɖe be wole ŋu ʋãm ame siwo ŋu gblẽm wole la le dzi me. Wogblẽa amewo ŋu ale be woƒe dzi nadze eme eye woatsɔ ana kakaɖedzi wo ɖokuiwo be yewonyo wu ame siwo ŋu gblẽm yewole la.”​—⁠Phil.

Nyateƒenya: Godogodoa amewo agblɔ wo haviwo ŋu nya, eye woagblɔ wò hã tɔwò.

 Dzidzɔnya​—mele be esia naɖe dzi le ƒowò o

Ele eme be màte ŋu axe mɔ na amewo be womegagblɔ ye ŋu nya o, gake àte ŋu atia ale si nàwɔ nui. Ne èse be amewo le ye ŋu nya gblɔm la, àte ŋu awɔ nu eve ya teti.

NU GBÃTƆ: Do tokui. Zi geɖe la, nu nyuitɔ si nàwɔ koe nye be nàdo tokui, vevietɔ ne enye nya maɖinyɛwo. Wɔ ɖe Biblia ƒe aɖaŋuɖoɖo sia dzi: “Wò gbɔgbɔ megayɔ ɖe dzikudodo ŋu o, elabena bometsilawo ƒe akɔtae dziku nɔna.”​—⁠Nyagblɔla 7:9

“Afluiwo nɔ ɖiɖim be mele zɔzɔm kple ŋutsuvi aɖe! Eɖi kokoe ale gbegbe be ɖeko metsɔe na nukokoe.”​—⁠Elise.

“Nu vevitɔ si xɔa aɖi le ameŋunyagbɔgblɔ sie nye ŋkɔ nyui ƒe amesinɔnɔ. Ne wole nya vɔ̃ gblɔm le ŋuwò na amewo gɔ̃ hã, esi amewo nyae be ènɔa agbe nyuie ta, ame ʋɛ aɖewo koe axɔ nya mawo dzi ase o. Nu nyui siwo wonya tso ŋuwò axɔ aɖi le ameŋunyagbɔgblɔ ma si.”​—⁠Allison.

Aɖaŋuɖoɖo: Ŋlɔ (1) nya si wògblɔ tso ŋuwò la ɖi, (2) ale si nèse le ɖokuiwò me la ɖi. Ne ènya ‘de ŋugble le wò dzi me’ vɔ ko la, anɔ bɔbɔe na wò be nàɖe susu ɖa le nya mawo dzi.​—⁠Psalmo 4:4, Eʋegbe Biblia ƒe 2010 tɔ.

NU EVELIA: Yi ame si gblɔ nyaa na amewo la gbɔ nàbiae. Le go aɖewo me la, àse le ɖokuiwò me be nya si wogblɔ ɖe ye ŋu vɔ̃ɖi ale gbegbe be ehiã be yeayi aɖaƒo nu kple ame si gblɔ nyaa na amewo.

“Ne èyi ɖabia nya ame si le ŋuwò gblẽm la, akpɔe dze sii be èse nya si gblɔm wòle tso ŋuwò la. Esia ate ŋu ana mɔnukpɔkpɔ mi miadzro nyaa me eye ate ŋu adzɔ gɔ̃ hã be miawu nya ma.”​—⁠Elise.

Hafi nàyi amea gbɔ la, bu Biblia ƒe mawunyakpukpui siawo ŋu eye nàdzro biabia siwo kpe ɖe wo ŋu la me.

  • “Ne ame aɖe mekpɔ se nya, hafi ɖo eŋu o la, bometsitsi kple ŋukpe wònye nɛ.” (Lododowo 18:13) ‘Ðe mese susu si tae amea gblɔ nya ɖo la gɔme tsitotsitoa? Ðe wòate ŋu anye be ame si va gblɔ nam be wole ŋunye gblẽm la mese nya nyuie oa?’

  • “Ele be ame sia ame naɖe abla le nusese me, nanɔ blewu le nuƒoƒo me, nanɔ blewu le dziku me.” (Yakobo 1:19) ‘Ðe wòsɔ be mayi ameŋunyagblɔla gbɔ le ɣeyiɣi sia mea? Ðe meka ɖe edzi be mebu nyaa ŋu nyuiea? Alo ɖe wòanyo be malala gbɔ ale be nye dziku nu nafa keŋkeŋ hafia?’

  • “Nu sia nu si miedina be amewo nawɔ na mi la, ele be miawo hã miawɔ nenema ke na wo.” (Mateo 7:12) ‘Nenye nyee wɔ nua ɖe amea ŋu ɖee, aleke madi be wòagblɔe nam? Afi kae madi be wòagblɔ nya sia nam le? Nyagbe kawo tɔgbi zazãe aɖe vi wu, eye aleke magblɔe wòaɖe vi wu?

Aɖaŋuɖoɖo: Hafi nàyi ameŋunyagblɔlaa gbɔ la, ŋlɔ nya siwo nàdi be yeagblɔ nɛ la ɖi. Azɔ lala kwasiɖa ɖeka alo eve, gbugbɔ xlẽ nu siwo nèŋlɔ ɖi la, eye nàkpɔ ɖa be ɖe wòahiã be yeatrɔ nanewo le wo me hã. Gawu la, anyo be nàka nu si nèdi yeawɔ la ta na dziwòla alo xɔ̃wò kpɔnuteƒe aɖe ne wòaɖo aɖaŋu na wò.

Nyateƒenya: Abe ale si ko wòle le agbemenuwɔna geɖewo gome ene la, màte ŋu axe mɔ ɖe ameŋunyagbɔgblɔ nu keŋkeŋ o. Gake esia mefia be nàɖe mɔ wòakpɔ ŋusẽ ɖe dziwò o.