Dzo kpo yi emenuwo dzi

Dzo kpo yi emenu bubu dzi

Yehowa Ɖasefowo

Eʋegbe

SƆHƐWO BIANA BE

Aleke Mawɔ Aɖo Dze Kple Dzinyelawo Tso Woƒe Sededewo Ŋu?

Aleke Mawɔ Aɖo Dze Kple Dzinyelawo Tso Woƒe Sededewo Ŋu?

Nu si nèhiã: Dzeɖoɖo ƒe ŋutete

Dzeɖoɖo le vevie eye ate ŋu

  • akpe ɖe ŋuwò nàse dziwòlawo gɔme.

  • akpe ɖe ŋuwò nàse nu si tae dziwòlawo gbe be yewomawɔ nu si nèbia wo o la gɔme.

Le nyateƒe me la, ne èdina be woana ame tsitsiwo ƒe mɔnukpɔkpɔwo ye la, ke ehiã be nàtu ale si woɖoa dze tso nyawo ŋu abe ame tsitsi ene la ƒe ŋutete ɖo. Aleke nàwɔe?

Srɔ̃ ale si nàɖu wò seselelãme dzi. Dzeɖoɖo nyui bia ɖokuidziɖuɖu. Biblia gblɔ be: “Bometsila dudua eƒe dɔmedzoe katã kɔna ɖi; ke nunyala fa enu emegbe.”—Lododowo 29:11.

Nu ka míewɔnɛ? Ƒo asa na nugbenugbewɔwɔ, adãɖoɖo, dzikudodo ado ʋɔ gblaa alo ado dziku anɔ afɔ zim anyi le aƒea me. Ne èwɔa nu mawo la, ɖeko woagaxɔ ablɔɖe aɖewo le asiwò boŋ, womana ablɔɖe geɖe wu wò o.

Dze agbagba nàse dziwòlawo ƒe nyawo gɔme. Le kpɔɖeŋu me, mítsɔe be dziwòlawo medi be yewoaɖe mɔ na wò nàyi hadomewɔna aɖe teƒe o. Esi nànɔ nya hem kpli wo teƒe la, àte ŋu abia wo boŋ be:

“Ðe mialɔ̃ mayi ne ame tsitsi aɖe si dzi mieka ɖo akplɔm yia?”

Ate ŋu adzɔ hã be dziwòlawo malɔ̃ ɖe edzi na wò o. Gake ne èse nu si ŋuti wotsi dzi ɖo gɔme la, awɔe be nàdo susu nyui aɖe ɖa si dzi woate ŋu ada asi ɖo.

Toɖoɖo dziwòlawo sɔ kple fe aɖe si nènyi le gadzraɖoƒe aɖe xexe ene, ne èxea fea ɖe game dzi la, woaka ɖe dziwò ahaɖo ŋu ɖe ŋuwò (agado ga geɖe na wò).

Na dziwòlawo naka ɖe dziwò. Tsɔe be ame aɖe doa ga le gadzraɖoƒe aɖe. Ne exea fe ɖe game dzi la, gadzraɖoƒea ava ka ɖe edzi eye woate ŋu alɔ̃ ado ga gbogbo aɖe nɛ gɔ̃ hã ɣebubuɣi.

Nenema ke wòle le aƒe me hã. Ènyi toɖoɖo ƒe fe le dziwòlawo ŋu. Eya ta ne èyi edzi nɔa woƒe sewo dzi dam la, megawɔ nuku na wò ne womegakana ɖe dziwò tututu alo womegakana ɖe dziwò kura o. Míate ŋu agblɔ le kpɔɖeŋunyagbɔgblɔ nu be “wotutu ŋkɔwò le gadzraɖoƒea.”

Gake ne èwɔa nuteƒe, le nu suewo gɔ̃ hã me la, anɔ eme be dziwòlawo aka ɖe dziwò le etsɔme.