Dzo kpo yi emenuwo dzi

SƆHƐWO BIANA BE

Ðe Wòle Be Míatso Míaƒe Kadodoa Mea?—Akpa 2

Ðe Wòle Be Míatso Míaƒe Kadodoa Mea?—Akpa 2

Tia teƒe kple ɣeyiɣi si sɔ be míadzro nyaa me. Nu kae nya sia fia?

Enyo, bu ale si nàdi be wòawɔ nu ɖe ye ŋu la ŋu kpɔ. (Mateo 7:12) Ðe nàdi be wòagblɔe na ye le ame bubuwo ŋkume be yetso kadodoa mea? Ðewohĩ madi nenema o.

Ne anya wɔ la, anyo wu ne mègblɔe da ɖe telefon dzi nɛ be yetso kadodoa me alo ana wòanya to message alo e-mail dzi o. Ke boŋ, tia teƒe kple ɣeyiɣi si sɔ be miadzro nya vevi sia me.

Nu kae nàgblɔ ne ɣeyiɣia de be nàɖe nu me nɛ? Apostolo Paulo de dzi ƒo na Kristotɔwo be woato “nyateƒe” na wo nɔewo.—Efesotɔwo 4:25.

Mɔ nyuitɔe nye be nàɖɔ ŋu ɖo, gake nàte afɔ to sesĩe. Na eme nakɔ nɛ nyuie be yese le ye ɖokui me be yewoƒe kadodoa mate ŋu akpɔ dzidzedze o.

Mehiã be nàhe susu ayi eƒe vodadawo katã dzi alo aƒo nu tso nu siwo katã medo dzidzɔ na wò le eŋu o la o. Nyateƒeae nye be le esi nàgblɔ be, “Mèwɔa nu sia” alo “Mèwɔa kemɛ gbeɖe o” la, anyo wu be nàgblɔ nya siwo aɖe ale si nèsena le ɖokuiwò me, abe “Medi ame si tɔgbi . . . alo “Mesusui be ele be míatso kadodoa me elabena . . .”

Menye ɣeyiɣi siae nàde axa na nyaa alo aɖe mɔ nɛ wòaxɔ ta le asiwò o. Eya ta nɔ ŋudzɔ ne ele agbagba dzem be yeato ayemɔ dzi atrɔ wò susu. Ðetugbui aɖe si ŋkɔe nye Lori gblɔ be: “Esi metso kadodoa me megbe la, ŋutsuvi si menɔ gbe ɖom ɖi kple tsã la, va nɔ nublanuinuwo wɔm ɣesiaɣi. Menya be ɖe wònɔ ewɔm be mase veve ɖe ye nu. Gake nyemena eƒe nuwɔna sia na metrɔ susu o. Abe Lori ene la, nya nu si dim nèle. Lé wò nyametsotsoa me ɖe asi goŋgoŋ. Na wò ao nanye ao.—Yakobo 5:12.