Dzo kpo yi emenuwo dzi

Aleke Mawɔ Aɖu Tetekpɔwo Dzi?

Aleke Mawɔ Aɖu Tetekpɔwo Dzi?

Nu si nàte ŋu awɔ

Gbã la, nyae be àkpɔ wò nuwɔnawo me tsonu, eɖanye nu ka kee xɔ̃wò wɔ o.

Evelia, de dzesi tetekpɔ si dzi ɖuɖu sesẽna na wò wu.

Eyome, bia ɖokuiwò be, ‘Ɣekaɣi koŋ tetekpɔ sia doa mo ɖa?’ (Ne mele sukua? Dɔ mea? Le teƒe bubu aɖea?) Ne ènya teƒe siwo koŋ tetekpɔa doa mo ɖa le la, akpe ɖe ŋuwò nàƒo asa nɛ kura.

Azɔ, ènya nu si nàwɔ. Wò taɖodzinu gbãtɔe nye be nànya ale si nàƒo asa na tetekpɔa va se afi aɖe loo alo aƒo asa nɛ keŋkeŋ. (Le kpɔɖeŋu me: Ne èdoa go sukuxɔmehatiwo le kpakpã vɔ megbe eye woƒonɛ ɖe nuwò be nàno sigaret la, ɖewohĩ àte ŋu atiae be yeanɔ mɔ bubu kura tom ale be yemagado go wo azɔ o.) Nyateƒenya: Ame siwo gblɔna be yewonye xɔ̃wòwo gake woƒonɛ ɖe nuwò be nàwɔ nu gbegblẽ la, menye xɔlɔ̃ nyuiwo o.

Le nyateƒe me la, màte ŋu aƒo asa na tetekpɔwo katã o. Godogodoa àva dze ŋgɔ tetekpɔ aɖe si nu ate ŋu asẽ ŋutɔ, ɖewohĩ le ɣeyiɣi si mèle mɔ kpɔm nɛ kura o me. Nu kae nàte ŋu awɔ?

Ele vevie be nànɔ dzadzraɖoɖi!

Bu eŋu kpɔ: Yesu nya akpa si wòle le nyui kple vɔ̃ ƒe nya si le toa me la me. Eɖoe kplikpaa be yeaɖo to ye Fofo ɣesiaɣi. (Yohanes 8:28, 29.) Nu vevitɔe nye be nàtso nya me le nu si nàwɔ la ŋu do ŋgɔ.

Dɔdeasi. Kpɔ ɖa be àte ŋu akpɔ susu eve siwo ta wòle be nàɖu tetekpɔ si nèdoa go edzidzi wu la dzi mahã, eyome nàbu nu eve siwo nàte ŋu atsɔ aɖu edzii la ŋu.

Nu ka tae nàɖe mɔ ame bubuwo naɖu aƒetɔ ɖe dziwò? Ðee fia be yetsi, to nu si sɔ wɔwɔ me. (Kolosetɔwo 3:5) Eye nàdo gbe ɖa tso esia ŋu be nàyi edzi anɔ te sesĩe.—Mateo 6:13.

Ne èɖe mɔ tetekpɔ ɖu dziwò la, ke èzu kluvi na wò nudzodzrowo