Dzo kpo yi emenuwo dzi

Ame Kawoe Ayi Dziƒo?

Ame Kawoe Ayi Dziƒo?

Ale si Biblia ɖo eŋui

Mawu tia Kristotɔ wɔnuteƒewo ƒe xexlẽme sue aɖe, siwo woafɔ ɖe tsitre woava nɔ agbe le dziƒo le woƒe ku megbe. (1 Petro 1:3, 4) Ne wotia wo la, ele be woayi edzi alé xɔse sesẽ me ɖe asi eye woanɔ agbe dzadzɛ si dze Kristotɔ be woakpɔtɔ adze na domenyinu si le wo si le dziƒo la.​—Efesotɔwo 5:5; Filipitɔwo 3:12-14.

Nu kae ame siwo ayi dziƒo la ava wɔ?

Woanye fiawo kple nunɔlawo aɖu dzi kple Yesu ƒe 1,000. (Nyaɖeɖefia 5:9, 10; 20:6) Woanye “dziƒo yeye” alo dziƒo dziɖuɖu si aɖu “anyigba yeye” alo amegbetɔƒomea dzi. Dziƒodziɖula siawo akpe asi ɖe eŋu woagbugbɔ ameƒomea aɖo dzɔdzɔenyenye ƒe nɔnɔme si Mawu ɖo le gɔmedzedzea me la te.​—Yesaya 65:17; 2 Petro 3:13.

Ame nenie woafɔ ɖe tsitre woayi dziƒo?

Biblia ɖee fia be ame 144,000 ye woafɔ ɖe tsitre woava nɔ agbe le dziƒo. (Nyaɖeɖefia 7:4) Le ŋutega aɖe si apostolo Yohanes kpɔ, si woŋlɔ ɖe Nyaɖeɖefia 14:1-3 me la, ekpɔ “Alẽvi la le tsitre ɖe Zion To la dzi, eye ame akpe alafa ɖeka blaene vɔ ene . . . le eŋu.” Le ŋutega sia me la, “Alẽvi la” le tsi tre ɖi na Yesu si wofɔ ɖe tsi tre. (Yohanes 1:29; 1 Petro 1:19) “Zion To” la tsi tsitre ɖi na ɖoƒe kɔkɔ si Yesu kple ame 144,000 siwo aɖu dzi kplii la le le dziƒo.​—Psalmo 2:6; Hebritɔwo 12:22.

‘Ame yɔyɔ kple ame tiatia’ siwo aɖu fia kple Kristo le Fiaɖuƒea me ye woyɔ be “alẽha sue” la. (Nyaɖeɖefia 17:14; Luka 12:32) Esia fia be woanye ameha sue aɖe ŋutɔ ne wotsɔ wo sɔ kple alẽ ƒe agbɔsɔsɔme si le Yesu si.​—Yohanes 10:16.

Susu totro siwo le amewo si ku ɖe ame siwo ayi dziƒo ŋu

Susu totro: Ame nyuiwo katã ayi dziƒo.

Nyateƒenya: Mawu do ŋugbe be ame nyui akpa gãtɔ anɔ agbe tegbee le anyigba dzi.​Psalmo 37:11, 29, 34.

  • Yesu gblɔ be: “Ame aɖeke melia yi dziƒo o.” (Yohanes 3:13) Eƒe nyaa fia be ame nyui siwo nɔ agbe do ŋgɔ na eya amea abe Abraham, Mose, Hiob, kple David ene meyi dziƒo esime woku o. (Dɔwɔwɔwo 2:29, 34) Ke boŋ mɔkpɔkpɔ nɔ wo si be woava fɔ yewo ɖe tsitre ne yewoanɔ agbe le anyigba la dzi.​—Hiob 14:13-15.

  • Woyɔ tsitretsitsi yi dziƒo la be “tsitretsitsi gbãtɔ.” (Nyaɖeɖefia 20:6) Esia ɖee fia be tsitretsitsi bubu aɖe gali. Anye anyigba dzi ƒe tsitretsitsia.

  • Biblia fia nu be le Mawu Fiaɖuƒea ƒe dziɖuɖu te la, “ku maganɔ anyi akpɔ o.” (Nyaɖeɖefia 21:3, 4) Anyigbaa ŋue nya sia ku ɖo elabena ku mele dziƒo o.

Susu totro: Ame sia ame ŋutɔe tianae nenye be anɔ agbe le dziƒo loo alo anyigba dzi.

Nyateƒenya: Mawu ye tiaa Kristotɔ wɔnuteƒe siwo axɔ “dziƒo ƒe fetu,” si nye agbenɔnɔ le dziƒo ƒe mɔkpɔkpɔ la. (Filipitɔwo 3:14) Eya ta menye ame ŋutɔ ƒe didi alo nɔƒe gã didi ƒe nya aɖeke dzie woanɔ te ɖo atia amewo o.​—Mateo 20:20-​23.

Susu totro: Agbe mavɔ nɔnɔ le anyigba dzi ƒe mɔkpɔkpɔa mede ŋgɔ o, ame siwo medze na dziƒo yiyi o lae axɔ esia.

Nyateƒenya: Mawu yɔa ame siwo anɔ agbe tegbee le anyigbaa dzi be “nye amewo,” “nye ame tiatiawo” kple “Yehowa ƒe ame yayrawo.” (Yesaya 65:21-23) Mɔnukpɔkpɔ asu wo si woana tame si Mawu ɖo ɖe amegbetɔwo ŋu tso gɔmedzedzea me, si nye be woanɔ agbe tegbee le paradisonyigbaa dzi la nava eme.​—1 Mose 1:28; Psalmo 115:16; Yesaya 45:18.

Susu totro: Dzesi koe 144,000 si woyɔ le Nyaɖeɖefia ƒe agbalẽa me la nye, menye xexlẽme ŋutɔŋutɔe o.

Nyateƒenya: Togbɔ be xexlẽme siwo nye kpɔɖeŋuwo le Nyaɖeɖefia ƒe agbalẽa me hã la, xexlẽme aɖewo nye xexlẽme ŋutɔŋutɔwo. Le kpɔɖeŋu me, eƒo nu tso “Alẽvi la ƒe apostolo wuieveawo ƒe ŋkɔ wuieveawo” ŋu. (Nyaɖeɖefia 21:14) Kpɔ kpeɖodzi siwo tae míate ŋu aƒo nya ta be xexlẽme ŋutɔŋutɔe 144,000 hã nye la ɖa.

Nyaɖeɖefia 7:4 gblɔ be, “ame siwo nu wotre [alo ame siwo wotia be woanɔ agbe le dziƒo] la ƒe xexlẽme, wotre ame akpe alafa ɖeka blaene vɔ ene nu.” Esi wogblɔ nya siawo vɔ teti koe wogaƒo nu tso ame hatsotso evelia aɖe hã ŋu be, “ameha gã aɖe si ame aɖeke mete ŋu xlẽ o.” “Ameha gã” la me tɔwo hã akpɔ ɖeɖe tso Mawu gbɔ. (Nyaɖeɖefia 7:9, 10) Nenye be kpɔɖeŋudzesi koe 144,000, si nye ame hatsotso aɖe si ŋu xexlẽme mele o nye la, ke vovototo si le ame hatsotso eveawo dome la madze nyuie o. *

Azɔ hã, wogblɔ tso ame 144,000-awo ŋu be ‘woƒle wo tso amegbetɔwo dome be woanye kutsetse gbãtɔ.’ (Nyaɖeɖefia 14:4) Nyagbɔgblɔ “kutsetse gbãtɔ” fia ametiatia sue aɖe. Esia ɖɔ ame siwo aɖu dzi kple Kristo ɖe wo tevi gbogbo siwo xexlẽme meli na o la dzi le anyigbaa dzi la nyuie.​—Nyaɖeɖefia 5:10.

^ mm. 21 Nenema kee Nufialagã Robert L. Thomas ŋlɔ nu tso xexlẽme 144,000 si woyɔ le Nyaɖeɖefia 7:4 ŋu be: “Enye xexlẽme si le nyanya si to vovo na xexlẽme si woyɔ le 7:9 si mele nyanya o. Ne wobu xexlẽme sia be enye kpɔɖeŋu la, ke xexlẽme aɖeke manɔ agbalẽa me si anye xexlẽme ŋutɔŋutɔ o.”​—Revelation 1-7: An Exegetical Commentary, axa 474.