Ale si Biblia ɖo eŋui

Nu vɔ̃ si womatsɔ ake o lɔ nuwɔna kple nɔnɔme siwo wɔe be Mawu mate ŋu atsɔ nu vɔ̃ wɔla la ƒe nu vɔ̃wo akee gbeɖe o la ɖe eme. Aleke esia ate ŋu adzɔe?

Mawu tsɔa ame siwo trɔa dzi me, wɔna ɖe eƒe sededewo dzi le woƒe agbenɔnɔ me hexɔa Yesu Kristo dzi sena la ƒe nu vɔ̃wo kea wo. (Dɔwɔwɔwo 3:19, 20) Ke hã, ame aɖe ate ŋu anyrɔ eɖokui ɖe nu vɔ̃ wɔwɔ me ale gbegbe be magate ŋu atrɔ eƒe nuwɔna alo eƒe agbenɔnɔ gbeɖe o. Biblia gblɔ tso ame ma tɔgbi ŋu be “dzi vɔ̃ɖi” si “nu vɔ̃ ƒe amebleŋusẽ” na wòsẽe le esi. (Hebritɔwo 3:12, 13) Abe tsu si womè le kpodzo me, si ƒe nɔnɔme womagate ŋu atrɔ o ene la, amea ƒe dzi va tsitre ɖe Mawu ŋu ɖaa. (Yesaya 45:9) Naneke meli si dzi woanɔ te ɖo atsɔ ame ma ƒe nu vɔ̃wo akee o, eya ta ewɔ nu vɔ̃ si womate ŋu atsɔ ake gbeɖe o.Hebritɔwo 10:26, 27.

Yuda-subɔsubɔhakplɔla siwo nɔ anyi le Yesu ƒe ŋkekea me la dometɔ aɖewo wɔ nu vɔ̃ si womate ŋu atsɔ ake o. Wonya nyuie be Mawu ƒe gbɔgbɔ kɔkɔe la zãmee Yesu nɔ tsɔ nɔ nukunuwo wɔm, gake wogblẽ eŋu be Satana Abosam ƒe ŋusẽ zãmee wònɔ.Marko 3:22, 28-30.

Nu vɔ̃ siwo woate ŋu atsɔ ke la dometɔ aɖewo

  • Busunya siwo wogblɔ le manyamanya me. Apostolo Paulo nye busunyagblɔla tsã, gake eva gblɔ emegbe be: “Wokpɔ nublanui nam, elabena mewɔe le manyamanya me.”—1 Timoteo 1:13.

  • Ahasiwɔwɔ. Biblia ƒo nu tso ame aɖewo siwo nye ahasiwɔlawo tsã, gake wova trɔ woƒe agbenɔnɔ eye Mawu tsɔ woƒe nu vɔ̃wo ke wo la ŋu.1 Korintotɔwo 6:9-11.

“Ðe mewɔ nu vɔ̃ si womatsɔ ake oa?”

Ne èlé fu nu vɔ̃ siwo nèwɔ va yi eye nèɖoe kplikpaa be yeatrɔ agbenɔnɔ la, ekema mèwɔ nu vɔ̃ si womatsɔ ake o. Mawu ate ŋu atsɔ nu vɔ̃ siwo gbɔdzɔgbɔdzɔ na be nèwɔ enuenu la gɔ̃ hã ake wò ne mènya sẽ dzi me ɖe eya amea ŋu o ko.Lododowo 24:16.

Ame aɖewo sena le wo ɖokuiwo me be yewowɔ nu vɔ̃ si womatsɔ ake o le esi nu vɔ̃ siwo wowɔ va yi la le fu ɖem na wo ta. Ke hã, Biblia fia mí be mímate ŋu aɖo ŋu ɖe míaƒe seselelãmewo ŋu ɣesiaɣi o. (Yeremiya 17:9) Mawu meɖe mɔ na mí be míadrɔ̃ ʋɔnu ame aɖeke o, meɖe mɔ na mí be míadrɔ̃ ʋɔnu míawo ŋutɔ gɔ̃ hã o. (Romatɔwo 14:4, 12) Ate ŋu atsɔ míaƒe nu vɔ̃wo ake mí nenye be míaƒe dzi gakpɔtɔ le fɔ bum mí gɔ̃ hã.1 Yohanes 3:19, 20.

Ðe Yuda Iskariot wɔ nu vɔ̃ si womatsɔ ake oa?

Ɛ̃. Eƒe ŋukeklẽa na be wònɔa ga fim le ga siwo amewo dzɔna hena subɔsubɔdɔ kɔkɔea wɔwɔ la me. Ewɔ abe ɖe wòtsɔ ɖe le eme na ame dahewo gɔ̃ hã ene, evɔ wònye be ɖeko wònɔ didim be ga geɖe nava ne yeafi ɖe. (Yohanes 12:4-8) Esi Yuda ƒe dzi ku ɖe nu vɔ̃ɖi wɔwɔ ŋu keŋ ko la, ede Yesu asi xɔ klosaloga 30. Yesu nya be Yuda mate ŋu atrɔ dzi me le nu si wɔm wònɔ la me gbeɖe o, eya tae wòyɔe be “tsɔtsrɔ̃vi.” (Yohanes 17:12) Esia fia be esi Yuda ku la, etsrɔ̃ ɖikaa, tsitretsitsi ƒe mɔkpɔkpɔ aɖeke meli nɛ o.Marko 14:21.

Yuda metrɔ dzi me vavã ɖe eƒe nu vɔ̃wo ta o. Meʋu nu vɔ̃ me na Mawu o, ke boŋ subɔsubɔhakplɔla siwo kpe ɖe eŋuti woɖo nugbe ɖe Yesu ŋu lae wòʋu nu vɔ̃ me na.Mateo 27:3-5; 2 Korintotɔwo 7:10.