Dzo kpo yi emenuwo dzi

Dzo kpo yi emenu bubu dzi

Yehowa Ɖasefowo

Eʋegbe

Nu Kae Nye Nyɔnyrɔxɔxɔ?

Nu Kae Nye Nyɔnyrɔxɔxɔ?

Ale si Biblia ɖo eŋui

Nyɔnyrɔxɔxɔ fia be woade ame tsi me wòabu ɖe tsia me eye woagafɔe tso tsia me. * Esia tae wonyrɔ Yesu ɖe tɔsisi me ɖo. (Mateo 3:13, 16) Nenema kee esi Etiopia ŋutsu aɖe va “ɖo tsi aɖe gbɔ” la, ebia be woanyrɔ ye.Dɔwɔwɔwo 8:36-40.

Gɔmesese si le nyɔnyrɔxɔxɔ ŋu

Biblia tsɔ nyɔnyrɔxɔxɔ sɔ kple ame ɖiɖi. (Romatɔwo 6:4; Kolosetɔwo 2:12) Ne wonyrɔ ame aɖe ɖe tsi me la, efia be amea ku le eƒe agbenɔnɔ tsãtɔ gome eye wòdze agbe yeye gɔme abe Kristotɔ si ɖe adzɔgbe na Mawu ene. Nyɔnyrɔxɔxɔ kple afɔɖeɖe siwo doa ŋgɔ nɛ la nye ɖoɖo siwo Mawu wɔ be dzitsinya nyui nasu ame siwo xɔ Yesu Kristo ƒe vɔsa dzi se la si. (1 Petro 3:21) Eya ta Yesu fia nu eyomedzelawo be ele be woaxɔ nyɔnyrɔ.Mateo 28:19, 20.

Ðe nyɔnyrɔxɔxɔ ɖe tsi me klɔa ame ƒe nu vɔ̃wo ɖa?

Ao. Biblia fia nu be Yesu ƒe ʋu koe ate ŋu aklɔ míaƒe nu vɔ̃wo ɖa. (Romatɔwo 5:8, 9; 1 Yohanes 1:7) Gake hafi Yesu ƒe vɔsaa naɖe vi na ame aɖe la, ele be wòaxɔ Yesu dzi se, wòatrɔ eƒe agbenɔnɔ wòawɔ ɖeka kple Yesu ƒe nufiafiawo, eye wòaxɔ nyɔnyrɔ.Dɔwɔwɔwo 2:38; 3:19.

Nu kae nye mawutsideta?

Nya mawutsideta medze le Biblia me le gbegbɔgblɔ gbãtɔ me o. Enye wɔna aɖe si me wodea tsi ta na vidzĩ le (wowua tsi ɖe eƒe ta dzi loo alo kɔa tsi ɖe ta me nɛ) hetsɔa ŋkɔ nɛ.

Ðe Biblia fia nu be woana nyɔnyrɔ vidzĩwoa?

Ao. Ame siwo tsi ase “Mawu Fiaɖuƒe . . .  ŋuti nya nyuia” gɔme ahaxɔ edzi se la koe ate ŋu axɔ nyɔnyrɔ azu Kristotɔwo. (Dɔwɔwɔwo 8:12) Esia do ƒome kple Mawu ƒe nyaa sese, edzi wɔwɔ kple dzimetɔtrɔ—vidzĩwo mate ŋu aɖe afɔ siawo o.Dɔwɔwɔwo 2:22, 38, 41.

Azɔ hã, Biblia na míenya be Mawu bua Kristotɔwo ƒe vi siwo metsi haɖe o be wole kɔkɔe le esi wo dzilawo wɔa nuteƒe na Mawu ta. (1 Korintotɔwo 7:14) Ne ɖe wòsɔ be woana nyɔnyrɔ vidzĩwo la, magahiã be woabu wo be wole kɔkɔe le ame aɖe ƒe nuteƒewɔwɔ ta o. *

Susu totro siwo le amewo si ku ɖe Kristotɔwo ƒe nyɔnyrɔxɔxɔ ŋu

Susu totro: Mehiã kokoko be woanyrɔ ame ɖe tsi me o, ne wowu tsi ta nɛ alo kɔ tsi ɖe ta me nɛ la, esia hã sɔ.

Nyateƒea: Nyɔnyrɔxɔxɔ siwo katã ŋu Biblia ƒo nu tsoe la nye esiwo me wonyrɔ ameawo ɖe tsi me le. Le kpɔɖeŋu me, esi nusrɔ̃la Filipo nyrɔ Etiopia ŋutsu aɖe la, Biblia gblɔ be “woɖi yi tsi la me.” Emegbe “wodo le tsia me.”Dɔwɔwɔwo 8:36-39. *

Susu totro: Biblia ɖee fia be vidzĩwo hã xɔa nyɔnyrɔ ne wole ƒome blibo aɖe nyrɔm. Le kpɔɖeŋu me, Biblia gblɔ tso gaxɔdzikpɔla aɖe si nɔ Filipi ŋu be: “Wonyrɔ eya kple eƒe ƒome bliboa katã.”Dɔwɔwɔwo 16:31-34.

Nyateƒea: Nya siwo dze le gaxɔdzikpɔlaa ƒe ŋutinya sia me ɖee fia be eƒemetɔ siwo xɔ nyɔnyrɔ la se “Yehowa ƒe nya” gɔme eye “wokpɔ dzidzɔ geɖe.” (Dɔwɔwɔwo 16:32, 34) Nyateƒenya mawo na míekpɔe kɔtɛ be ne vidzĩ aɖewo le gaxɔdzikpɔlaa ƒe ƒomea me hã la, womanyrɔ wo o, elabe womate ŋu ase Yehowa ƒe nya gɔme o.

Susu totro: Esi Yesu gblɔ be ɖevi suewo tɔe nye Fiaɖuƒea la, efia be eda asi ɖe edzi be woate ŋu anyrɔ vidzĩwo.Mateo 19:13-15; Marko 10:13-16.

Nyateƒea: Menye nyɔnyrɔxɔxɔ ŋue Yesu nɔ ƒom tsoe hafi gblɔ nya mawo o. Nu si koŋ eƒe nyawo fiae nye be ele be ame siwo adze na Mawu Fiaɖuƒea la nanɔ abe ɖevi suewo ene—woabɔbɔ wo ɖokuiwo eye woalɔ̃ faa woafia nu wo.Mateo 18:4; Luka 18:16, 17.

^ mm. 3 Helagbe me nya si me woɖe nya “nyɔnyrɔxɔxɔ” tsoe la fia be “woade nane tsi me.” Kpɔ nyagɔmeɖegbalẽ si nye Theological Dictionary of the New Testament, Babla I, axa 529.

^ mm. 12 Le numekugbalẽ aɖe ƒe nya nu la, “nyɔnyrɔnana vidzĩwo ƒe nya aɖeke medze le Nubabla Yeyea me o.” Egblɔ hã be “susu totro si le amewo si ku ɖe nyɔnyrɔxɔxɔ ŋu,” si nye be eklɔa nu vɔ̃ le ame ŋu, koŋue na wova dze nyɔnyrɔnana vidzĩwo.The International Standard Bible Encyclopedia Babla 1, axa 416-417.

^ mm. 15 Wogblɔ le Katolikotɔwo ƒe numekugbalẽ aɖe ƒe tanya si nye “Nya Si Biblia Gblɔ Tso Nyɔnyrɔxɔxɔ Ŋu” te be: “Edze ƒãa be le Sɔlemeha gbãtɔ me la, menye ɖe wode tsi ta na amewo o, ɖe wonyrɔ wo ɖe tsi me boŋ.”New Catholic Encyclopedia Babla 2, axa 59.