Dzo kpo yi emenuwo dzi

Nu Kae Lã Wɔadã Si Biã Helĩhelĩ Si Ŋuti Woƒo Nu Tsoe Le Nyaɖeɖefia Ta 17 La Nye?

Nu Kae Lã Wɔadã Si Biã Helĩhelĩ Si Ŋuti Woƒo Nu Tsoe Le Nyaɖeɖefia Ta 17 La Nye?

Ale si Biblia ɖo eŋui

Lã wɔadã si biã helĩhelĩ si ŋuti woƒo nu tsoe le Nyaɖeɖefia Ta 17 le tsitre ɖi na habɔbɔ aɖe si ƒe taɖodzinue nye be yeana dukɔ siwo katã le anyigba dzi nawɔ ɖeka eye yeanye woƒe teƒenɔla. Tsã la, eyae nye Dukɔwo ƒe Nubabla, gake eyae va zu Dukɔ Ƒoƒuawo egbea.

Ale si nàwɔ akpɔ lã wɔadã si biã helĩhelĩ la adze sii

  1. Dunyahehe ƒe habɔbɔ. ‘Ta adre’ le lã wɔadã si biã helĩhelĩ la si, eye mawunyakpukpuia gblɔ be ta siawo le tsitre ɖi na “to adre” kple “fia adre” alo xexemedziɖuɖu sesẽ adre. (Nyaɖeɖefia 17:9, 10) Wozãa towo kple lã wɔadãwo le Biblia me wole tsitre ɖi na dziɖuɖuwo.Yeremiya 51:24, 25; Daniel 2:44, 45; 7:17, 23.

  2. Eɖi xexea me dunyahehe ƒe nuɖoanyia. Lã wɔadã si biã helĩhelĩ la ɖi lã wɔadã si to ta adre si ŋuti woƒo nu tsoe le Nyaɖeɖefia ta 13 me, si le tsitre ɖi na xexea me ƒe dunyahehe ƒe nuɖoanyiawo. Lã evea siaa to ta adre kple dzo ewo, eye busuŋkɔwo le wo ŋu. (Nyaɖeɖefia 13:1; 17:3) Woɖi wo nɔewo ale gbegbe be womate ŋu agblɔ be nu dogoɖenunue o. Lã wɔadã si biã helĩhelĩ la nye lã wɔadã la ƒe legba alo eƒe nɔnɔmewɔwɔ, si le tsitre ɖi na xexea me dunyahehe ƒe nuɖoanyia.Nyaɖeɖefia 13:15.

  3. Exɔ ŋusẽ tso fia bubuwo gbɔ. Lã wɔadã si biã helĩhelĩ la ‘do tso’ alo dzɔ tso fiaɖuƒe bubuwo me.Nyaɖeɖefia 17:11, 17.

  4. Edo ka kple subɔsubɔhawo. Babilon Gã la, si nye alakpasubɔsubɔha siwo katã le xexea me, bɔbɔ nɔ lã wɔadã si biã helĩhelĩ la dzi, eye esia ɖee fia be subɔsubɔhawo kpɔa ŋusẽ ɖe lã sia dzi.Nyaɖeɖefia 17:3-5.

  5. Edoa vlo Mawu. “Busuŋkɔwo” yɔ lã la ŋuti fũu.—Nyaɖeɖefia 17:3.

  6. Adzudzɔ dɔwɔwɔ sẽe. Woadee “aʋli me” * alo adzudzɔ dɔwɔwɔ sẽe, gake agado ake.Nyaɖeɖefia 17:8.

Biblia me nyagblɔɖiawo va eme

Kpɔ ale si Dukɔwo ƒe Nubabla kple Dukɔ Ƒoƒuawo si va kplɔe ɖo la ƒe ŋutinya ɖo kpe edzi be Biblia me nyagblɔɖi si ku ɖe lã wɔadã si biã helĩhelĩ ŋu va eme la ɖa.

  1. Dunyahehe ƒe habɔbɔ. Dukɔ Ƒoƒuawo de dunyahehe ƒe nuɖoanyi dzi to ale si wòna “dziɖuŋusẽ ƒe sɔsɔminasɔe Emetɔwo katã” me. *

  2. Eɖi xexea me dunyahehe ƒe nuɖoanyia. Le ƒe 2011 me la, Dukɔ Ƒoƒuawo gblɔ be dukɔ yeye aɖe va ɖo ye me, esiae nye dukɔ 193 lia. Eya ta etea ŋu ƒoa adegbe be yee le dukɔwo kple anyigbadzinɔla akpa gãtɔ teƒe.

  3. Exɔ ŋusẽ tso fia bubuwo gbɔ. Dukɔ siwo le Dukɔ Ƒoƒuawo mee na wòli, ŋusẽ agbɔsɔsɔme si dukɔ siawo nɛ la koe nye ŋusẽ si katã le esi.

  4. Edo ka kple subɔsubɔhawo. Xexea me ƒe subɔsubɔhawo doa alɔ Dukɔwo ƒe Nubabla kple Dukɔ Ƒoƒuawo siaa ɖaa. *

  5. Edoa vlo Mawu. Woɖo Dukɔ Ƒoƒuawo anyi be wòana “ŋutifafa kple dedienɔnɔ nanɔ dukɔwo dome.” * Togbɔ be adze abe taɖodzinu nyui aɖee nye esia ene hã la, ɖe Dukɔ Ƒoƒuawo doa vlo Mawu to asiƒuƒu akɔ be yeawɔ nu si Mawu gblɔ be yeƒe Fiaɖuƒea ɖeka ko nava wɔ la.Psalmo 46:9; Daniel 2:44.

  6. Adzudzɔ dɔwɔwɔ sẽe. Dukɔwo ƒe Nubabla si woɖo anyi le Xexemeʋa I megbe kpuie be wòakpɔ ŋutifafa ta la mete ŋu wɔe be dukɔwo medze wo nɔewo dzi o. Edzudzɔ dɔwɔwɔ esime Xexemeʋa II dze egɔme le ƒe 1939 me. Esi Xexemeʋa II wu enu le ƒe 1945 me la, woɖo Dukɔ Ƒoƒuawo anyi. Eƒe taɖodzinuwo, nyawo gbɔ kpɔkpɔ kple eƒe ɖoɖowo sɔ kple Dukɔwo ƒe Nubabla tɔ ale gbegbe.

^ mm. 10 Numekugbalẽ aɖe gblɔ be Helagbe me nya si gɔme woɖe be “aʋli me” fia “do globo ŋutɔ.” (Vine’s Expository Dictionary of Old and New Testament Words) Biblia si nye King James Version ɖe egɔme be “do globo.” Le Biblia me la, efia ale si woasika ame ɖi alo wòadzudzɔ dɔwɔwɔ kura.

^ mm. 13 Kpɔ Dukɔ Ƒoƒuawo Ƒe Ðoɖoa ƒe Nyati 2 lia.

^ mm. 16 Le kpɔɖeŋu me, adaŋudeha aɖe si me Protestant-ha gbogbo aɖewo le le Amerika gblɔ le ƒe 1918 me be Dukɔwo ƒe Nubabla la nye “Mawu ƒe Fiaɖuƒe si woɖo ɖe anyigba dzi to dunyahehe dzi.” Le ƒe 1965 me la, Budaha, Katolikoha, Ɣedzeƒe Ortodɔks-ha, Hindu-ha, Islam-ha, Yuda-subɔsubɔha kple Protestant-hawo ƒo ƒu le San Francisco be woada megbe na Dukɔ Ƒoƒuawo ahado gbe ɖa ɖe eta. Le ƒe 1979 me la, Papa Yohanes Paulo II gblɔ be yeƒe mɔkpɔkpɔe nye be Dukɔ Ƒoƒuawo ayi edzi anye “ŋutifafa kple dzɔdzɔenyenye ƒe adaŋudeƒe gãtɔ.”

^ mm. 17 Kpɔ Dukɔ Ƒoƒuawo Ƒe Ðoɖoa ƒe Nyati 1 lia.