Ale si Biblia ɖo eŋui

Biblia meƒo nu tso Halloween ŋu o. Ke hã, afi si wòdzɔ tso le blema kple kɔnu siwo yia edzi le azã sia ɖuɖu me egbea siaa ɖee fia be wotui ɖe aʋatsodzixɔse ku ɖe ame kukuwo kple gbɔgbɔ makpɔmakpɔwo alo gbɔgbɔ vɔ̃wo ŋu dzi.—⁠Kpɔ “Halloween ƒe ŋutinya kple eŋu kɔnuwo.”

Biblia xlɔ̃ nu mí be: “Nukala, kple ŋɔliyɔla aɖeke meganɔ dowòme o.” (5 Mose 18:10-12) Togbɔ be ame aɖewo bua Halloween be enye dzidzɔdonamezã si ŋu naneke megblẽ le o hã la, Biblia tsri kɔnu siwo yia edzi le azã sia ɖuɣi. Biblia gblɔ le 1 Korintotɔwo 10:20, 21 be: “Nyemedi be miade ha kple gbɔgbɔ vɔ̃wo o. Miate ŋu anɔ nu nom le Yehowa ƒe kplu nu, aganɔ nu nom le gbɔgbɔ vɔ̃wo ƒe kplu nu o.”

Halloween ƒe ŋutinya kple eŋu kɔnuwo

  1. Samhain: Halloween dzɔ tso “Kelt-tɔwo ƒe trɔ̃zã aɖe si woɖuna ƒe 2,000 aɖewoe nye esi va yi la me. Kelt-tɔwo xɔe se be kukuawo va zɔna le agbagbeawo dome le ƒea ƒe ɣeyiɣi sia me. Le Samhainɖuɣi la, agbagbeawo ate ayi aɖakpɔ kukuawo ɖa.” (The World Book Encyclopedia) Gake Biblia gblɔe kɔtɛe be “kukuawo menya naneke o.” (Nyagblɔla 9:5) Eya ta womate ŋu ado ka kple agbagbeawo o.

  2. Halloween ƒe awudodowo, kpetikewo, nuwɔnawo kple nunanawo: Agbalẽ aɖe (Halloween​—An American Holiday, An American History) gblɔ be Kelt-tɔ aɖewo doa awu ɖivɔvɔ̃wo ale be gbɔgbɔ siwo le tsatsam la nabui be yewo tɔwoe wonye ale be womaɖe fu na yewo o. Wo dometɔ aɖewo hã naa kpetike gbɔgbɔawo be woatsɔ akpata wo. Le blema Europa la, Katolikotɔwo ƒe subɔsubɔhakplɔlawo da asi ɖe trɔ̃subɔla siwo dome wonɔ la ƒe dzixɔsewo dzi eye wonaa woƒe hameviwo nɔa tsatsam tso aƒe me yi aƒe me nɔa nunana suesuewo biam. Gake Biblia meda asi ɖe edzi be woatsɔ alakpasubɔsubɔ ƒe nuwɔna atsaka kple tadedeagu na Mawu o.​—⁠2 Korintotɔwo 6:17.

  3. Ame kuku siwo wobe wodona le zã me va noa ʋu le lãme na amewo (VAMPIRE), adzetɔwo, amegbetɔ siwo wobe wotrɔna zua amegãxiwo, ame kuku siwo wobe wotrɔna zua amegbetɔwo (ZOMBIE): Tso blema kee woxɔe se be nu siawo do ka kple gbɔgbɔ vɔ̃wo. (Halloween Trivia) Gake Biblia ya gblɔe eme kɔ be ele be míatsi tre ɖe gbɔgbɔ vɔ̃wo ŋu ke menye be míaɖu azã kpli wo o.​—⁠Efesotɔwo 6:12.

  4. Halloween ƒe aŋanyiwo: Le blema Britain la, “amewo nɔa tsatsam tso ʋɔtru nu yi ʋɔtru nu nɔa amewo biam be woana nuɖuɖu yewo ne yewoado gbe ɖa ɖe wo ta,” eye woléa “sabala ƒomevi aɖe si me woɖe to ɖo hesi vele ɖo la ɖe asi. Wɔna sia fia luʋɔ siwo tsi ŋutiklɔdzo me.” (Halloween​—From Pagan Ritual to Party Night) Ame aɖewo gblɔna be wozãa akaɖi siawo tsɔ nyaa gbɔgbɔ vɔ̃wo. Le ƒe 1800-awo me la, Dziehe Amerikatɔwo va tsɔ aŋanyi ɖɔli sabala ƒomevi ma elabena aŋanyiwo bɔ eye enɔa bɔbɔe be woaɖe to ɖe wo me. Dzixɔse siwo le megbe na kɔnu sia, siwo nye luʋɔ makumaku, ŋutiklɔdzo kple gbedodoɖa ɖe kukuawo ta mewɔ ɖeka kple Biblia ƒe nufiafiawo o.​—⁠Ezekiel 18:4.